1. Mhoje iadnik koxem tankam sonvskarunk tunvem hi rit samballunk zai: Êk paddkulo ani don khot-naslole menddre ghe;
2. toxench khomir ghalinastana, thodde undde bhaz, thodde khomir naslole undde telan misllun kôr, ani tel laun borea tea gonvachea pittacheô patoll biskuti kôr.
3. Heô vostu eka panttlean ghal ani boila ani don menndream borabor teô mhaka bhettoi.
4. Aaronak ani tachea putank mhojea Bhiradd-Tombu-xim hadd ani thoim riti pormannem tankam nhannoi.
5. Magir, Aaronak iadnikachim vostram nhesoi: efodachi kobai, efod, hodd'ddeachi-pati, ani tachea komorak efodacho potto.
6. Magir tachê tokler muddaso ghal, ani tacher povitr sonvskarnnechi khunna ghal.
7. Magir makhnnechem tel ghevun tem tachê tokler votoi, ani tantun taka makh.
8. Tea uprant tachea putank hadd, ani tankam khomsam nhesoi;
9. tanchea komorak potte band ani matheak topiô ghal. Hea Nirontor hukuma vorvim te iadnik zatole. Aaronak ani tachea putank iadnikachi makhnni ditoloi.
10. Mhojea Bhiraddachea Tombu-xim paddeak hadd, ani Aaronak ani tachea putank tachê tokler hat dovrunk lai.
11. Thoim, Sorvesporachea BhiraddaTombuchea dara-xim tea paddeak kapun jivexim mar.
12. Tea uprant, tachem ilem rogot ghe ani tujea bottan tem vedichea xingank lai. Uprant sogllem rogot vedichê tollak votoi.
13. Magir, pottantlea antkoddeanchi chorob kadd, figdachê chorbecho boro kuddko, ani sogllê chorbê-soit donui mutpariô gheun, hem sogllem vedir hulpai.
14. Punn paddkuleachem mas, tachi chambddi ani tachea pottantlea khainant te bhag moidana bhair vhorun tem sogllem patkanchea farikponna khatir hulpai.
15. Tea uprant, eka bokddeak ghe, ani Aaronak ani tachea putank tachê tokler hat dovrunk lai.
16. Magir taka kapun jivexim mar ani tachem rogot vedichê sorvbhonvtim xinvrai.
17. Uprant tache kuddke kôr; antkoddi ani patthle paim dhu, ani hem sogllem toklê ani bakichea masachea kuddkeam voir dovor.
18. Magir ak'kho menddro vedicher hulpai, hem hulpailolem bolidan Sorvesporak bhettoil'lem, hea hulpailolea jevnnachê bhettecho pormôll Sorvesporak avoddtolo.
19. Uprant dusro menddro ghe ani Aaronak ani tachea putank tachê tokler hat dovrunk lai.
20. Magir taka kapun jivexim mar, ani tachem ilem rogot ghe ani Aaronachea ani tachea putanchea uzvea kanpalleank lai, toxench, uzvea hatachea ani uzvea pãianchea akonddeank lai. Urlolem sogllem rogot vedichê sorvbhonvtim votoi.
21. Vedicher asa tantlem ilem rogot ani thoddem makhnnechem tel ghe ani Aaronacher ani tachea vostrancher, toxench, tachea putancher ani tanchea vostrancher tacho xinvôr mar. To ani tachim vostram, toxench tache put ani tanchim vostram, hê porim, mhaka sonvskarlolim zatolim.
22. Ho makhnnecho menddro aslolean, tachê chorbeche-bhag, tachi xempddi, pottantlea antkoddeanchi chorob, figdachê chorbecho boro kuddko, chorbê-soit donui mutpariô, ani uzvem zhangodd katrun kadd.
23. Toxench Sorvespora fuddeant khomir naslolea unddeachea panttleantlo ek-ek jin'sacho unddo ghe: êk bextto unddo telan kel'lo, êk biskut.
24. Ani hem sogllem Aaronachea ani tachea putanchea hatamnim ghal, uprant tanchea hatantlem gheun, Sorvespora mukhar bhettoi.
25. Tanchea hatantlem porot gheun, hulpailolê bhettê voir vedicher tancho hom' kôr. Hea hulpailolea jevnnachê bhettecho pormôll Sorvesporak avoddta.
26. Hea Aaronachê makhnnechea menddreacho hodd'ddeacho bhag ghe, ani to gheun Sorvespora mukhar bhettoi.
27. Ani ho menddreacho hodd'ddeacho bhag ani uzvem zhangodd, Sorvesporak tanchi ek kherit bhett kelea uprant, Aaronak ani tachea putank mellpacho hok'khacho vantto to.
28. Ani oxench hanv sodankal tharavun dovortam, ki, porza xanticheô bhettô korta tedna, zonavorachea hodd'ddeacho bhag ani tachem zhangodd Aaronak ani tachea putank urtolem. Ho vantto Sorvesporak kuxin kaddun dovorlolo.
29. Aaron melea uprant, tachim povitr vostram tachea putanchea tabeant korchim; tanchê makhnnek tãnnim tim vapurchim.
30. Aaronachea zagear iadnik koso ieta to tacho put, mhojea Bhiradd-Tombunt, Povitr Sthanant mhoji seva korunk ieta tedna, tannem tim vostram sat dis porian ghalchim.
31. Aaronachê ani tachea putanchê makhnnek vapurlolo menddro gheuncho, ani tachem mas eka povitr zagear randchem.
32. Panttleant urleat tea unddeam borabor, Mhojea Bhiradd-Tombuchea darar tannim tea menddreachem mas khaunchem.
33. Makhnnechê ani sonvskarnnechê ritint farikponna khatir bhettoilam tem tãnnim khaunchem. Tanchê bhair anink konnachean tem khaum nozo, kiteak tem povitr.
34. Makhnnechea bolidanachem mas vô undde dusrê sokallink urlear, tem sogllem hulpaunchem; tem anink khaunchem nhoi, kiteak tem povitr.
35. Aaronak ani tachea putank, hanvem sogllem formailam tê porim tum kortoloi. Makhnnechi rit pallunk tuka sat dis lagtole.
36. Disachea disa, patkanchea farikponnak êk paddkulo bhettounk zai. Vedi nitoll korchê khatir patkanchea farikponnak êk bhett kôr. Magir, ti povitr korchê khatir, povitr telan tika makh.
37. Sat dis porian vedi khatir farikponnachi bhett kôr ani uprant tichi sonvskarnni kôr. Magir ti vedi bhov povitr zatoli, ani kitench tê vedik tenkta tem povitr zatolem.'
38. Sodankal, disachea disa, eka vorsache don menddre vedicher bhettoi.
39. Tantlo êk sokallim bhettoi, ani dusro sanjê.
40. Poilea menddrea sangata, don rat boreantlea gonvanchea pittant êk xer purnn zoitunachem tel misôll kôr. Êk xer soro te bhettent votoi.
41. Dusro menddro sanjê bhettoi, ani titlench pitt, zoitunachem tel ani soro. Hi Sorvesporak, êk ujeachi bhett zaun astoli, ani ticho pormôll mhaka man'tolo.
42. Neamitponnim, mhojea Bhiradd-Tombuchea dara mukhar hi bhett korunk sogllea tumchea fuddlea pillgank zai. Hea zagear Hanv Mhojê porjek bhett ditolom ani tumchê kodde uloitolom.
43. Uprant Mhojê Mhoimen povitr kel'lea zagear Hanv Israel-porjek bhettoitolom.
44. Tombu ani vedi hanv povitr kortolom, ani Aaronak ani tachea putank sonvskarun, iadnik koxe mhojê sevek laitolom.
45. Hanv Israel-porjê modem jietolom, ani ticho Dev zatolom.
46. Ani Hanv Sorvespor tancho Dev mhonn tim vollkhotolim. Tanchea sangata jieunchê khatir, Hanvem tankam Ejiptantlim bhair kaddun haddleant: Hanv To, Sorvespor tancho Dev.
