1. Sorvesporan Moizesak mhollem, 'Tunvem Ejiptantli bhair kaddun haddleai tê porjek gheun, hanvem Abranvak, Izaakak, ani Jakobak ani hanche sonstik diunk bhasaila tea ganvant vochunk hangasorlo bhair sor.
2. Tumchê mukhar Mhojea dutak Hanv dhaddtolom ani Kanaanitank, toxench Hittitank, Perizitank, Hivitank, ani Jebuzitank, soglleank thoinchim dhanvddaitolom.
3. Dud ani mhonv vhanvta tea ganvant bhitôr sorat. Punn Hanv tumchea sangata vechona, kiteak tumi apleach vadeachi porza, ani Hanv tumchea sangata ason zalear, tumcho hanv sarkoch bhosm korin.'
4. Him darunn utram aikun, porjen dukh suru kelem ani bhangar-xingar ghalchem tinnem sôddlem.
5. Tedna Sorvesporan Moizesak mhollem: 'Israel porjek oxem sang "Tumchoch vad choloitat tosli porza tumi. Ekuch ghoddi Hanv tumchea sangata ason zalear, ghoddiê Hanv tumcho bhosm korin. Atam tumchem bhangar-xingar kaddun kuxin dovrat, ani tumkam kitem korchem tem hanv ievjitolom.' "
6. Mhonnttôch, tim Horeb Dongra-sorxilim bhair sorona fuddem tãnnim aplem bhangar-xingar ghalchem sôddlem.
7. Moizes aplo Tombu pennea bhair kaddun vhoro ani pennea thaun matso pois ubo kori. Taka tannem Zomaticho Tombu mhonn nanv dovorlem. Konnak tôr Sorvespora lagim kitem vicharpachem aslem, tannem pennea bhair tea Zomatichea Tombu-xim vochunk zai aslem.
8. Moizes tea Tombunt vochunk bhair sortalo tedna, soglli porza ubi ravtali ani to Tombunt vocho porian dôr-eklo monis ap-aplea tombuchea darar ravun Moizesak polletalo.
9. Moizes Tombunt bhitôr sortôch, kupacho khambo denvtalo ani Tombuchea dara-xim ravtalo, ani Sorvespor Moizesa kodde uloitalo.
10. Darar tharlolo khambo pollelea uprant, sogllo lôk ubo ravtalo ani ap-aplea tombuchea darar ravun sorpott'talo.
11. Êk monis aplea ixtta kodde uloita toso Sorvespor Moizesa kodde tondda-tonddim uloitalo. Moizes penneant portun vetalo tedna, tacho sevôk Joshua, êk tarunn monis, Nunacho put, Tombu sôddun pois soronaslo.
12. Moizesan Sorvesporak mhollem, 'Polle, Tum mhaka mhonntai: "Hê porjek fuddem vhor punn mhojea sangata konnak dhaddtoloi tem Tunvem mhaka sangunk na. Mhaka tum nanvan boro vollkhotai, ani hanv tuka man'lam oxem Tunvem mhollaim.
13. Hanv tor Tuka khorench man'lam, atam tujeô vattô mhaka dakhoi, hê porim hanv tujem mon somzotolom ani hanv manovlam tosoch tuka manum. Hem raxttr tuji khaxeli porza mhonn hem-i bi monant dhôr.'
14. Sorvesporan, tedna, mhollem, 'Hanvuch tujea sangata vetolom ani tuka visôv ditolom.'
15. Moizesan zobab dilo, 'Tunch amchea sangata vechona zalear, amkam hangachim bhair kaddum naka.
16. Tum amchea sangata vechona zalear tuji porza ani hanv-ui tuka mandleanv vô na hem amkam koxem kolltolem? Punn tum amchê modem asun, hê khunnê vorvim sonvsarantlea sorv heram porzam ani amchê modem ontor zatoli.'
17. Tedna Sorvesporan Moizesak mhollem, 'Tunvem maglam toxench hanv kortolom, kiteak hanv tuka nanvan boro vollkhotam, ani tum mhaka man'lai.'
18. Tedna Moizesan maglem, 'Upkar korun, tuji mhoima mhaka dakhoi.'
19. Sorvesporan mhollem: 'Mhoji soglli dulobai tujea fuddeantlean vetoli, ani tujê mukhar 'Sorvespor' hem mhojem nanv uchartolom; ani zankam hanv vinchun kaddtam tanchê sovem mhoji opurbai-kaklut dakhoitam.
20. Punn mhojem tondd tum polleunchona, kiteak mhaka pollelea uprant konnuch monis jivo urum nozo.
21. Tedna Sorvesporan mhollem, 'Hanv hanga asam thoim êk zago asa.
22. Tum khoddpar ubo ravtoloi ani Mhoji Mhoima tevxilean veta tedna, Hanv tuka hea khoddpachê khanchint ghaltolom, ani Hanv ieun vochosor, Mhojea hatan Hanv tuka dhampun dovortolom.
23. Magir mhozo hat kaddlea uprant, tum mhoji patth dekhtoloi, punn mhojem tondd tuka dischem na'
