1. Sorvesporan Moizesak mhollem,
2. Polle, Judachê kulliechea Bezalelak hanvem vinchun kaddla -to Uricho put ani Huracho natu,
3. ani taka mhojea deivik-atmean bhôrla. Sogllê torechea kolechea vavrak hanvem taka bori somjikai, hikmot ani takot dileant.
4. Bhangaracho, rupeacho ani pitullicho vavr korunk to jin'sacheô ievzonneô kaddtolo.
5. Mannkam-fator katorta, ani tim bosoita; lankddacho vavr kantoita; kitem mhonn na, sogllo vavr to korta.
6. Oholiab, Dan-hachê kulliecho ani Ahisamakacho put, haka-i heram mestam sangata vavr korunk hanvem vinchun kaddla, ani hanvem formailam toxem ani titlem-i te kortolet:
7. mhozo Bhiradd-Tombu, Korarachi Arkpett ani tichem dhampnnem, Tombuchem sogllem samonn-srungar,
8. mez ani tachem samonn, xud'dh divea-sthan ani tachem samonn, dhumpachi vedi,
9. hôm'-bhettechi vedi ani tichem samonn, tost ani tachem pedd, sevadhormik vostram,
10. Aaronachim iadniki povitr vostram ani tachea putanchim vostram, tanchê iadniki sevek,
11. makhnnechem tel, ani povitr sthanak pormôllit dhump. Hanvem tankam formailam toxench te sogllem kortolet.'
12. Sorvesporan Moizesak mhollem: 'Israel porjê lagim uloi ani sang: Favo - tê porim mhoje son'var samballat.'
13. Son'var, mhojea visovacho dis samballat, kiteak Sorv tumchea fuddlea pillgank Mhojê ani tumchê bhitôr ti êk khunna zaun astoli. Hanvem Sorvesporan, tumkam povitr keleant mhonn tumkam kollit zatolem.
14. Tôr tumi Son'var pallunk zai ani to povitr tumi mancho. Ho dis boxttaita tacho jiv kaddcho. Tea disa konn-ui vavr korit, to mhojê porjê bhair poddtolo.
15. Tumcho vavr korunk tumkam sôv dis asat, punn satvo dis Sorvesporak bhettoilolo dis, punn visovacho dis. Konn-ui Son'vara disa vavr korta tacho jiv kaddcho.
16. Israel-porjen, korarachi êk khunna koxi, ho dis pallunk zai.
17. Israel-porjê ani mhojê modem hi sodankal êk khunna zaun astoli, kiteak Sorvesporan, sôv disam modem sorg ani sonvsar rochleant, ani satvea disa tannem visôv ghetla ani xitoll zala.'
18. Sinai Dongrar Sorvesporan Moizesak sogllem sangun somptôch, Tannem taka Koraracheô teô don fatri dileô, hancher khud Devan updes boroun dovorlole.
