1. Bezalelan, babhul lankddachi, Korarachi Arkpett keli: oddez hat lamb, dêdd hat rund, ani dêdd hat unch.
2. Bhailean-bhitorlean taka xud'dh bhangarachi êk pati marli, ani sorvbhonvtim bhangarachi deg laili.
3. Ti vhorpak, char bhangaracheô mudiô, don-ui bazumnim don-don ghott keleô.
4. Babhul lankddache dandde kele ani tankam bhangar kaddlem
5. ani mudiamnim te ghale don-ui vattamnim.
6. Xud'dh bhangarachem taka ek dhampnnem kelem, oddez hat lamb ani dhedd hat rund.
7. Taka pêttlolea bhangarache don vhoddlea pakotteanche pranni,
8. don-ui pontank êk-êk lailo. Heô don-ui vhoddlea pakhotteanche pranni pansun, dhampnnea borabor ekuch nôg zalo.
9. Tonddak-tondd korun tankam dovorle, ani tanchea vistarlolea pakotteamnim ak'khem dhampnnem bhôrlem.
10. Bhabul lankddachem tannem ek mez kelem, don hat lamb, êk hat rund, ani dêdd hat unch.
11. Xud'dh bhangarachi taka êk pati marli ani sorvbhonvtim bhangarachi êk deg laili.
12. Char bottam rund taka êk tobik marlem ani bhonvtim bhangarachi deg laili.
13. Bhangaracheô char mudiô laileô,
14. char-ui khurank degê-xim.
15. Babhul lankddache dandde kele ani tankam bhangar kaddlem.
16. Mezar dovrunk xud'dh bhangarachim aidonam kelim: boxeô, kopam, jogam ani soreachê bhettê khatir kanxe.
17. Tannem xud'dh bhangarachem divea-sthan kelem. Pedd ani khambo pêttlolea bhangaracho; fulancho xrungar, bonge ami paklleô pansun ekuch nôg zalo.
18. Sov fantte, tin-tin ek-eka bazun voir sortale.
19. Dôr eka fantteak fulanche tin xrungar kele, bodomachea tonvream porim, bhonge ani paklleô disot.
20. Divea-sthanakuch fulanche char xrungar asle, tech porim, bodomachea tonvream, bhongeam ani paklleam porim disot.
21. Eka-eka fanttea sokol êk-êk bhongo aslo.
22. Bhonge, fantte divea-sthanak pansun, pêttlolea bhangaracho ekuch nôg diso.
23. Tannem hea divea-sthanak sat divleô keleô, ani tancheô vattleô ani chimtte xud'dh bhangarache.
24. Sogllem mhunnon, pavun-xem rat bhangar divea-sthanak ani sogllea tachea samonnak ghalem.
25. Dhump zollounk, tannem babhul lankddachi êk vedi toiar keli; ti êk hat lamb, êk hat rund, ani don hat unch. Tichim xingam vedi borabor ekuch nôg diso
26. Vedichea voilea bhagak, char-ui bazumnim ani tichim xingam, sogllim bhangarachê patien revoddlim ani bhangarachi êk deg laili.
27. Ukhlun vhorpak, tannem don bhangaracheô mudiô korun, teô doxim-i degê sokla laileô, hantunt dandde ghale,
28. he babhul lankddache ani tankam bhangar kaddlem.
29. Tea bhair tannem povitr makhnnechem tel ani pormôllit dhump misllun toiar kortat toxem kelem.
