1. Sorvesporachea hukumak pallo diun, Israelachea bhurgeancho akho zomo, Sinachea oronneant pennem kel'lem tem sôddun, fuddem vochpak vattek laglo; ani Refidimak tãnnim pennem kelem: thoim lokak pieunk udok naslem.
2. Dekhun tim Moizesacher oxem gunngunnunk laglim, 'Amkam pieunk udok di.' Moizesan tankam zobab dilo, 'Tumi mhojer kiteak gunngunntat? Kiteak mhonn tumi Sorvesporachi porikxa korunk sôdtat?'
3. Punn tanechea vollvolleamnim lôk Moizesacher add uloit aslo.Tãnnim mhollem, 'Kiteak mhonn tunvem amkam Ejiptantlim bhair kaddun haddlim? Ami hanga tanen morcheak, amchea bhurgeam ani gorvam borabor?'
4. Moizesan Sorvesporak ulo marlo. Tannem mhollem, 'Hea lokak hanvem kitem korchem? Anink matxe ravleanv zalear, tim mhaka fatraunk lagtolim!'
5. Sorvesporan Moizesak mhollem, 'Israelachea thoddea zannteank gheun loka mukhar chol, nodik marloloi to danddo hatan dhôrun voch.
6. Thoim, Horebak pavtôch, Hanv tumchê mukhar khoddpar astolom. Khoddpacher mar, ani tantlem lokan pieunchê khatir udok bhair sortolem.' Israelachea zannteam mukhar Moizesan oxem kelem.
7. Hea zageak Mas'sa ani Meriba mhonn nanv dovorlem, kiteak Israelachim bhurgim thoim gunngunnlolim ani tãnnim Sorvesporachi porikxa kel'li, mhonnun, 'Sorvespor amchê vatten asa ki na?'
8. Uprant, Amalekit lôk ailo ani Refidim mhonnttat thoim Israelacher tãnnim akromonn kelem.
9. Moizesan Joshuak mhollem, 'Thoddea mon'xank vinchun kadd ani faleam Amalekitam kodde loddai korunk bhair sor. Itlem mhonnosôr Sorvesporacho danddo mhojea hatant dhôrun hanv dongrachê tenkxer ravtam.'
10. Joshuan Moizesan sanglolem toxem kelem. Amalekitam kodde loddai korunk to bhair sorlo. Tea mhonno-sôr Moizes, Aaron ani Hur dongrachê tenkxer gele.
11. Ani jedna Moizes aple hat ubarun dhôrtalo, tedna Israel jiktalo
12. Moizesache hat thokle tedna, tãnnim tachê-xim êk fatôr haddun dovorlo ani to tacher boslo; Aaron ani Hur Moizesachea hatak dhôrun ravle, dôr-êkê vatten eklo. Ani oxem dis poddo porian tache hat thir ravle.
13. Hê bhaxen Joshuan Amalekacher ani tachê porjecher torvarin zoit vhelem.
14. Tedna Sorvesporan Moizesak mhollem, ''Hea zoitacho fuddarak ugddas urcheak, hi ghoddnni eka pustokacher boroun dovor. Ani hanv mollba khal Amalekitanchea ugddasacho samko bhosm korun uddoitolom mhonn Joshuak portun portun sang.'
15. Moizesan êk vedi bandli ani tika 'Sorvespor mhojem xinvason' 'Sorvespor mhozo bavtto' mhonn nanv dilem.
16. Tannem mhollem, 'Sorvesporacho bavtto unch ubarun dhôr! Amalekitam virudh Sorvespor pinndkechê-pindkek zhuzot ravtolo!'
