1. Sorvesporan Moizesak uloun mhollem,
2. Mhaka ek dan bhettoiat mhonn Israel-porjek sang. Ani zonn-eklo aplea kallzachê suchovnnê pormannem kitem diunk sôdta tem tum manun ghe.
3. Ani him tanchim dan-dennim tum manun ghetoloi tim: bhangar, rupem, ani pitull-kanxem;
4. nazuk sonni lugott; nillem, zambllem ani tambddem lugott, lonv-sut; bokddeanche kens;
5. menddreachem tambddem chambddem; nazuk chambddem, babhull lankudd;
6. divllek tel; rogddunchea telak ani pormollit dhumpak mosale;
7. ani efod ani horddeachi pati bordad korunk gomed ani torê-torechim thikam-motiam.
8. Porjen mhaka ek povitr sthan ubarunk zai, hê porim hanv tanchê modem jietolom.
9. Hanv tuka nomuno dakhoitolom tea pormannem tum sogllem kortoloi Povitr Tombu ani tachê nettounchê mustaikê vixim.
10. Babhull lankddachi mhaka êk pett kôr: panch vetô lamb, tin vetô rund, ani tin vetô unch.
11. Bhitorlean ani bhailean tika xud'dh bhangaracho forr mar, ani sorvbhonvtim tika bhangarachi deg lai.
12. Bhangaracheô char mudiô kôr, ani pettechea char-ui khurank teô ghott lai mhonngê ekê vatten don mudiô, dusrê vatten don mudiô.
13. Tê pettek khand marunk, babhul lankddacheô don danddiô kôr ani tankam bhangaracho forr mar.
14. Ani heô danddiô mudieantlean ghal.
15. Danddiô mudiank ghal'leôch astoleô, teô anink bhair kaddcheô nhoi.
16. Ani Hanv tuka ditolom teô don fatri hê pettent ghal, tancher dha updes boroilole astole.
17. Purnn bhangarachem ek dhampnnem kôr: panch vetô lamb, ani tin vetô rund.
18. Pakotte asloleô don, pêttlolea bhangaracheô puttleô kôr,
19. ani dhampnneachea donui vattamnim êk-êk dovor. Punn heô puttleô dhampnneak pansun ekuch zaunk zai;
20. teô tonddak tondd korun ghalcheô ani dogainchea vistarlolea pakotteamnim dhampnnem sogllem bhortolem.
21. Dhampnnem Arkpettecher bosounchem ani Hanv ditolom teô fatri arkpettent ghal.
22. Hanv tuka thoim bhett'tolom, ani dhampnnea voir-sun, Arkpetter aslolea don pakotteanchea pranneam modem tujêkodde uloun Israel-porjek soglle mhoje kaide ditolom.
23. Toxench babhull lankddachem ek mez kôr: char vetô lamb, don vetô rund, ani tin vetô unch.
24. Purnn bhangaracho taka forr mar ani sorvbhonvtim taka bhangarachi ek deg lai.
25. Tin polgad rund, tea mezak sorvbhonvtim êk kamb mar ani haka bhangarachi êk deg lai.
26. Mezachea charui khurank bhangaracheô char mudiô kôr ani charui konxeamnim teô ghôtt lai.
27. Heô mudiô, danddiô ghalunk, kambi-xim ghôtt korcheô.
28. Babhull lankddacheô don danddiô kôr ani tankam bhangaracho forr mar: hanchea adharan mez hanga thoim vhortolet.
29. Xud'dh bhangaracheô boxeô, kopam, kanxe ani jogam kôr.
30. Hem mez sodanch Mhojê mukhar dovorchem, ani hea mezar sodanch, mhaka bhettoilole povitr undde tum dovortoloi.
31. Xud'dh bhangarachem êk divea sthan kôr. Tachem pedd anik hambo pêttlolea bhangaracho; tacho fulancho surungar, bhonge ani paklleô pansun ekuch nog zaunk zai.
32. Taka sov fantte astole, tin-tin eka-eka ordan, tin fantte ekê vatten, tin fantte dusrê vatten asche.
33. Eka-eka fantteak fulanche tin surungar asunk zai; ani bodomachea tonvream porim, bhonge ani paklleô.
34. Divea-sthanak char fulanche surungar asunk zai, tech porim bodomachea tonvream sarke tache bhonge ani paklleô.
35. Eka-eka fanttea sokol êk-êk bhongo asunk zai.
36. Bhonge, fantte ani divea-sthan pansun, pettlolea purnn bhangaracho ekuch nôg zauncho.
37. Hea divea-sthanak sat divleô asunk zai, ani tancho uzvadd fuddlean bagoun poddonk zai.
38. Tacheô vattleô ani chimtte xud'dh bhangarache zaunk zai.
39. Divea sthan ani tache sutte bhag korunk talent bhôr xud'dh bhangar ghal.
40. Ani dongrar hanvem tuka dakhoil'lea nomunea pormannem hem sogllem zotnaien kôr.
