1. Moizesan sogllê Israel-porjek ektthaim korun mhollem, 'Tumi oxem korunk zai mhonn Sorvesporan formailam:
2. Tumcho vavr korunk tumkam sôv dis asat, punn satvo dis tumi Sorvesporachea manak povitr samballcho, purnn visovacho dis to. Tea disa konnui vavr korta tacho jiv kaddcho.
3. Son'vara disa khoincheai tumchea ghoramnim chul petthounchi nhoi.'
4. Moizesan sogllê Israel-porjek mhollem, 'Oxem Sorvesporan formailam:
5. Tumchem aspotintlem dan-dennem Sorvesporak bhettoiat. Hi bhett udhar kallzan korunk sôdtat tãnnim Sorvesporak êk kosli-I denngi haddchi: bhangar, rupem, pitull;
6. nillea, zambllea, ani tambddea lonv-sutan vinnlolem lugott; barik sonni-lugott; bokddeche kens vinnlolem lugott;
7. tambddea rongachem menddreachem chambddem; nazuk chambddem; babhul zhaddachem lankudd;
8. divleank tel; makhnnechem tel ani pormôllit dhump korpak goroz to mosalo;
9. efodak ani Hodd'ddeachê Patiek nettounk jin'sanvar fator mannkam.'
10. Tumchê modem huxar, kolecho vavr kortat te soglle hanga ieum-di, ani Sorvesporan formailam titlem-I tannim korun diunchem.
11. Bhiradd-Tombuche soglle bhaile-bhitorle podd'dde, podd'ddeank ganch-ankdde, faskeô ani tacheô danddiô ani tache khambe ani peddam;
12. Korarachi Arkpett, tache dandde ani dhampnnem, ani bhitorlo podd'ddo;
13. mez, tache dandde ani tachem samonn; Devak bhettounk undde;
14. uzvaddak divea-sthan ani tachem samonn; divleô ani tanchem tel;
15. dhump hulpaunk vedi ani tiche dandde; makhnnechem tel; pormôllit dhump; Tombuchea darak podd'ddo;
16. hom'-bhettechi vedi ani tachi pitullchi tatti, dandde ani tachem samonn; tost ani tachem pedd;
17. oddpak podd'dde, tache khambe ani tachim peddam; hea oddpak daracho podd'ddo.
18. Tombuk ani oddpak kochor, kalxi ani razu;
19. ani iadnikank ghalunk sevadhormik vostram Povitr Zagear, dhormik sevek vapurchim iadnik Aaronak povitr vostram ani tache putank vostram, tachea iadniki ritink.'
20. Ak'khi Israel porza Moizesa sorxili koddsorli. Zomaticho Tombu toiar korchê khatir, soglleamnim udar kallza-monan ani otmik hurbhen Sorvesporak apli denngi haddli. Samania dhormik ritink toxem iadnikanchea povitr vostrank goroz aslem titlem-i tannim haddlem.
22. Dadleam-bailamim jin'nos bhangarache nog: saddiêpini, mudiô, kanknnam ani sorpolleô ani oslem tãnnim haddun dilem. Sorvesporak bhangarachi angovnn kelea tannim soglleamnim bhangar haddlem.
23. Konnakodde sonni-lugott aslem tem-i tãnnim haddlem; nillem, zambllem tambddem lonv-sut bokddechê kens ani tambddea rongachem menddreachem chambddem-i tãnnim haddun dilem;
24. Konnakodde rupem-pitull aslem tem Sorvesporak bhettoilem; tech porim kosleai vavrak upkarta tem babhulchem lankudd.
25. Bail-mestinimnim jin'san-var rongi-sut ani lonv-sut haddlem;
26. bokddechea kensanchem sut korun haddlem.
27. Mukheleamnim fator-mannkam, iadnikanchea vostrank goroz tim tãnnim haddun dilim,
28. ani makhnnechem tel ani pormôllit dhump korchê khatir sogllea jin'sancho mosalo.
29. Sogllê Israel porjen, dadleamnim toxem bailamnim konnak khoxi ani tank asli tãnnim hurben ani udhar kallzan Moizesa vorvim formailolea Sorvesporachea ak'khea vavrak goroz titlem-i haddun dilem.
30. Moizesan Israel-porjek mhollem, 'Polleiat, Sorvesporan Judachê kullientlea Bezalelak vinchun kaddla; to Uricho put ani Huracho natu.
31. Goroz ti hikmot ani zannvai, boll ani takot Sorvesporan taka dileant; soglleô ievzonneô to kaddtolo ani huxarkaien teô palltolo,
32. bhangar-rupeachem ani pitullchem sogllem kam toch kortolo; lankudd kantoun,
33. ani mannkam-fator katrun to vavurtolo; sogllo kolecho vavr to kortolo.
34. Sorvesporan taka ani Oholiabak Dan kulliechea Ahisamakachea putak, herank ap-aplem kam xikounk gunn-hikmot dileant.
35. Sogllem kantoupachem, vinnpachem, bordar korpachem, suta-lonvechem kam tech kortole ani herank xikoitole.'
