1. Ho Bhiradd-Tombu, barik sonni-sutachea, nillea, zambllea ani tambddea lonv-dhagean vinnlolea dha chadrancho kôr. Vhoddlea pakotteanche pranni tancher vinnunk zai.
2. Him dha-i chadram ekach zhokachim zaum-di: chovda var lamb ani don var rund.
3. Panch-panch chadram zoddun xinvun, tanche don podd'dde kôr.
4. Eka-eka podd'ddeachê degê borabor nillea lugttachim kazam kôr.
5. Pon'nas kazam eka podd'ddeak, ani teach jin'sachim pon'nas kazam dusrea podd'ddeak.
6. He donui podd'dde ekamekak zôddunk zatat tê porim pon'nas bhangarache ganch-ankdde kôr. Hê porim Bhiradd-Tombu ak'kho ekech bandavôllicho zatolo.
7. Bhiradd-Tombu voir ghalunk bokddechea kensanchim vinnlolim ikra chadram ghe,
8. sogllim ekach zhokachim: pondra var lamb ani don var rund.
9. Tantlim panch ektthaim zôdd ani urlolim sov toxinch ektthaim zôdd. Ogllem asa tem eka podd'ddeachem chador, orda-ord fuddlean dhôddun, ek ord sokol lambounchem.
10. Hea donui podd'ddeanchê degek eka-mekak fuddo korun pon'nas-pon'nas kazam launchim.
11. Pon'nas pitullche ganch-ankdde korun te donui podd'dde eka-mekak zôddche, hê porim, donuicho ekuch pattos zatolo.
12. Ani ogllem urta tem ordem chador pattlean sokla lambounchem.
13. Ani ak'khê lambaiek, donui kuximnim ordo-ordo var ogllo zata to donui vattamnim sokol lambouncho.
14. Bhailean dhampunk anink don kapam asum-di, ek menddreachea tambddea chambddeachem ani dusrem mozur chambddeachem.
15. Hea Bhiradd-Tombuk babhul lankddacheô ubeô faskeô kôr.
16. Êk-êk faski dha hat unch ani dêdd hat rund aschi.
17. Sogllea faskeank don kochor-khanch ghalunk zai, hê porim, soglleô faskeô eka-mekak zôddunk zatoleô.
18. Dokhinnichê vatten ghalunk vis faskeô kôr
19. ani challis rupeacheô boska, vô peddam faskek don-don, hê porim, te donui kochor sokoilean tea peddancher ghôtt tharovtole.
20. Ut'torichê vatten ghalunk, toxeoch, vis faskeô kôr,
21. dôr faskek don-don sokoilean peddam ghalchim.
22. Ostomtechê vatten, Bhiradd-Tombuchea patthlean sov faskeô ghal,
23. ani hê vatten donui konxeank anink don.
24. Heô konxeancheô faskeô sokoilean zoddloleô astoleô, ani voir, poilê mudiek ek zatoleô.
25. Mhonnttôch, patthlean atth faskeô ani tancheô rupeacheô boska: solla peddam, don peddam ekê faski ponddak ani don peddam dusrê faski pondak.
26. Babhul lankddache pondra addambe kôr, ani he faskeancher add ghalche:
27. panch-panch donui kuxink, ani panch patthlê vatten.
28. Modlo addambo pontak thaun pontak, ak'khê rundaiek add vetolo.
29. Faskeank bhangar kaddunk zai, ani addve addambe dhôrunk, tankam bhangaracheô mudiô launk zai, tea addambeankui bhangar kaddunk zai.
30. Ho Bhiradd-Tombu voir dongrar dakhoila tea nomunea pormannem bandunk zai.
31. Barik sonni-sutacho, nillea, zambllea ani tambddea lonv-dhagean vinnlolea lugttacho êk podd'ddo kôr, ani hacher vhoddlea pakotteancheô pranni vinnun kaddche.
32. Babhul lankddachea ani bhangar kaddlolea danddeancher to podd'ddo lambouncho; hea char danddeank voilean ganch ani sokoilean char rupeachim peddam vô boska ghalunk zai.
33. Ho podd'ddo, voilea pattosachea ganch-ankddeanchi har asa tea sokol dovorcho, ani Korarachi Arkpett hea podd'ddea patthlean dovorchi; hantunt teô don ladiô astoleô. Ani ho podd'ddo Povitr Zageak ani Povitrtantlea Povitr Zageak êk mer koxi ghaltolo.
34. Korarachê Pettek dhampnnem ghal.
35. Povitrtantlea Povitr Zagea bhair, ut'torichea ordan, podd'ddea bhair, tem mez dovorchem, ani dokhinnechê vatten tem divea-sthan.
36. Mattvachea fuddlean vô darak, barik barik sonni-sutachea, ani nillea, zambllea ani tambddea lonv-dhagean vinnlolea lugttacho êk podd'ddo korcho, ani bordad korun to nettouncho.
37. Hea podd'ddeak babhul lankddache panch dandde korche, tankam bhangar kaddchem ani bhangarachea ganchank to lambouncho; ani danddeak sokla pitullchim panch peddam vô boska korcheô.'
