1. Ejiptachea desantlim bhair sortôch tin mhoinea uprant tea disa Israelacheô put-dhuvô Sinai dongrar pavleô.
2. Refidima thaun tim bhair sorlim; Sinaichea oronneant pavtôch thoim tãnnim aple tombu tannle; dongrak fuddo korun Israelan aple tombu ubarle.
3. Uprant Moizes voir Deva-xim gelo ani Sorvesporan taka dongrar thaun apoun mhollem, 'Jakobachea ghoranneak, Israelachea bhurgeank, hem kolloi:
4. Ejiptkarank Hanvem kitem kelem, koxê bhaxen ghonnichea pakhotteancher Hanvem tumkam vhelim ani Mhojê-xim haddlim, tem tuminch pollelam.
5. Atam tumi zanno zaiat ki Mhozo tallo aikoxat ani Mhozo korar samballxat zalear, sogllea porzam modem tumi Mhoji khaxa porza zatoleat, karonn soglli prithum' Mhoji.
6. Tumi iadniki rajkull ani Mhaka sonvskarlolem raxttr zatoleat. Him utram tunvem Israelachea bhurgeank kollounk zai.'
7. Mhonnttôch Moizes gelo ani porjechea zannteank ektthaim korun, Sorvesporan taka formailolem tem sogllem tanchea dolleam mukhar dovorlem.
8. Tedna sogllê porjen ekach tallean mhollem, 'Sorvesporan sanglam titlem-i ami palltoleanv.' Porjen mhollem titlem-i Moizesan Sorvesporak kollit kelem.
9. Uprant Sorvesporan Moizesak sanglem, 'Polle, tujê lagim Hanv uloitam tedna porjen aikunchê khatir ani sodanch tujer visvas dovorchê khatir, eka dhatt kupachea rupan Hanv tuka dixtti poddtolom.' Ani Moizesan porjecho zobab Sorvesporak kolloilo.
10. Sorvesporan Moizesak sanglem, 'Porjê-xim voch ani aiz ani faleam toiar ravat mhonn porjek sang. Aplim angvostram ba dhuun,
11. tisrea disa tankam toiar zaum-di; kiteak tisrea disa sogllê porjechea dolleam mukhar Sorvespor Sinai dongrar denvun ietolo.'
12. Dongra sorvbhonvtim porjek ek xim'mer koxi ghal, ani tika oxem sang, 'Chotrai dhôrat, dongrar choddum nakat vô tachê degê-xim porian vechem nhoi. Konnui dongrar aplo paim dovrit tacho jiv kaddcho;
13. Konnench taka hat launcho nhoi, taka fatrauncho vô bhale sôddun taka marcho. Hem mon'xank toxem zonavorank lagu zata; tim jivim urchim na. Korno lamb vaztoch, tannim dongrar choddchem.
14. Uprant Moizes dongravelo sokla denvlo, ani tannem porjek sonvskarli. Tannim aplim vostram dhulim.
15. Uprant Moizesan porjek sanglem, 'Porvanchea disak tumi toiar zaiat; tumi lingi-ekvott korunk ekê ostorê sorxim vochum naka.
16. Tisrea disa, dis udeunchea vellar, ghôddghôdd ani zhoglannim marlim ani dongracher ek dhatt kup dixtti poddlem, ani vhoddlea avazan êk turturi vazli, ani pennem korun tombumnim asli ti soglli porza bhieun kampli.
17. Tedna Moizesan porjek Sorvesporak mellunk tombuntli bhair kaddun vheli. Tim dongrachea pãia-xim ubim ravlim.
18. Sinai dongôr sogllo dhunvran bhòrlo, kiteak Sorvespor tacher ujeachea rupan denvlolo. Eka agtteantlea dhunvra porim to dhunvôr voir choddtalo, ani sogllo dongôr boroch kamplo.
19. Turturecho avaz chôdd-chôdd zait gelo. Moizes uloitalo ani ghoddghoddea udexim Sorvespor taka zobab ditalo.
20. Sorvespor Sinai dongrar denvlo ani dongrachê tenkxer ravlo; ani Tannem Moizesak dongrachê tenkxer apoilo
21. ani Moizes voir gelo. Ani Sorvesporan taka mhollem, 'Sokol voch, ani tharailolê ximê-fuddem sorona zaunk ani Sorvesporacher nodor dovrina zaunk porjek xiddkai; na tôr, tanchê modlim zaitim mortolim.
22. Iadnik legun mhojê-xim lagim sortat tãnnim apli xud'dhi korunk favo, na tôr Sorvespor okosmat tankam khast laitolo.'
23. Moizesan Sorvesporak mhollem, 'Porjechean Sinai Dongrar ieunk zaina, kiteak ho dongor povitr ani hea pasot tachê sorvbhonvtim xim-mer ghalunk tunvench formailãi.'
24. Sorvesporan zobab dilo, 'Chol, sokla voch, ani Aaronak tujê borabor ghevun ie. Punn iadnikamnim ani porjen, Sorvesporak ieun polleunk, ximê-bhair sorchem nhoi, na tôr To okosmat tankam khast laitolo.'
25. Moizes porjê-xim sokla denvlo, ani tanchê lagim uloilo...
