1. Moizesan dongrar chodd kallav kelo, ani thoincho sokla iena tem polleun, porza Aarona-xim ekttovli, ani tãnnim taka mhollem, 'Hea Moizes mhonnttat tea mon'xan amkam Ejiptantlim bhair kaddun hanga haddlim; taka kitem zalam tem ami nokllonv; tôr, chol ia, amchê mukhar vochunk, tum amkam êk dev korun di.'
2. Aaronan tankam mhollem, 'Jim bhangarachim kanantlim tumcheô bailô, tumche put ani dhuvô ghalun asat, tim sogllim kaddun mhojê-xim haddat.'
3. Hê porim, sogllea lokan aplim bhangarachim kanantlim kaddlim ani tim Aarona-xim haddun dilim.
4. Aaronan tim gheun sogllim koddoilim, ani tem koddlolem bhangar eka formant votoilem, ani tacho êk bhangaracho paddkulo kelo. Ani porjen mhollem, 'Israela, ho tuzo Dev, hannench amkam Ejiptantlim bhair kaddun haddleant!
5. Hem polleun, Aaronan hea putllea mukhar êk vedi bandli, ani porjek hi porgottaunni keli: 'Faleam, Sorvesporachea manak êk porob astoli.'
6. Dusrea disa, bhov sokallim, porjen hom' bhettoile ani xanticheô bhettô haddleô. Magir, porza jeunk ani pieunk bosli, ani uprant mouza korunk lagli.
7. Sorvesporan Moizesak mhollem, 'Chol, denv atam, kiteak Ejiptantli tunvem bhair kaddlii tê tujê porjen patok kelam.
8. Hanvem tankam vatt nemun dil'li, ti tãnnim rokddich sôddli; koddhoilolea bhangaracho êk paddkulo korun, tachê mukhar tim saxttangim poddlim ani taka bhôzun tãnnim taka iodnancheô boliô bhettoileô. Tãnnim mhollem, 'Israela, ho asa tuzo Dêv, tannench tumkam Ejiptantlim bhair kaddleant!'
9. Sorvesporan Moizesak mhollem, 'Hi porza nibôr manichi mhonn Mhaka borem gomun ailem.
10. Mhaka sôdd atam. Mhozo rag tancher zolltolo ani tancho Hanv bhosm kortolom! Punn tuka Hanv ek vhodd raxttr kortolom.'
11. Punn Moizesan Sorvespora aplea Devak thôndd korpak Taka oxem prarthon kelem, 'Sorvespora, Tujea bavlleachê podven ani hatachea bollan Tunvem Tujê porjek Ejiptantli bhair kaddun haddleai:
12. tôr kiteak mhonn atam Tuzo rag ticher zollunk ditoloi? 'Tancho ghat gheupak, dongrancher tim morun vochpak ani prithumêvelim tankam nanch korpak, Tannem tankam bhair kaddun haddlim!', oxem Tum Ejiptkarank mhonnunk ditoloi? Tuzo zollto rag nivum-di, thôndd za ani Tujê porjecher hem noxtt ieunk dium naka.
13. Abraham', Izaak ani Jakob Tujea chakrancho ugddas kôr: tankam Tunvem, Tujeach Nanvan soput gheun, oxi bhas dileai, 'Mollbachea noketram porim Hanv tumchi sonsôt vaddoitolom, ani ho tumkam Hanvem bhasaila to sogllo dês tumchê sonstik ditolom, ani ti to sodankal aplem daiz koxem bhôgtoli.'"
14. Ani Sorvespor thôndd zalo, ani jemTo Aplê porjecher noxtt haddunk sôdtalo, tem Tannem sôddun dilem.
15. Aplea hatamnim Koraracheô don fatri gheun Moizes dongravelo denvlo; hea fatrincher don-ui vattamnim, mukhar ani pattlean, boroilolem aslem.
16. Heô fatri mhollear Devachem kam' ani tancher boroilolem aslem tem borovp Devachem; tem fatrincher kantoilolem.
17. Porjechi bobatt Joshuan aikoli. Tannem Moizesak sanglem, 'Tombum modem zhuz zata, tacho avaz aikunk ieta.'
18. Moizesan zobab dilo, 'Zoitivont zal'leancho avaz nhoi to; zhuzant har poddloleancho-i to avaz nhoi Punn hanv aikotam to avaz gaionancho.'
19. Penneachea tombum-xim pavtôch, tannem paddkulo ani lôk nachta to pollelo. Ani Moizesacho rag choddlo. Aplea hatamnim asloleô fatri tannem zomnir xevttun uddoileô ani dongrachea paiam-xim foddleô.
20. Tãnnim kel'lea tea paddkuleak dhôrun tannem uzo lailo ani tachi boddoun dhaddaun pudd keli ani ti udkant xinvraili; ani uprant tem udok tannem Israelachea putam-dhuvank pieunk dilem.
21. Moizesan Aaronak mhollem, 'Edem vhoddlem patok tancher haddunk hê porjen tuka kitem kelam?'
22. Aaronan mhollem, 'Mhojea dhoniacho rag itlo pettcho goroz na. Ho lôk kitlo patkak òddta tem tum zannoi.
23. Tãnnim mhaka sanglem, 'Amchê mukhar vochunk amkam êk dêv korun di. Ejiptantlim amkam bhair kaddlim tea Moizesak kitem zalem tem ami nokllonv.'
24. Mhonnttôch hanvem tankam mhollem, 'Konna lagim bhangar asa?' Ap-aplem bhangar kaddun tãnnim mhojê-xim haddlem. Hanvem tem ujeant uddoilem, ani ho paddkulo bhair sorlo.'
25. Aaronan porjê voir bori zoton kelina, hea khatir tinnem osli pisai adarli tea khatir, sorvbhonvtichea dusmananachea dolleam mukhar kendneancho mhal zaunk pavli, hem Moizesan borem somzun ghetlem.
26. Ani moidanachea darvonttea-xim ravun tannem vhoddlean bob marli, 'Sorvespora sangata asat titlim-i mhojê sorxim ieat!' Tôr Levichea kullantle soglle ieun tachê-xim zomle.
27. Tannem tankam mhollem, 'Sorvespor Israelacho Dev tumkam oxem formaita: 'Tumchea penkttak tolvar laiat; Tumi eka darvonttea thaun tombu moidanachê dusrea darvonttea porian vochun, tumchea bhavanchem, ixttanchem ani sezareanchem torvarin xins kapat.'
28. Levichea kullachea mon'xamnim Moizesan formailam toxench kelem, ani tea disa tãnnim sumar tin hozar mon'xancho jiv kaddlo.
29. Moizesan tankam mhollem, 'Tumchea putancho ani bhavancho teag korun, aiz tumi, Sorvesporak tumchich sonvskarnni kelea, ani oxem Sorvespor aichea disa tumcher axirvad ghalta.'
30. Dusrea disa Moizesan porjek mhollem, 'Tumi ek vhodd patok kelem. Punn hanv atam Sorvespora-xim vetam; ghoddiê mhojean tumchea patkanchem farikponn diunk zait.'
31. Ani Moizes Sorvespora-xim portun gelo. Tannem mhollem, 'Hanv bhov khontibhorit zalam: apnnak êk bhangaracho dêv korun hê porjen ek vhodd patok kelem.
32. Punn atam Tuka khuxi aslear,Tujean tanchem patok bhôgsunk zata! Na zalear, Tunvem boroilaim tea pustokailem mhojem nanv pusun uddoi.'
33. Sorvesporan Moizesak zobab dilo, 'Mhojer patok kelam tea mon'xak Mhojea pustokantlo Hanv bhair uddoitolom.
34. Atam tum voch, ani hanvem tuka sanglam thoim porjek vhorun pavoi. Mhozo dut tujê mukhar vetolo, punn Hanv tumkam mellunk ietolom tea disa tanchea patkak lagun Hanv tankam khast laitolom.'
35. Ani Sorvesporan porjecher pidda dhaddli, kiteak tannim bhangaracho êk paddkulo korunk Aaronak nimit dil'lem.
