1. Sorvesporan Moizesak mhollem,
2. Sorv malgodde mhaka bhettoiat; Israel porjent kusvo ugddunk poile, zaum to monis zaum tem zonavor, te mhoje.'
3. Moizesan porjek mhollem, 'Hea disacho ugddas korat' - jea Ejiptachea desant tumi gulam' zaun asleat, thoinchim tumi bhair sorleant to dis. Hea disa Sorvesporan tumkam aplea bollixtt hatan thoinchim bhair kaddleant. Khomiracho unddo khauncho nhoi.
4. Hea disa, Abibachea mhoineant, tumi bhair sorunk zai.
5. Kanaanit-porjecho ganv, Hittit ani Amorit, Hivit ani Jebuzit hea porzancho ganv tumchea tabeant kortolo mhonn Sorvesporan tumchea purvozank sobhemazar bhasailolem asa. Tôr, hea dud ani mhonv vhanvtolea desant to tumkam haddun pavoita tedna heach mhoineant tumi hi rit pallunk zai.
6. Sat dis tumi khomir naslolo unddo khauncho, ani satvea disa Sorvesporachea manak hi porob somarombhchi.
7. Hea sat disamnim tumi khomir naslolo unddo khauncho, ani tumchea ghoramnim khomiracho unddo ani khoinsoruch ganvant khomir ascho nhoi.
8. Ani tea disa, tujea putak tum sangtoloi: 'Hanv Ejiptantlo bhair sortana, Sorvesporan mhaka kelam tachê khatir hem sogllem.'
9. Hi khunna tumchea hatar vô kopolar êk ugddas koso, ani hê porim Sorvesporachi adnia sodanch tumchea onttancher urtoli kiteak aplea bollixt hatan Sorvesporan tumkam Ejiptantlim bhair kaddleant.
10. Tharailolea vellar, vorsachea vorsa, tumi hi adnia palltoleat.'
11. Sorvesporan tumchea purvozank bhasailam tea pormonnem, tumkam Kanaanitanchea desant pavoile ani ho ganv tumchea tabeant kelo.
12. Hea khatir kusvo poilo ugoddta to ani tujea zonavoram modlo dôr-êk malgoddo Sorvesporak bhettouncho: he dadle malgodde Sorvesporache zaun asa,
13. punn gaddvachea malgoddea boldek ek menddro divun, tumchean to vikto gheum-iet; na tôr tachi gomtti môddunk zai. Sogllea tumchea malgoddeank - tumchech kulliecheank - tumi sôddoun gheunk zai.
14. Fuddarak, tumcho put hea kaideachi somzonni kitem-kat vicharit tedna, tumi taka oso zobab ditoleat, 'Ejiptant ami gulamponn bhôgtaleanv thoinchim Sorvesporan Aplea bolixtt hatan amkam bhair kaddun sôddoilim.
15. Faraoh aplê dharunnaien amkam bhair sorunk dinaslo tedna, Sorvesporan sogllea Ejiptantlea malgoddeank, mon'xank toxem zonavorank marun uddoile. Heach khatir dadlea lingachim malgoddim zonavaram Sorvesporak hanv bhettoitam, ani sorv mhojea malgoddea putank soddoun ghetam.
16. Hi khunna tumchea hatar vô kopolar êk ugddas koso ani hê porim Sorvesporachi adnia sodanch tumchea onntancher urtoli kiteak aplea bollixtt hatan Sorvesporan tumkam Ejiptantlim bhair kaddleant.'
17. Faraohn Israel porjek sôddun dili tedna, Devan tika Filistiak veta ti mottvi vatt dhôrunk dili na. Devan chintlem, 'Apnnak zhuzchem poddta tem polleun, porjen mon bodôllolem ani portea paiamnim ti Ejiptant ailoli mhaka naka.'
18. Punn tika addvi-tiddvi oronneantlean bhonvddaun, nitt Tambddea Doria-xim pavoili. Bondukam ani doste gheun Israel porza Ejiptantli bhair sorli.
19. Juzen Israel-porjê lagim bhas ghetloli, 'Dev tumkam bhett kortolo tedna tumi mhojim haddam hangachim tumchea vangdda vhorunk zai' tea pormannem Moizesan aplea vangdda Juzechim haddam ghetlim.
20. Israel-porza Sukkotchi bhair sorli, ani oronneachê ximer, Etham mhonnttat thoim tãnnim aple tombu ubarle.
21. Sorvespor apunn tanchê mukhar ravun, disacho, kupachea eka khambea vorvim tankam vatt dakhoitalo, ani ratcho, tankam uzvadd diuncheak, ujeachea khambea vorvim tankam choloitalo; hê porim, dis-rat tãnnim fuddem sorunk zai aslem.
22. Dis-bhor, kupacho khambo sodanch porjê mukhar vetalo, punn rat zatôch ujeacho khambo mukhar vetalo.
