1. Bezalel, Oholiab, ani soglle monis zankam Sorvesporan boll-hikmot ani xikovnn diloli asa, te, Povitr sthanan korcho asa to sogllo vaur Sorvesporan formailam teach pormannem kortolet.
2. Uprant Moizesan Bezalelak, Oholiabak, ani vavrak ikmot-tankot aslolea sogllea heram huxar ani udar kallzachea mestank apoun vhele, ani vavr suru korunk tankam sanglem.
3. Israel-porjen povitr sthanachea bandkamacho vavr fuddem vhorunk, apli denngi koxi bhettoilolem titlem-i samonn tanchea hatant Moizesan ghalem. Punn Israel-porza, dôr sokallim, anink-ui haddun Moizesa kodde ditôch ravli.
4. Tedna te huxar-hikmotiche mest ap-aplo vavr thamboun,
5. Moizesa-xim gele ani taka sanglem, 'Sorvesporan formailolea vavra khatir goroz tea-von odhik samonn porza haddtôch asa.'
6. Hea pormannem, Moizesan adnia dili ani ak'khea tombunt hi khobor porgôtt zali, 'khoincheach dadlean vô bailen, povitr-sthanachea vavra khatir koslich bhett koxi haddchi nhoi.' Hê toren lokan samonn haddpachem bond kelem.
7. Sogllo vavr sompounk aslem tench samonn tea vavrak gorjechem tea-von chodd aslem.
8. Tanchê modem chodd huxar asle tea kolakaramnim Sorvesporachea Tombucho vavr aplea hatant ghetlo. Barik sonni-lugttachea dha chadrancher tãnnim nillea, zambllea, ani tamddea lonv-sutan vhoddlea pakotteanche pranni vinnle.
9. Ek-êk chador chovda var lamb ani don var rund aslem. Sogllim chadram ekach zhokachim aslim.
10. Tãnnim panch chadram zôddun ekuch kelem, ani dusrim-i panch têch porim.
11. Hea donui dhoddanchê bhailê degek pon'nas-pon'nas, eka-mekak somor zatat tê porim, nillea lugttachim kazam kelim.
13. Pon'nas bhangarache ganch-ankdde korun, donui dhoddam zôddlim. Hê porim Bhiradd-Tombu ak'kho ekêch bandavollicho zatolo.
14. Tea uprant Tombuchê bhailê vatten ghalunk bôkddechea kensanchim ikra chadram ghetlim.
15. Sogllim pondra-pondra varanchê lambaiechim ani don-don varanchê rundaiêchim.
16. Tantlim panch zôddun ekuch kelim, ani urlolea sovanchem ek.
17. Bhailê degek eka dhoddak pon'nas kazam kelim, ani dusreak-ui, somor zatat tê porim pon'nas kazam.
18. Pitullche pon'nas ganch-ankdde lavun tim donui eka-mekak zôddlim.
19. Tori-i, tache bhailean ghalunk, ek menddreachea chambddeachem tambddea-rongachem; ani dusrem bokddeachea nazuk chambddeachem, oxim don kapam kelim.
20. Babhulchea lankddacheô ubeô faskeô keleô.
21. Êk-êk dha hat unch, ani dedd hat rund;
22. dor faskek don kochor khanch ghalun, hê porim teô eka-mekak zôddunk zataleô.
23. Dokhinnichea ordan vis faske
24. ani tankam soglleank challis rupeachim peddam, faskek don-don, tanche sandhe ghott dhôrcheak.
25. Ut'torichê vatten vis faskeô ani hankam-i,
26. tech porim, rupeachim challis peddam.
27. Tombuchê Pattlê vatten vô Ostomtechê vatten sov faskeô
28. ani don-ui konnxeank anink don.
29. Heô donui konxeancheô sokol thaun voir porian eka-mekak zoddloleô.
30. Mhonnttôch, hea ordan atth faskeô solla rupeachea peddancher tharoun asleô, don peddam dor ekê faski pondak
31. Babhulchea lankddacheô, pondra addveô khambiô keleô,
32. panch-panch don-ui vattamnim ghalunk, ani panch ostomtê vô patthlê vatten ghalunk.
33. Modli khamb xekan'xek eka pontak thaun dusrea pontak ghôtt keli.
34. Sogllea faskeank bhangar kaddlem, toxench khambiank, ani heô ghott dhôrcheak tankam bhangaracheô mudiô laileô.
35. Tãnnim barik sonni-lugttacho êk podd'ddo kelo ani tancher nillea, zambllea, ani tambddea lonv-sutan vhoddlea pakotteanche pranni vinnle.
36. Ho podd'ddo ghôtt dhôrunk, babhulchea lankddache char khambe kele, tankam bhangar kaddlem, ani podd'ddeak bhangarache ganch-ankdde laile. Ani hea khambeank char rupeachim peddam kelim.
37. Tombuchea darak sonni-lugttacho êk podd'ddo kelo, ani nillea, zambllea, ani tambddea lonv-sutan to nettoilo.
38. Hea podd'ddeak panch khambe kele, tankam bhangar kaddlem, ganch-ankdde laile, tanchea danddieank bhangar kaddlem, ani khambeank pitullchim panch peddam kelim.
