1. Hom'-bhettek tannem, babhul lankddachi êk vedi keli. Ti chovkon êk-sarki: panch hat lamb, panch hat rund, ani tin hat unch.
2. Voir char-ui konxeank tannem xingam kelim, ani tim vedi borabor ekuch nôg zalim. Soglleak pitullchi êk pati marli.
3. Vedik gorjechem saman kelem: gomelam, khorim, udok xinvraunk tostam, ganch ani ujeak kaili. Hem sogllem vedichem samonn tannem pitullchem kelem.
4. Êk pitullchi tatti keli, ani ti vedichê degê sokla dovorli, ani vedichê ordê unchaiek ti pavli.
5. Dandde ukhlun vhorpak, char-ui konxeank êk-êk mudi ghali.
6. Babhul lankddache dandde kele ani tankam pitull marli.
7. Ti ukhlun vhorpak he dandde vedichê don-ui bazumnim aslolea mudiamnim ghale. Vedi patôll follieanchi aslolean bhitorlean soglli pokôll asli.
8. Tannem pitullchem tost kelem, ani tachem pedd pitull-harxeanchem. He harxe Zomatichea Tombuchea darar seva kortolea ostoreanche.
9. Tannem Zomaticho Tombu kelo. Dokhinnechê vatten pon'nas var lambaiek,
10. he pitullchea vis khambeancher ani pitullchea vis peddancher tharovlole, ani tancheô danddiô ani ganch sogllem rupeachem.
11. Ut'torichê vatten taka tich lambai asli ani têch torêchem saman.
12. Ostomtechê vatten tachi lambai ponchvis var, ani podd'dde soglle dha pitullchea khambeam peddancher tharovlole, tancheô danddeô ani ganch hem sogllem rupeachem.
13. Udentechê vô bhitôr sortat tê vatten, tachem dar ponchvis var rund.
14. Don-ui kuxinchea podd'ddeanchi rundai sadde-sat ani sadde-sat var, tin-tin khambeam-peddancher tharovlole.
16. Hê porim soglle oddpache podd'dde barik sonni-lugttache.
17. Khambeanchim sogllim peddam pitullchim; ganch ani danddiô sogllem rupeachem. Soglle khambe sorvbhonvtim rupeachea danddeam vorvim eka-mekak ghôtt dhôrtale.
18. Oddpachea darak barik sonni-lugttacho êk podd'ddo, ani tacher nillea, zamblea, ani tambddea lonv-sutan, vinnlolim chitram aslim. Ho podd'ddo dha var rund ani oddez var unch, ani sorvbhonvtim podd'ddeanchi unchai tich.
19. Ho modlo podd'ddo char pitullchea khambeam-peddancher tharovlolo. Punn tancheô danddiô ani ganch hem sogllem rupeachem.
20. Tombuk toxem oddpak soglleô khilliô pitullcheô.
21. Sorvesporacho Tombu - Korarachê Arkpetticho Tombu - bandunk ani to nettounk kitlo-so ani koslo dhatu vapurlo tacho hixob hanga mellta. Moizesan ho hixôb dovrunk formailem ani to, Ithamara khalva vurtolea Levitamnim toiar kelo. Ithamar, Aaron-iadnikacho put.
22. Bezalel, Uricho put, Judachê kulliecho ani Huracho natu, hannem, Sorvesporan formailolê tê porim sogllo vavr kelo.
23. Tachea adarak Oholiab, Dan kullientlo, ani Ahisamakacho put aslo; kantouchea, maksunchea ani jin'nos rongancho kapus-lonv vinnchea vavrant huxar.
24. Tombu bandchê khatir, Sorvesporak bhettoilolem tem sogllem bhangar ekuntis kikar ani satxim tis shekel, povitr sthanachea shekelachea hixoba pormannem.
25. Porjechi lôk-gonnti kel'li tedna tannim rupeachem vozon xembor kikar ani ek hozar satxim sot'tor ani panch shekel aslem.
26. Lôk-gonntin mezlolea zonn-ekleantlo, vis vorsanche ani voir dadle mezle tancho ank soixim tin hozar painxim pon'nas hozar zatalo.
27. Tea rupeantle xembor kikar povitr Tombuchea xembor peddank, ek kikarachea hixoban eka-eka peddak vapurle.
28. Urlolea êk hozar satxem sot'tor ani panch kikar Bezalelan danddiô, ganch-ankdde ani khambeancheô nokxeô korunk vapurle.
29. Pitull bhettoiloli ti soglli, sot'tor kikar ani don hozar charxim shekel zatali.
30. Tombuchea darachea peddank, vedik, hichê tattiek ani vedichem bakichem samonn aslem taka ghali,
31. tea bhair Tombuchea ani oddpachea sogllea peddank, kalxink ani oslea upeôgak laili.
