1. Babhul lankddachi êk vedi kôr. Ti sarkich choukon zaunchi: panch hat lamb ani panch hat rund, ani tin hat unch.
2. Voilean charui konxeank xingam kôr, ani heô vedi borabor ekuch nog zaum-di, ani sogllem pitullchê patien dhampunk zai.
3. Chorbecho gobor ghalunk aidonam kôr; tech porim, khorim, udok xinvraunk tostam, ganch ani ujeak kaili. Hem sogllem vedichem samonn pitullchem zaunk zai.
4. Pitullchi êk tatti-i kôr, ani charui konxeank pitullcheô char mudiô lai.
5. Vedichê ordê unchaiek pavta tê porim vedichê degê sokla hi tatti dovor.
6. Ukhlun vhorpak, babhulchea lankddache dandde kôr ani tankam pitullchi pati mar,
7. ani vedichea donui bhazumnim tea mudiamnim ghalun dovor.
8. Vedi soglli patôll follieanchi zaunk zai, bhitorlean soglli pokôll; hanvem tuka dongrar nomuno dakhoila tea pormannem tum kortoloi.'
9. Mhojea Bhiraddachea Tombuk barik sonni lugttachea podd'ddeanchem êk oddop kôr. Dokhinnechê vatten pon'nas var lamb,
10. vis pitullchea khambeancher tem sôddun, ani dôr eka khambeak ek pitullchem pedd dovrun, ani danddiô ani ganch soglle rupeache.
11. Ut'torichê vatten tech porim.
12. Ostomtechê vatten, toslech podd'dde, ponchvis varanchê lambaiek dha khambeancher tharailole, ani eka-eka khambeak ek-ek pedd.
13. Udentechê vatten, vô bhitôr sortat tennem, ponchvis varanchê lambaiek te podd'dde hê porim ghalche:
14. Donui kuxink, sadde-sat sadde-sat var rund podd'dde, tin-tin khambeancher sôddlole, ani dor khambeak ek-ek pedd.
16. Darachê rundaiek, dha varancho ek podd'ddo: ho barik lonv-dhageacho, nillea, zambllea ani tambddea rongancho ani bordad korun boro nettoilolo. Ani ho char khambeam-boskancher ubarlolo.
17. Sogllê bhonvtim, he khambe rupeachea danddiam vorvim eka-mekak ghott dhôrtole, ani podd'ddeanche soglle ganch toxech soglle rupeache.
18. Hem oddop ponnas var lamb, ponchvis var rund, ani oddez var unch.
19. Podd'ddeanchem lugott sonni-sutachem, ani khambeanchim peddam sogllim pitullchim. Mattva-Tombuk ani oddpak khilliô soglleô pitullcheô.
20. Divlek borem tem xud'dh zoitunanchem tel haddunk porjek formai, hê porim ti divli sodanch pettloli astoli.
21. Aaron ani tache put, mhojea Bhiradd-Tombunt, Korarachi Arkpett asa tea podd'ddea bhair, toiar korun dovortole. Thoim, Sorvespora fuddeant, hi divli sanjê thaun sokallim porian zollti asunk zai. Ho hukum' nirontor Israel-porjen ani tichea sogllea pillgamnim pallunk zai.
