1. Tea disamnim Dev hem sogllem uloilo. Tannem mhollem,
2. Hanv Sorvespor tumcho Dev. Hanvench tumkam Ejipt desantlim, gulamponnachea biraddantlim, bhair kaddlim.
3. Mhojê bhair tumkam anink dev asche nant.
4. Murti ghôddum nakat, vô mollbar vô sokla prithumêcher vô prithumê-pondlea udkamnim asat tea kosleach vostuncheô murti korum nakat.
5. Ani tanchê mukhar saxttangim poddun tankam bhôzum nakat. Kiteak Hanv, Sorvespor, premaxecho Dev ani Mhozo dvês kortoleam sombondim bapaichea guneanvank favo ti bhurgeank, natvank, ani ponnttuank khast laitam;
6. punn Mhozo môg kortoleank ani Mhojeô adnia samballtoleank map nasloli kaklut dakhoitam.
7. Sorvespora tumchea Devachem Nanv sabsubem gheum nakat, kiteak Aplem Nanv sabsubem gheta tea monxak Sorvespor Dev khast lainastana ravcho na.
8. Son'varacho ugddas dhôrat ani to Devak bhettoun samballat.
9. Sô dis tumi ghas gheiat ani vavr korat,
10. punn Satvo Dis Sorvespora tumchea Devak bhettoilolo Son'var zauncho. Tea disa tumi kosloch vavr korcho nhoi, tumi, tumchea putam-dhuvamnim, tumchea chakramnim ani chakornnimnim, vô tumchea zonavoramnim ani tumchea ghorant biradd ghetlolea videxiamnim.
11. Karonn sô disam bhitôr Sorvesporan rochla sôrg ani sonvsar ani doria ani tantum asa titlem-i, punn Satvea Disa Tannem visôv ghetlo, heach khatir Sorvesporan Son'varacher axirvad ghala ani to povitr korun dovorla.
12. Sorvespora tumchea Devan tumkam dil'lea desant lamb auk tumi bhôgcheak, tumchea avoi-bapaik man diat.
13. Jivexim marum nakat.
14. Pordvar korum nakat.
15. Chorum nakat.
16. Tumchea peleacher lottik govai dium nakat.
17. Tumchea peleachea ghorachi axa dhôrum nakat. Tumchea peleachê bailechi vô tachea chakrachi vô chakornichi, vô tachea boilachi vô tachea gaddvachi, vô khoinchêch tachê vostuchi axa dhôrum nakat.'
18. Ghoddghoddo ani zoglavnni polleun, turturecho avaz aikun, ani dhunvortolo dongor polleun, porza tharea kampli ani tim pois-pois ravlim.
19. Tãnnim Moizesak mhollem, 'Tunch amchê kodde uloi ani ami aikotoleanv; punn Devak amchê lagim ulounk dinaka, na zalear ami mortoleanv.'
20. Moizesan zobab dilo, 'Tumi bhieum nakat; To tumchi porikxa korunk aila, Tachi bhem sodanch tumchea monant rigun, patok korunk tumi pavunchim nant.'
21. Punn porza poisuch ravli, fokot Moizes kallea-kitt kupant Dev aslo thoim lagim sorlo.
22. Sorvesporan Moizesak mhollem: 'Israel porjek hem sang: "Hanv, sorgar thaun tumchê kodde koso uloilam tem tumich pollelam.
23. Mhojea bhair, tumi anink konnakuch bhôzunk rupeache vô bhangarache dev korum nakat.
24. "Mhojea nanvak êk matiechi vedi ubarat, ani hom' ani xantiche iodn, tumchim menddram ani gorvam thoim bhettoiat. Khoinchea-i zagear Mhojea Nanvacho ugddas tumi kel'lo Mhaka zai, thoim hanv ietolom ani tumkam axirvad ditolom.
25. Mhojea manak tumi fatrachi vedi bandtat zalear, ti chirlolea fatranchi zaunchi nhoi, kiteak tumi fatrak chirnem-xennem laitat to fator, tumi to boxttaitoleat.
26. Sokol thaun voir panvddeamnim choddpachi vedi mhaka ubarum nakat; kiteak tumi thoim choddtana, tumchi vinglli kudd dixtti poddunk xokta.
