1. Uprant Moizes ani Aaron Faraoh-xim gele ani taka mhollem, 'Sorvespor, Israelacho Dev oxem mhonntta, "Mhojea manak êk porob somarombhunk mhojê porjek oronneant vochum-di."'
2. Punn Faraohn mhollem, 'konn ho Sorvespor, Tachem utor hanvem aikunk, ani Israel-porjek suttka diunk? Hea Sorvesporak hanv vollkhona, ani Israelak hanv suttka diunchona.'
3. Tedna tãnnim zobab dilo, 'Hebrevanchea Devan amkam dorxon dilam: Oronneant vochun Sorvesporak amchea Devak bhett korunk amkam tin disanchi rojea di. Na zalear, to amkam pidden vô loddaien marun uddoitolo.'
4. Punn Ejiptachea Patxaian tankam mhollem, 'Tumi hê porim porjek tanchea vavra sorxili pois kiteak kaddtat? Tumchea vavrak lagat!'
5. Faraoh fuddem uloilo, 'Atam desant porza itli vaddlea ani tori tãnnim vavr bond kelolo tumkam zai?'
6. Teach disa Faraohn mukdomank ani dekhrekh korpiank oxem formailem,
7. Vitte korunk, poilim bhaxen tankam korodd diunchem atam bond korat. Tankanch tem sôdun haddum-di.
8. Punn tumi tanchê koddche, adim te ditale titlech vitt êk unno korinastana, ghevunk zai. Te allsaien aplo vêll sartat, dekhun Devak bhett korunk vochunk te aroddtat!
9. Odikuch nettan tankam vavrak laiat, tanchem mon vavracher asum-di, ani tankam magir teô khotteô gozali aikunk vêll mellchona.'
10. Te mukdom ani dekhrekh korpi porjê-xim gele ani tankam sanglem: 'Faraoh oxem mhonntta, "Hea fuddem tumkam korodd aitem mellchem na.
11. Tuminch tem sôdun haddchem; khoinchem-i tem haddat, punn adlea-itlech vitt tumi korun diunk zai.'
12. Tedna, porza, tem korodd sôdun haddchê khatir akkhea Ejiptak bhonvunk poddli.
13. Mukdom tankam mhonnttale, 'Adim korodd melltalem têch bhaxen, taktiken tumcho vavr sompoiat.
14. Faraohchea mukdomamnim, Israelachea lokanchi dekhrekh korpeank boddoun mhollem, 'Adlê porim tumi kiteak tanche koddche vitt korun ghenant?'
15. Israelache dekhrekh korpi Faraoh-xim aile ani roddun vicharlem, 'amkam kiteak oxe tras ditat?
16. Vitt korunk amkam korodd dinant,ani tori-i te mhonnttat: "Vitt korat. Polle, koxe te amkam mar ghaltat, tujech porjek tum onit kortai."
17. Tannem mhollem, 'Tumi allxi, dekhun Devak bhett korunk vochunk tumi rojea magtat.
18. Cholat, vavrak lagat! Tumkam korodd ami diunche nanv, punn adlech porim vitt tumi korun diunk zai.'
19. Ho zobab aikun Israelache dekhrekh polleupi ghaborle, ani kitem korchem tem tankam somzonaslem.
20. Te Faraoh sorxile bhair sorun vetana, tankam Moizes ani Aaron mellle; he tankam ravtale.
21. Tãnnim tankam mhollem, 'Tumi kitem kelam tem Sorvesporan pollelam. Toch tumchi nit korum. Faraoh ani tachea opxalam mukhar, tumi amkam khala ghaleat ani amkam marunk, tanchea hatant tumi tolvar dilea.'
22. Tedna Moizesan Sorvesporak ulo marlo, ani mhollem, 'Sorvespora, kitea pasot tujê porjek oxe tras ditai? Mhaka tunvem hanga kiteak tori dhaddlo?
23. Hanv patxaia mukhar geloleak, tannem porjek odikuch tras dile. Ani tanchi suttka korunk tunvem kãich korunk naim!'
