1. Konn-eklo dusreacho boil vô menddro chorun marta vô vikta, tannem eka boilak hinddantle panch boil diunk zai, ani eka menddreak hinddantlim char menddram.
2. Choran luksann purn bhôrun diunchem. Tachê kodde kãich na zalear, chorlam tachi bhorpai korunk, apnnakuch êk chakor koso vikcho. Chorlolem zonavor, zanv to boil, vô ghaddum, vô menddro, hem tachê kodde jivem mellot zalear, tannem ekak don farik korunk zai. Êk chôr, ratcho, dar fôddun bhitôr sorla to sampddot ani tacho jiv vachot, zannem taka marla to tachea rogtacho zobabdari nhoi. Punn tem suria udetôch ghoddot zalear, to tachea rogtacho zobabdari.
5. Eklo-konn aplea zonavorank xetant vô dak-molleant chorvak sôddta, ani tim zonavoram dusreachea xeta-molleant chortat ani xeta-molleak luskonn kortat zalear, tannem aplea xeta-molleanchea pika vorvim tem luskonn bhôrun diunk zai.
6. Eklo-konn aplea xeta-bhattant uzo ghalta, ani ho uzo xezarchea xeta-bhattant posorta, ani piklolem vô pikta tem, vô lunvun davlam tem lason ibadd zata, hem luskonn uzo ghaltolean purnn bhôrun diunk zai.
7. Eklo-konn dusreache duddu vô her molacheô vostu apnna kodde dovrunk kobul zata; ani teô vostu tachea ghorantleô chorun vheleô, punn chor sampoddlo zalear, hea choran dupett farik korchem.
8. Punn to chor sampddunk na zalear, zachê lagim teô vostu dovorloleô, tea ghoracho dhoni Deva mukhar vetolo ani apnnem teô dusrea mon'xacheô vostu chorunk nant mhonn soputa khal sangchem.
9. Dhoniponna vixim vad-vivad zata tedna, zanv gorvam-gaddvam vixim, zanv menddram, vô vostram vô kosle-i sanddlolê vostu vixim, aplem mhonnttat tankam dogank-ui Deva mukhar vhorche. Zaka Dev guneanvkari korta tannem dusreak dupett farik korchem.
10. Eklo-konn dusrea mon'xachem gaddum, vô boil, menddro, vô her zonavor apnnakodde dovrunk kobul zait, ani tem zonavor morta vô dukhovta, vô tem konnem bollan ubarun vhelem zalear, ani konnachich govai mellona,
11. zannem tem zonavor apnnakodde dovorlolem tannem apnnem dusreachem zonavor chorunk na mhonn Sorvesporachea nanvan soput diuncho. Tem zonavor chorun vhorunk na zalear, dhonian tem aplea angar gheunchem, vô dusrean taka farik korchi goroz na;
12. punn tem chorun vhelem zalear, dhoniachem luskonn bhôrun diunchem.
13. Taka ran'votti mon'zatin ghansavun marlem zalear, sot-fottik, hea mon'xan tea zonavorachem kitem urlam tem puravo koso haddun dakhounchem; ran'votti mon'zatin marlam tem tannem farik korchi goroz na.
14. Eklo-konn dusreachem zonavor uxnnem gheta ani tem, dhoni pois astana, dukhovlem vô melem zalear hannem dhoniak ak'khem luskonn bhôrun diunchem.
15. Punn dhoniachea fuddeant toxem ghoddot zalear tem dhoniak farik korchi goroz na. Tem zonavor dhonian bhaddeak dilolem aslear, luskonn zalam tem bhaddeach vorvim bhôrun taka melltolem.'
16. Konn-eklo soirik zaunk naslolê ankvarik bhuloun haddta tedna, tannem hoklechem mol farik korun tika apli potin korun gheunchi.
17. Punn ticho bapui taka aplê dhuvê kodde logn zaunk addaita zalear, tannem tichea bapaik êkê ankvarichem mol asa titlem farik korchem.
18. Ghaddiaponn kortolê ostorek jieunk diunchi nhoi.
19. Zon'vara kodde lingi-ekvott korta tea mon'xak jivexim marcho.
20. Sorvespora Devak sôddun her devank bhoztat, tancho bhosm korcho.
21. Tunvem porkiank tras dium noiê vô tancher zulum choloum noiê, kiteak Ejiptachea desant tumi porkim asleat.
22. Vidvek ani onathak piddapidd dium nakat.
23. Tankam tumi piddapidd dixat zalear ani tim Mhaka ulo martit zalear, Hanv tanchem aikolea bogor ravuncho na;
24. Mhozo rag pett'tolo ani Hanv tumkam torvarin martolom; tumcheôch bailô vidva zatoleô ani tumchim bhurgim-ballam onatham zatolim.
25. Mhojê porjentlea ekleak, tumchê modlea eka goribak, tunvem duddu uxnnem dilear, tachê lagim kolantoria bhaxen vagum naka, tachê koddcho viaz gheum naka.
26. Khatri diunk dusreachem avoronn ghetai zalear, dis poddchê adim tem portun di;
27. kiteak tachê kodde pangrunk anink kãi na. Hannem to apli kudd dhampta; na zalear to kitem ghalun nhidtolo? To Mhaka ulo marit zalear, Hanv tachem aikotolom, kiteak Hanv chôdd doiall.
28. Dev-ninda korum nakat, ani tumchê porjechea odhikareak xirap ghalum nakat.
29. Tumchê upott pikavollichi, ani dakam-zoitunanchê pikêchi mhaka bhett korunk pattim ravum nakat.Tumcho malgoddo put mhaka bhettoiat.
30. Tumchea gorvantlim, ani menddrantlim malgoddim poram mhaka bhettoiat. Malgoddem purus-por zolmotoch, sat dis avoi-xim asum-di, punn atthvea disa tem mhaka bhettoiat.
31. Tumi mhaka sonvskarloli porza, zaunk zai, dekhun ran'votti zonavoran marlolea tumchea zonavorachem mas khaum nakat, tem sunneank ghalat.'
