1. Levichê kullient êk dadlo aslo. Tannem vochun Levichê êkê dhuvek apli potin korun ghetli.
2. Ti gorbhest zali ani tinnem eka bhurgeak zolm dilo. To bhurgo polleunk ekdom sobit dista dekhun, tinnem tin mhoine taka lipoun dovorlo.
3. Taka anink lipoun dovrunk zaina tem polleun, tinnem lovheanchi êk panttli keli ani taka damôr ani lambi lailim ani tea bhurgeak tantum bhitôr ghalo ani ti panttli nhõichê deger zhaddam modem sôddli.
4. Kitem zata tem pois thaun polleunk tachi bhoinn thoinch ravli.
5. Tedna Faraohchi dhuv nhõint nhavunk aili ani ticheô chakornim nhõichê deger bhonvtaleô. Tea zhaddamnim tinnem êk panttli polleli ani aplê chakornik ti haddunk laili.
6. Ti ugôddtôch, tika roddta to êk bhurgo dixtti poddlo. Tache tika churchure disle ani tinnem mhollem, 'Ho êk Hebrevancho bhurgo zaunk zai.'
7. Tedna bhurgeachê bhoinnin Faraohchê dhuvek mhollem, 'Tujê khatir hea bhurgeak dud diunk Hebrevam modlê êkê bailek hanv apounk vochum?'
8. Faraohchê dhuven mhollem, 'Hôi, voch.' Ani cheddum bhurgeachê avoik haddunk gelem.
9. Tika Faraohchê dhuven mhollem, 'Hea bhurgeak vhor ani mhojê khatir taka dud di ani tuji mozuri hanv tuka ditolim.' Oxem tê bailen bhurgeak vhelo ani tacho poramos kelo.
10. To bhurgo vaddtôch tinnem taka Faraohchê dhuvê-xim haddlo ani hinnem taka aploch put zallê porim vagoilo. 'Moizes' mhonn tinnem taka nanv dilem, kiteak tinnem mhollem, 'Hanvem taka udkantlo voir kaddla.'
11. Tedna vaddon vhoddlo zatôch, Moizes êk dis aplea bhavam-bhoinnink bhett korunk gelo ani kitlem zodd tanchem jivit tem tannem pollelem. Ani êk Ejiptkar eka Hebrevak, apleach lokantlea ekleak, martalo to tannem dekhlo.
12. Ievtten-tevtten nodor marun konn na mhonn polleun tea Ejiptkarak tannem jivexim marlo ani renvent lipoilo.
13. Dusrea disa to porot ailo ani dog Hebrev zhogoddtale tem tannem pollelem. Guneanv asloleak tannem mhollem, 'Tujea sangatiak marun tum kitem korunk sôdtai?'
14. Tannem taka portipall kelo, 'Amchê voir tuka fuddari ani nitidar konnem nemla? Ejiptkarak marloi toso tum mhaka-i jivexim marunk sôdtai?' Moizes bhielo ani apnnach bhitôr tannem mhollem, 'Hanvem kel'li ti vost soglleanchea kanar poddli.'
15. Faraohn hi khobor aikoli tedna to Moizesak marunk sôdtalo, punn Moizes Faraoh sorxilo pôllun vochun Midianachea desant vosti korunk laglo ani ekê bãichê-xim vochun boslo.
16. Midianachea iadnikak sat dhuvô asleô. Teô thoim aileô ani udok ôddunk lagleô. Aplea bapaichea hindda khatir, tãnnim udkachim aidonam bhôrlim.
17. Punn kãi rakhnne thoim aile ani tankam dhanvddaileô. Hea vellar Moizes tanchea adarak ailo, ani tanchea hinddank udok kaddun ghalem.
18. Teô ghora aileô tedna, Reuel tanchea bapain vicharlem, 'Aiz tumi itlê vegim koxim ghora pavlim?'
19. Tãnnim mhollem, 'Eka Ejiptkaran amkam rakhnneanchea hatantlim soddoilim; ani amchea hinddak tannem bãichem udok kaddun-ui dilem.'
20. Bapain aplea dhuvank vicharlem, 'To atam khoim asa? Ani taka tumi thoinch kiteak sanddlo? Cholat, ani taka hanga amchea bori jevnnak apoun haddat.'
21. Tôr Moizes tanger ravlo, ani Jethron apli dhuv Moizesak potin korun dili, Zippora tichem nanv,
22. Tinnem eka putak zolm dilo, ani Gershom mhonn nanv dilem. Moizesan apnnach bhitôr mhollem, 'Hea ganvant hanv pordexi.'
23. Thoddim vorsam uprant, Ejiptacho patxai melo, Israel-porza gulamponnan rudon kortali, ani Devak ulo martali ani gulamponnant thaun marlolo tancho ulo, Deva fuddeant pavlo
24. Devan tanchem rudon aikolem ani Abrahamak, Izakak, ani Jakobak kelolê bhasavnnecho taka ugddas zalo.
25. Israel-porjen bhôglolem dukh-gulamponn Devan monant ghetlem.
