1. Jakobache put ap-aplea kuttumbak gheun Ejiptant gele te he:
2. Reuben Simeon, Levi, Juda,
3. Issakar, Zebulun, Benjamin,
4. Dan, Naftali, Gad, ani Asher.
5. Jakoba-thaun tanchi sonsôt soglli sottôr lôk zatali. Tacho put Juze Ejiptantuch aslo.
6. Uprant, Juze, tache bhav, ani he pinddkeche soglle morun gele,
7. punn hanchê sonstik, mhonnchê Israel-porjek zaitim bhurgim zalim ani ti itli vaddun geli, ki akho dês tãnnim chikar bhôrlo.
8. Ejiptant êk novo raza sodrer boslo ani taka Juzechi kãich khobor nasli.
9. Tannem aplê porjek mhollem, 'Polleiat, Israelacheô put-dhuvô êk porza zali, amchê-von bollixtt ani odik puskôll.
10. Ami xidduk ravunk zai ani tanchi sonkia anink choddona zaunk ami upai gheunk zai. Zhuz upraslear amcher add zhuzunk ani amchea desantlim bhair sorunk tim amchea dusmanank ektthovtolim.'
11. Hea pasot zôdd vavr diun Israelitank koxttavunk tãnnim zobordost mukdomank dovorle. Hê bhaxen tãnnim Faraohk Pithom' ani Rameses him koddeanchim xaram bandlim.
12. Punn jitle te Israelitank chôdd piddapidd ditale, titlim tim choddani chodd vaddtalim, ani Ejiptkarank tanchi bhirant disunk lagli.
13. Ejiptkaramnim Israelitanchea putam-dhuvank sarkinch gulamam kelim ani,
14. jivit koddu-koddu vik kelem; boreach koxtti vavrak tankam lavun, tanchea ittancho vavr tankam korunk lailo; ani xetantlim torê-torechim kamam; ani sogllea jinsanchea koxttamnim tankam dogdailim.
15. Uprant, Shifra ani Pua hea, Hebrevanche dogam voijinnink Ejiptachea patxaian mhollem,
16. Hebrev-bailank porsut zaunk tumi adar ditat tedna, cheddo zalear taka marat; punn cheddum zalear taka vanchum di.
17. Punn teô voijinni Dev-bhirantichim monxam aslim, ani tãnnim patxaiachea hukumak pallo dilona; bogor cheddeankui jieunk dilem.
18. Tedna patxaian tea voijinnink apoun vhorun vicharlem, 'Cheddeank jieunk diun tumi kitem kortat?'
19. Tannim zobab dilo, 'Heô Hebrêv bailô amchea Ejiptantlea bailam porim nhoi; teô bollixtt, ani ami tanchê-xim vechê adim teô bhurgeank zolm ditat.'
20. Dekhun tea voijinnincher Devacho axirvad aslo ani Israel porza vaddot vochun mozbut zatali.
21. Ani voijinni Devak bhietaleô dekhun, Devan tankam aplea khaxea kuttumb dile.
22. Faraohn aplê porjek oxi adnia ghali, 'Hebrevank zolmollea sogllea cheddeank nhõit uddoiat, punn cheddvancho jiv kaddum nakat.'
