1. Sorvesporan Moizesak mhollem, 'Polle Hanvem tuka Faraoh mukhar dev koso kela, ani tuzo bhav Aaron tuzo provadi zatolo.
2. Hanv tuka formaitam titlem-i tum kollit kôr, ani Aaron tuzo bhav Israel-porjen tacho dês sôddun diunchê khatir to tem Faraohk kollit kortolo.
3. Hanv Faraohchem kalliz dharunn kortolom, ani Ejiptant mhojim khunnam ani ojapam choddoitolom.
4. Faraoh tujem aikocho na dekhun, Hanvuch Ejiptak khoraien vhodd xikxa ditolom ani Israel mhojê porjek ani tichea fouzank Ejiptantlim bhair kaddtolom.
5. Ejiptkaram add, Hanv mhozo hat pattlaitolom ani Israel porjek tanchea desantli bhair kaddtolom tedna hanv Sorvespor mhonn tankam kollit zatolem.
6. Sorvesporan formailolem toxem Moizesan ani Aaronan kelem.
7. Faraoh kodde uloile tedna Moizesak oixim vorsam aslim ani Aaronak tre'aixim (83).
8. Sorvesporan Moizesak ani Aaronak mhollem,
9. Jedna Faraoh tumkam mhonnttolo, 'vismitam korun dakhoiat' tedna tum Aaronak sang danddo ghe ani Faraoh mukhar xevttun mar, anit icho sorôp zaum-di!'
10. Uprant, Moizes ani Aaron Faraoh-xim gele, ani Sorvesporan tankam formailolem tem tãnnim kelem. Aaronan aplo danddo Faraoh ani tachea opxalanchea fuddeant xevttilo ani tacho sorop zalo.
11. Magir Faraohn aplea vidvanank ani ghaddiank apoun haddle ani Egiptachea ghaddiamnim aplem montr mhonnun toxench kelem.
12. Tãnnim-i zonn eklean ap-aplo danddo zomnir xevttilo, ani tancheam-i danddeanche sorop zale. Punn Aaronachea danddean tanchea danddeank girasle.
13. Punn Sorvesporan sanglolem toxem, Faraohn aplem kalliz dharunn kelem ani Moizesak ani Aaronak tannem kan diunk na.
14. Tedna Sorvesporan Moizesak mhollem, 'Faraohchem kalliz dharunn zalam, ani porjek vochun diunk sôddina.
15. Tôr sokallim to Nil nodi-xim vetolo tedna tum nhõichê dôdder voch ani sorop kello to danddo hatant gheun nodichê deger taka mellunk ubo rav.
16. Ani taka mhonn, 'Sorvesporan, Hebrevanchea Devan, tuka sangunk mhaka tujê-xim dhaddla, 'oronneant mhaka bhozunchê khatir, mhojê porjek bhair sorun vochum di. Punn ozun Tachem utor tunvem kanar gheunk na.
17. Sorvespor oxem uloita, hea vorvim hanv Sorvespor mhonn tuka kollon ietolem. Polle, mhojea hatant asa to danddo hanv udkacher martolom ani Nil-nhõichem udok rogtan bodoltolem.
18. Ani nhõintlem sogllem nistem mortolem, ani nhõichea udkachi ghann ietoli, ani Ejiptkaranchean hê nhõichem udok pieunk zaunchem na.'
19. Ani Sorvesporan Moizesak mhollem, 'Aaronak oxem sang: 'Tuzo danddo ghe ani sorv Ejiptantlea nhõiam, kharzam, tolliam ani udkachea tannkiam voir tuzo hat vistarun dhôr.' Ani tim sorv udkam rogtan bodoltolim. Ani akkhea Ejipt desachem udok rogtan bodoltolem, ani ghoramnim legun, matiê-fatrachea vô lankddachea aidonamnim udok asa titlem-i rogot zatolem.'
20. Sorvesporan formailolem toxem Moizesan ani Aaronan kelem. Faraoh ani tachea opxalam mukhar Aaronan aplo danddo ubharlo ani to nodichea udkacher marlo, ani nodintlem sogllem udok rogot zaun gelem.
21. Nodintlem sogllem nistem melem, ani udkachi itli ghann ietali ki Ejiptkaranchean tem udok anik pieunk zalem na. Veta thoim Ejiptant sogllem rogotuch zalem.
22. Tedna Ejiptachea ghaddiamnim toxench kelem, ani Faraoh adlech porim dharunn zalo. Sorvesporan sanglolem toxem, Moizesak ani Aaronak tannem kan haloilo na.
23. Konnachich porva korinastana Faraoh aplea rajmahalant gelo.
24. Sogllea Ejiptkaramnim, udkak, nhõichê deger fonddare marle, kiteak nodichem udok pieunk upkaronaslem.
25. Ani Sorvesporan udkacher danddo marlea uprant, sat dis somple.
