1. Lochanam ximpddaum nakat, ani lottik govai divun guneanvkareak mozôt korum nakat.
2. Vaitt adartat, vô niti-add govai ditat tedna, choddan chodd lôk korta mhonn tachi dekh gheum nakat.
3. Neai-sobhent, goribam sovem koslich ontor korum nakat.
4. Tumchea dusmanacho boil vô ghaddum pollun veta tem tumi dekhxat zalear, tea zonavorak dhonia-xim portun haddat.
5. Tumcho dves kortoleachem gaddum ojeachea bharan poddlam zalear, taka polleun pattim ravum nakat; vochun taka adhar diat.
6. Neai-sobhent gorib mon'xak niticho-hok'k mona korum nakat.
7. Baskollponn korum nakat. Ani niropradhiak mornachem formonn dium nakat, ani guneanvkareak sôddun dium nakat.
8. Lonch gheum nakat, kiteak lonch nitoll nodor asloleank kudd'dde korta ani promannikak favo aslolê niticho bhôsm korta.
9. Eka porkea mon'xak zulum kori nakat; kiteak porki kitem bhôgtat tem tumi zannot, tumich Ejiptant porki zaun asleat.'
10. Sov vorsam tumchem xet vosoiat, ani pikta tem punzaiat.
11. Punn satvea vorsa tem roinastana dovrat ani thoinchem kãich kaddum-paddum nakat; kitem thoim pikta tem goribank khaum-di, ani urlolem ranantlea zonavorank asum-di. Oxench tumchea dakam-molleam ani zoitunacheam-molleam vixim zaum-di.
12. Sov dis vavr korat, punn satvea disa visôv gheiat, hê porim, tumcho boil ani tumchem gaddum visôv ghetolim, tumchê chakornichem bhurgem ani pôrko lôk novea jivan bhortolim.
13. Hanvem, tumkam sanglam tea soglleak lokx diat. Khoincheai dusrea devanchem nanv gheum nakat. Tumchea onttancher tem kednanch aikum ieunchem nhoi.'
14. Dôr vorsa, tin pavtti mhojea manak tumi porob palltoleat.
15. Tharail'lea disamnim Abib mhoineant, mhonnge, tumi Ejiptantlim bhair sorlim tea mhoineant, khomir naslolea Unddeachi Porob pallat. Hê porbechea sat disam pottim tumkam formailolem asa tê porim, khomir naslolo unddo khaiat. Konnuch ritea hatamnim mhojê mukhar ieum nakat.
16. Toxench tumchea roilolea xetam-bhattanchi lunvnni - paddo zata -tumchea vaurachim prothom' follam tim - tedna Pikechi Porob samballat. Ani vorsachea xevottak, mhonngê, tumchea vaurachim follam xetantlim tumi ekttaim kortat tedna, Tombunchi porob samballat.
17. Vorsachea vorsa, tin pavtti tumchea sogllea dadleamnim, Sorvespora Deva mukhar hajir zaunk zai.
18. Mhojê mon'zat-boliechem rogot khomirachea unddea borabor bhettoum nakat nhoi mhonn mhojê porbê somoiar, mhaka bhettoilolea zon'avoranchi chorob dusrê sokallim porian dovorchi nhoi.
19. Tumchê zomnichim ut'tom tim prothom' follam tumchea Sorvespora Devachea ghorant haddat. Menddra-bokddeachea lhan porachem mas tanchê avoichea dudan xizovunchem nhoi.'
20. Tujê vatter tuka rakhunk ani Hanvem toiar kela tea zagear tuka vhorunk Hanvuch tujê mukhar Mhojea dutak dhaddtolom.
21. Taka man di ani to sangta titlem-i aik. Tacher kolponaka; osli chuk to tuka bhogxicho na, kiteak tachê sovem Mhojem Nanv asa.
22. Chotraien tacho tallo aikoxi zalear ani Hanv sangtam tem sogllem korxi zalear, tuje dusman Mhoje dusman zatole ani tuje virodhi Mhoje virodhi zatole.
23. Mhozo dut tujê mukhar vetolo ani tuka Amoritanchea, Hititanchea, Perizitanchea, Kanaan'karanchea, Hivitanchea ani Jebusitanchea ganvamnim vhortolo ani hea soglleancho Hanv bhosm kortolom.
24. Tanchea devank tumi nomoskar korum nakat vô bhozum nakat, ani tancheô dhormik chali tumi pallinakat. Tanche dev bhair uddoiat, ani tanche povitr khambe môddun tancho churo korat.
25. Sorvespora tumchea Devak, nomoskar korat ani hanv tumchea khanna-pivonnacher axirvad ditolom, ani tumchê sorv piddentlim tumkam nivartolom.
26. Tumchea desant, konnachoch gorbpatt zanvchona, nhoi mhonn konnuch ostori vanztti urchina ani Hanv tuka tujea jivitacho purnn aukh ditolom.
27. Tumchê fuddem Hanv mhoji bhirant dhaddtolom; tumi zhuzunk vetat tea loka modem hanv ghondôll korun sôddtolom, ani soglle tumche dusman pollapoll kaddtole.
28. Hivit ani Kanaanit, ani Hittit-hankam soglleank bhair dhanvddaunchê khatir tumchê mukhar Hanv ganjil sôddtolom.
29. Tumchê mukhar ekach vorsa modem hanv tankam bhair ghalchona; kiteak, sogllo dês oronnem zaun, ran'votti mon'zatim virudh tumchean zhuzunk zaunchem na.
30. Punn astê-astê hanv tumchê mukhar tankam thoinchim bhair kaddtolom, ani tumcho lôk vaddun vochon to ganv tumchea tabeant zatolo.
31. Tumcheô ximô Tambddea Doriant thaun, Filistevkaranchea Doria porian, ani Aqaba oronnem thaun Eufrates Nodi porian pavtoleô. Tea desant vosti kortoleam voir hanv tumkam podvi ditolom ani tumi tankam tumchê mukhar dhanvddaitoleat.
32. Tanchê lagim vô tanchea devam lagim koslich koblat korum nakat.
33. Hea porzank tumchea desant ravunk dium nakat; na tor, tim tumkam mhojêr pap adarum-xim korit. Tanchea devanchi tumi seva korxat zalear, tumi khorench fasak sampoddtoleat.'
