1. Sorvesporan, Ejiptachea desant, Moizesak ani Aaronak mhollem,
2. Sogllea mhoineam modem ho mhoino tumkam poilo zatolo, mhonngê tumchea vorsacho poilo mhoino.
3. Ak'khê Israel-porjê kodde uloun, tankam sangat: "Hea mhoineachea dhavea disa zonn-eklean aplea hinddantlo êk menddro gheuncho, dôr-eka kuttumbak êk menddro.
4. Ak'khea menddreachem mas khaunk êk kuttumb ekdomuch lhan zait zalear, tannem aplea ghora laginch asa tea xezariak, hachea kuttumbant monxam asat tea pormannem, bhagak gheuncho; zonn-eklo kitlem khatolo tem polleun, menddro khaunk kitlo lôk asunk zai tem tharavunchem.
5. To menddro zaunk zai khot naxillo, dadlea-lingacho ani eka vorsacho; menddro vô bokddo-i bi zaum-ieta.
6. Hea mhoineachê chovda tarker porian, tem zonavor samballun dovrunk zai; magir soglli Israel-porza ektthaim zaun sanjechea vellar tea zonavoracho prann kaddtoli.
7. Magir tachem ilem rogot gheun, jea ghoram-nim tea zonavorachem mas khaunchem asa, tea ghoranchea daranchea don-ui kovddancher ani umbreancher tem lavunchem.
8. Tê rati tem mas ujeant bhazun khaunk zai; khomir ghalunk-naslolo unddo ani koddu baji gheun tem mas khaunk zai.
9. Tem mas horvem nhoi mhonn udkan xizoun khaunchem nhoi, punn akhench tem zonavor toklê-paiam ani pottantlea soit bhazchem.
10. Dusrê sokallink tachem kãich dovorchem nhoi; urta tem sogllem hulpaunchem.
11. Tumi tem jevonn korunk zai hê bhaxen: tumchea penkttak bandat, pãiank vhannô ghalat, hatant êk danddo gheiat. Vegim-vegim tumi tem jevonn kortoleat, kiteak to dis Sorvesporachea Paskacho.
12. Tê rati Ejiptachea desantlean Hanv vetolom ani sogllea malgoddeank jivexim martolom, mon'xank toxem mon'zatink, ani sogllea Ejiptachea devank Hanv khast laitolom, Hanv to Sorvespor.
13. Tumi ravtat tim ghoram dakhounk, hem rogot zatolem êk khunna; ani tem rogot dixtti poddtôch Hanv tumkam kãi vaitt korinastana fuddem vetolom ani, jedna Hanv Ejiptak khast laitolom, tedna tumkam kãich vaitt zaunchem na.
14. Ho dis tumkam êk ugddasacho dis zatolo, ani tumi to dis Sorvesporachea manak êk porob koxi somrombhtoleat sonstichê sonstik."'
15. Sat dis tumi khomir naslolo unddo khauncho. Poilea disa, tumchea ghorantlem sogllem khomir tumi bhair uddounk zai, kiteak he sat dis konn-ui tumcho ghorcho khomir aslolo unddo khait, taka Israelantlo bhairaitole.
16. Poilea ani satvea disa tumi povitr zomatik ektthãi zaunk zai, ani he donui dis vavr korcho nhoi punn tumchem dispott'tem jevonnuch tumchean toiar korum-iet.
17. Khomir naslolea unddeanchi Porob tumi samballat, kiteak heach disa, tumchea fouzank hanvem Ejiptantlim bhair kaddlim. Pillgechê-pillgek, tumi hoch dis palltoleat - sogllea kallak lagu zatolo nem'-kaido to.
18. Poilea mhoineachea chovdavea disachê sanjê thaun ekvisavea disachê sanjê porian tumi khomirachem kãich khaunchem nhoi.
19. Sat dis-bhor tumchea ghoramnim khomir asunk favona, kiteak, konnui ganvcho vô porkho to zanv, khomir aslolo unddo khait, to Israel porjentlo bhairailolo zatolo. Kitench khomir aslolem tumi khaunchim nant; khoin-sorui tumi jiexat tumi khomir naslolo unddo khatoleat.'
21. Uprant Moizesan Israelachea sogllea vhoddilank ektthaile ani tankam oxem sanglem, 'Ap-aplea kuttumba pormannem, tumchea hinddantle menddre vinchun kaddat ani Paskanchi boli marat;
22. uprant hisop zhaddacho êk turo gheun, to tostantlea rogtant buddoiat ani tostantlea rogtan darachea tornnacher ani don-ui kovddancher xitoddo marat. Sokall zai-porian konnuch dara bhair sorcho na.
23. Kiteak Ejiptak mar diunk Sorvespor desantlean vetolo tedna, jea-jea daranchea tornnacher ani don-ui kovddancher rogot lailolem To dekhtolo, tem-tem dar To sôddun vetolo ani prann-kaddpiak tumcho prann kaddunk tumchea ghoramnim bhitôr sorunk diuncho na.
24. Êk kaido koso, tumi ani tumchea bhurgeam-ballamnim hi rit pallchi.
25. Apnnem bhasailam tea pormannem, Sorvespor tumkam ditolo tea desant tumi bhitôr sortôch, hi rit tumi pallunk zai.
26. Hê riticho ôrth kitem kai mhonn tumchim bhurgim-ballam tumchê kodde vicharit zalear,
27. tumi tankam sangat: "Ho Sorvesporachea manak Paskacho iôdn: Tannem Ejiptak mar dilo punn amchim ghoram vanchoilim tea somoiar To Ejiptant aslolê Israel-porjechea ghoram koddchean gelo." Hem aikun, sogllê porjen tokli bagaun Devak nomoskar kelo
28. Magir, vochun, Moizesan ani Aaronan sanglolem toxem Israelitamnim kelem.
29. Modian-ratir, Sorvesporan sogllea Ejiptantlea malgoddea putank marun uddoile. Faraohchea, rajgadier choddtolo aslo tea putak suru korun, tem bondkhonnintlea koideachea malgoddea putak, tech porim, zonavoranchea malgoddea porank.
30. Tê rati, Faraoh, soglle tache opxal, ani sogllo Ejiptantlo lôk ratche zage zale. Ak'khea Ejiptant motti arodd poddli kiteak moronn nastana ekui ghorabo naslo.
31. Têch ratichea bharar, Faraohn Moizesak ani Aaronak apoun haddle ani tankam mhollem, ‘Vochat mhojê porjentle bhair sorat; tumi ani Israelitkar, ani tumi maglam toxem, vochat ani Sorvesporak bhozat.
32. Tumchea menddram-bokddeank ani gorvankui vhorat, ani bhair sorat! Ani mhaka-i axirvad diat.'
33. Ejiptkaramnim Israel-porjek desantli veginchê vegim bhair sorun vochunk porathli; karonn tãnnim mhollem, 'Tumi vochonant zalear ami sogllim mortoleanv.'
34. Tôr, porjen fugunk-naslolem pitt, aplea kopddeamnim guttlailolim pitt mollpachim aidonam, aplea khandar marun tim bhair sorlim.
35. Moizesan sanglolem toxem Israel-porjen kelem, ani Ejiptkaram koddle bhangara-rupeache nog, ani vostram-i magun ghetlim.
36. Sorvesporan Ejiptkaranchem kalliz-mon Israel porjê sovem oddun dhôrlem, ani magtalim tem tankam Ejiptkaramnim dilem. Hê porim, Israel-porza Ejiptachea lokachi girestkai gheun bhair sorli.
37. Israelachea putam-dhuvamnim Rameses ganvantlim bhair sorun Sukot ganvant vochunk vatt dhôrli. Bhurgeam-ballank mejinastana cholun vetale te dadlech sumar soixim hozar asle.
38. Tanchê borabor jin'nosvar lokanchi êk vhôdd urponz geli; tea bhair mezum nozo titlea bokddeanche hindd.
39. Ejiptak thaun haddlolea pittacheô tãnnim bhakriô keleô, punn fug-nasloleô, kiteak tankam khomir ghalunk naslem. Fursôt dinastana tankam Ejiptantlim dhanvddailolim dekhun, vattek jevonn-khann vhorunk tankam zalem na
40. Israelachea putam-dhuvamnim Ejiptant charxim-tis vorsam kaddlolim.
41. Charxim-tis vorsam bhòrtalim teach disa Sorvesporacheô soglleô fouzô Ejiptantleô bhair sorleô.
42. Tankam Ejiptantleô bhair kaddunk Sorvesporan êk rat-bhôr zagronn keli. Hi rat pinddkechê pinddkent Israelachea putam-dhuvamnim Sorvesporachea manak êk zagronn koxi samballunk zai.
43. Sorvesporan Moizesak ani Aaronak mhollem, 'Suttkechê Porbê vixim he kaide samballche: Eka porkea mon'xan hea Suttkechea jevnnant vantto gheuncho nhoi,
44. punn vikto-ghetlolea chakrachean, zôr tachi sunôt kelea, tachean tem khaum-iet.
45. Khoincheach Vattsurean ani bhaddeak lailolea chakran tem khavunk zaina.
46. Ekach ghorant tem jevonn jevunk zai; tea zonavorachem mas ghora bhair vhorunk zaina. Ani tachem ekui hadd môddchem nhoi.
47. Ak'khê Israel-porjen ho somarombh pallunk zai,
48. punn zachi ozun sunôt korunk na tachean tem afddum nozo. Zor konn-ui ek porko monis tumchê modem thikann korun asa, ani Sorvesporachea manak hi Suttkechi Porob samballunk sôdta, tachi ani tachea ghorchea dadleanchi poili sunôt korunk zai.Tedna taka Israel nagrika porim lekcho, ani tachean tea jevnnant vantto gheum-iet.
49. Nagrikak ani porki-lôk tumchê modem tthikan korun asat tankam soglleank ekuch kaido lagu zata.
50. Ak'khê Israel-porjen he nem samballun, Sorvesporan Moizesak ani Aaronak formailolem titleakui pallo dilo.
51. Teach disa, Sorvesporan Israelachea sorv fouzank Ejiptantlim bhair kaddlim.
