1. Sorvesporan Moizesak mhollem, 'Poileam sarkeô don fatri katrun hadd ani dongrar Mhojê sorxim choddun ie. Ani tuvem fôddun uddoileai tea poilea fatrincher aslim tinch utram hea fatrincher Hanv boroun kaddtam.
2. Falea sokallim toiar za, ani voir sokallim Sinai Dongrar ie, ani dongrachê voir tenkxer mhaka mell.
3. Tujea borabor anink konnuch ieunchona; dongracher khoinsoruch, konnachich dixtt-ui naka; ani menddram-bokddeô dongrachea fuddeant chorvak vechim nant.'
4. Tôr, Moizesan poileam sarkeô anink don fatriô katorleô, ani dusrê sokallim-fuddem, Sorvesporan taka sanglolem tê porim, tannem teô aplea hatamnim Sinai Dongrar vheleô.
5. Sorvespor, eka kupachea rupan denvlo, tachê-xim ubo ravlo, ani 'Sorvespor' oxem aplem povitr nanv ucharlem.
6. Tachea fuddeantlean vochun Sorvesporan mhollem, 'Sorvespor, Sorvespor, doiall-movall Kallzacho Dev! To rokddoch ragar zaina, punn bhov dulôb ani visvaxi;
7. hozarank To Aplem bholeponn dakhoita; chuki, oprad ani patok bhogxita; tôr-ui tankam khast lainastana dovrina; avoi-bapaichea patkank lagun bhurgeank ani bhurgeanchea bhurgeank, tisrê ani chovthê pinddkek legun, To khast laita.'
8. Ani rokddoch zomnir saxttangim poddun Moizesan Devak bhôzlo;
9. tannem mhollem, 'Dhonia, hanv Tuka khorench manovlam zalear, mhozo Dhoni amchea sangata ieuncho mhonn magtam. Ho lôk nibôr manicho khorem, punn amcheô chuki ani oprad bhogôs ani Tujem daiz koxem amkam ghe.'
10. Sorvesporan Moizesak mhollem, 'Polle, Hanv atam Israel porjê kodde korar kortam. Prithumê-ver kednanch ani khoincheach desant vô raxttrant korunk nant toslim ojapam tankam korun dakhoitolom.Ojapvont vostu tumchê udexim Hanv kortolom ani Sorvesporachean koslim koutik vismitam korunk zata tem sogllea porzank kollit zatolem.
11. Aiz tumkam ditam tea updesank pallo diat. Tumchê mukhar hanv Amorit, Kanaanit, Hittit, Perizit, Hivit, ani Jebuzit hea sogllea porzank thoinchim dhanvddaitolom.
12. Tumi bhitôr sorunk vetat tea ganvchea porzam kodde koslich koblat korum nakat, na tôr tumi fasak sampoddtoleat.
13. Tancheô vedi môddun uddoiat, tanchê povitr khambe sokla ghalat, ani tanchê Ashera-devicheô murteô fôddun uddoiat.
14. Anink khoincheach devak bhôzum nakat, kiteak Sorvesporachem nanv premaxechem nanv, to premaxecho Dev.
15. Desachea lokam kodde koblat korinakat, kiteak tim aplea devank bolidanam kortat tedna tumkam-i apoitolim, ani tanchea devank bhettoilolea khann-jevnnan tumi-i vantto ghetolim.
16. Tumche put tanchea dhuvam modleô apnnak bailô vinchun kaddit ani tanchê udexim tumche put tanchea kuddea-devank bhôzunk pavtit.
17. Dhatuche dev korun tankam bhôzum nakat.
18. Fug naslolea Unddeanchi Porob samballat. Hanvem tumkam formailam tê porim, sat dis tumi fug naslolo unddo khauncho, tharailolea disamnim. Kiteak Abib mhoineant tumi Ejiptantlim bhair sorun aileant.
19. Sorv malgoddim bhurgim tumchim mhojea tabeant korunk zai, toxench, tumchea hinddantlim malgoddim;
20. punn gaddvacho malgoddo tumi dusrea zonavoran bodlun, to sôddounk zai, na tôr tachi gomtti môddun uddounchi. Ani soglle tumche malgodde put tumi sôddounk zai. Ritea hatamnim konnench mhojea fuddeant ieunchem nhoi.
21. Tumcho vavr korunk tumkam sôv dis asat. Punn satvea disa, vompnnechea ani pikachea kallar legun, tumi vavr korcho nhoi.
22. Tumche gonv lunvtat-molltat tedna Satolleanchi Porob - Pikêchi Porob- korat ani vorsachea xevottak Tombunchi Porob pallat.
23. Vorsak tin pavtti, tumchea dadleamnim Sorvespora Deva, Israelachea Deva mukhar disunk zai.
24. Sogllea porzank tumchea ganvantlim bhair ghalea uprant ani tumcheô ximô vhaddoilea uprant, hea porbam-somoiar, tumcho ganv kaddun gheunk konn ieunchona.
25. Mhaka zonavorachea rogtachem bolidan kortat tedna khomir aslolo unddo bhettoum naka. Ani Paskanchê Porbek kortat tem boliechem jevonn dusrê sokallim dovorchem nhoi.
26. Tumchê zomnichea Poilea pikacho orov Sorvesporachea tumchea Devachea ghorant haddun diat. Menddra-bokddechem lhan por tachea avoichea dudhan xizounchem nhoi.
27. Sorvesporan Moizesak mhollem, 'Him sogllim mhojim utram boroun dovor, kiteak, te tujê ani Israel porjêkodde kortam tea koraracheô otti zaun asat.'
28. Kãich jevi-khainastana, na mhonn kãich pienastana, Moizes thoim Sorvespora boglek challis dis ani challis rati ravlo. Tannem fatrincher Korarachim utram boroun kaddlim, mhonngê Dha Updes.
29. Moizes Sinai dongravelo denvlo. Dongravelo denvtana tachea hatamnim Koraracheô don pattiô asleô. Ani Sorvespora kodde uloilea uprant aplem tondd porzollit zalam mhonn Moizesak khobor nasli.
30. Aaronan ani Israelachea putam-dhuvamnim Moizesachem tondd pollelem. Tem porzollit zal'lem dekhun, tim tachê-xim vochunk bhietalim.
31. Punn Moizesan tankam apoilim, ani Aaron sobhechea sogllea fuddariank gheun tachê-xim ailo, ani Moizes tanchê lagim uloilo.
32. Tedna Israelacheô put-dhuvô odik lagim sorleô, ani Sinai dongrar uloun Sorvesporan dil'leô teô soglleô adnia tannem tankam kollit keleô.
33. Ani tanchê lagim uloun somptôch Moizesan aplem mukhamoll eka podd'ddean dhamplem.
34. Sorvespora mukhar ulounk vetalo titlê-i pavtti ani thoinsorlo bhair soro porian Moizes podd'ddo kaddtalo. Ani bhair sortôch, apnnak dil'leô adnia to lokak sangtalo,
35. ani Israelacheô put-dhuvô Moizesachem tondd porzollit zal'lem polletaleô. Sorvespora kodde ulounk vocho-sôr Moizes aplea tonddar novean podd'ddo ghaltalo.
