1. Sorvesporan Moizesak uloun mhollem,
2. Poilea mhoineachea poilea disa, Sorvesporacho, Bhiradd-Tombu, Zomaticho-Tombu ubharun ghe.
3. Tantunt Korarachi Arkpett dovor, ani Arkpettê mukhar podd'ddo lai.
4. Uprant tum mez hadd ani tacher kitem manddunk zai tem mandd. Tea uprant divea-sthan, ani tacheô divleô lai.
5. Dhump hulpauncheak, bhangarachi vedi Korarachê Arkpettê mukhar haddun dovor; ani Bhiradd-Tombuchea darak to podd'ddo lai.
6. Hea podd'ddea mukhar hom'-bhettechi vedi dovor.
7. Zomatichea-Tombu ani vedi modem tem tost dovor ani tem udkan bhôr.
8. Bhonvtonnichem oddop ghal, ani hachea darak podd'ddo lai.
9. Magir, makhnnechea telan Bhiradd-Tombu ani tachê bhitor asa titlem-i makh ani tem povitr zatolem.
10. Uprant, hom'-bhettechi vedi ani tachem sogllem saman makh, ani vedichi sonvskarnni kôr; ani vedi bhov povitr zatoli.
11. Tech porim, tost ani tachem pedd makh ani sonvskar.
12. Aaronak ani tachea putank Tombuchea darar hadd, ani tannim sarki xud'dhi korum-di.
13. Aaronak tachea povitr vostramnim nhesoi, taka telan makh ani hê porim, tannem mhoji seva korunk, taka iadnik koso sonvskar.
14. Uprant tachea putank hadd ani tankam vostramnim nhesoi.
15. Uprant, tankam telan makh, tanchea bapaik kel'lem tê porim tankam-i mhojê sevek sonvskar. Hê porim tanchi makhnni tanchea fuddlea pillgam khatir tankam sasnnachea sasnnak iadnik kortoli.'
16. Sorvesporan sanglolem toxem Moizesan kelem.
17. Dusrea vorsa poilea mhoineachê poiler Bhiradd-Tombuchi ubarnni zali.
18. Moizesan Bhiradd-Tombu ubarlo, meddink nemam marlim, meddi nemleô, pattiô zagear ghaleô, khambe ube kele.
19. Sorvesporan sanglolem toxem, Moizesan Bhiradd-Tombuchê voilean anek tombu tannlo ani tombu eka avoronnan pangurlo.
20. Magir tannem Koraracheô fatri ghetleô ani Arkpettent dovorleô. Ani Arkpettek dandde laun, tichê voir kaklutichem xinvason dovorlem.
21. Tannem Arkpett haddun Bhiradd Tombunt dovorli ani tichê mukhar êk podd'ddo ôddlo ani hê bhaxen Korarachi arkpett dhampli. Hem sogott Sorvesporan Moizesak sanglolem toxem zalem.
22. Hea podd'ddea bhair, Zomatichê-Tombunt, ut'torichê vatten mez dovorlem ani Moizesak Sorvesporan formailolem toxem,
23. tacher Sorvespora mukhar bhettoilole undde dovorle.
24. Zomatichê-Tombuchê dokhinnechê vatten, vô mezachê dusrê bazun, tannem divea-sthan dovorlem,
25. ani Moizesak Sorvesporan formailolem tea pormonnem, tannem divleô pettoileô.
26. Podd'ddea mukhar, Zomatichea-Tombunt bhangarachi vedi dovorli,
27. ani Moizesak Sorvesporan sanglolê porim tacher pormôllit dhump hulpailo.
28. Zomatichea-Tombuchea darar podd'ddo lailo,
29. ani hea podd'ddea mukhar hom'-bhettechi vedi dovorli. Ticher Moizesak Sorvesporan formailolê porim, tannem ek hom' ani orov-danno bhettoilo.
30. Zomatichea-Tombu ani vedi modem tost dovorlem ani tantunt hat-paim dhuvunk udok ghalem.
31. Moizes, Aaron ani tache put thoim Zomatichea-Tombunt bhitôr sortale tedna vô vedi-xim vetale titlêi pavtti
32. Moizesak Sorvesporan formailolem tea pormannem, aple hat ani paim dhutale.
33. Moizesan Bhiradd-Tombuchê bhonvtim, oddop ubarlem, vedi dovorli, ani oddpachea darak podd'ddo lailo. Hê porim Moizesan sogllo vavr sompoilo.
34. Kupan Zomaticho-Tombu dhamplo ani Sorvesporachê mhoimen Bhiradd-Tombu bhoron ailo.
35. Moizesak Zomatichea Tombunt bhitôr sorunk zainaslem, kiteak kup tacher ravtalem ani Bhiradd-Tombu Sorvesporachê mhoimen bhòrlolo.
36. Sogllea tanchea poinnant tem kup Bhiradd-Tombu voilem choddun voir sortalem tedna, Israelacheô put-dhuvô fuddem cholunk lagtaleô.
37. Kup voir choddonaslem zalear tim thambtalim, ani tem voir choddun vocho-sôr vattek lagonaslim.
38. Disachem Sorvesporachem kup Bhiradd-Tombu voir ravtalem ani ratcho ak'khea Israelachea ghoranneachea dolleam mukhar tea kupant uzo zhogzhoktalo. Ani sogllea tanchea poinnant sodam toxench ghòddtalem.
