1. Tedna Sorvesporan Moizesak mhollem, 'Chol, Faraoh-xim voch. Mhojim aninkui vismitam-novlam korun dakhounchê khatir, hanvem taka ani tachea opxalank odikuch dharunn keleat
2. ani koxê porim him vismitam korun hanvem Ejiptkarank lojek ghalim tem tujean tujea burgeank ani natrank sangunk zatolem. Toxench Hanv Sorvespor mhonn tumkam kollon ietolem.'
3. Tôr Moizes ani Aaron Faraoh-xim gele ani taka mhollem, 'Hebrevancho Dev, Sorvespor oxem mhonntta, 'Anink kitlo kall mhaka khalto zaunk tum nakartoloi? Mhaka bhozchê khatir, mhojê porjek vochum-di.
4. Zôr tum mhojê porjek vochonk dinaim zalear, faleam hanv tujea desant toll dhaddtolom.
5. Hê vorvim zomin disona-xi zatoli. Soglli zomin tollamnim bhortoli. Korveanchea pavsantlean jem urlam tem legun te khaun uddoitole, xetamnim vhaddtolim sogllim tujim zhaddam, te girastole.
6. Tujea rajmahalant, tujea opxalanchea ani sogllea Ejiptkaranchea ghoramnim te bhortole. Tujea purvozamnim ani purvozanchea purvozamnim hea sonvsarant zolmak aileat tea disa meren legun kednanch dekhlem na toxem zatolem.' Oxem sangun Moizes Faraoh koddcho bhair sorun gelo.
7. Faraohchea opxalamnim taka mhollem, 'Kitlo kall mhonn ho monis amkam tras ditolo? Israel-porjek vochum-di, ani tanchea Sorvesporak tanchea Devak tankam nomoskar korum-di. Ak'khea Ejiptachem nisontton zait veta tem tuka disona?
8. Tôr Moizesak ani Aaronak porot Faraoh-xim apoun haddle, ani tannem tankam mhollem, 'Tumi vochat, ani Sorvesporak tumchea Devak bhozat. Punn konn-konn vetolo?'
9. Moizesan zobab dilo, 'Amchea lhan bhurgeank ani mhatareank, amchea putank ani dhuvank ami vhortoleanv, toxench amchea menddrank ani bokddeank, ani amchea gorvank, kiteak Sorvesporachea manak ami ek vhôdd porob korunk zai.'
10. Faraohn tankam mhollem, 'Mhonnttôch hanvem tumkam tumchea bailam ani tumchea bhurgeam-ballam borobor vochunk diunchem! Sorvespor tumkam rakhum! Polleiat, tumchea monant êk vaitt ievzonn asa.
11. Na, toxem zaunchem na! Sorvesporak bhozchem hem tumchem mon zalear, fokot dadleank vochunk melltolem.' Itlean, Moizesak ani Aaronak Faraohchea fuddeantle bollan bhair kaddle.
12. Tedna Sorvesporan Moizesak mhollem, 'Ejiptachea ganvacher tuzo hat ubar, ani tollank apoun hadd. Ejiptacher tannim ghuri ghalum-di ani desant vaddta titlem-i tannim girasum ani korveanchea pavsantli urloli vonospoti tannim khavun uddoum?'
13. Tedna Moizesan Ejipta-ver aplo danddo ubarlo, ani Sorvesporan desacher udentek thaun varo dhaddlo, ani dis-rat ho varo marit aslo. Sokall mhonnosor, udentechea varean toll vhaddle.
14. Tollamnim ak'khea Ejiptacher ghuri ghali ani ak'khea Ejiptak vhodd bhiream-nim ximpddon bosle. Kednanch adim polleunk na ani hea fuddem kednanch polleunche nant tosli
15. tollanchi dhadd ieun soglli zomin kalli zali; ani desachem nisonttonn zalem. Xetant vaddta titlem-i ani korveanchea pavsantlim urlolim zhaddavelim sogllim follam tannim giraslim. Ak'khea Ejiptant, veta thoinsor, hirvem oxem kãich urlem na, zhadd, nhoi mhonn vonospoti.
16. Faraohn taktin Moizesak ani Aaronak apoun haddle ani mhollem, 'Hanvem Sorvespora tumchea Devacher ani tumcher pap adarlem.
17. Hê ekuch pavtti mhojem patok bhôgsat, ani hanv tumchê lagim magtam hea mornnadik vaittantle amkam vattai mhonn Sorvespora tumchea Deva lagim magat.
18. Moizes Faraoh sorxilo bhair sorlo, ani Sorvesporak tannem magnnem kelem.
19. Ani Sorvesporan ostomtechem khor varem dhaddlem, ani hea vharea borabor te soglle toll Tambddea Doriant lotton gele ani nanch zale. Ak'khea Ejiptant êk punn toll urlona.
20. Punn Sorvesporan Faraohk odikuch dharunn kelo, ani tannem Israel-porjek vochunk dili na.
21. Sorvesporan Moizesak mhollem, 'Molba veslean tuzo hat ubar, ani soglleamnim bhôgunk zata titlo dhatt kallokh Ejipta-ver posorum di.'
22. Mhonnttôch Moizesan mollba veslean aplo hat ubharlo, ani tin dis ak'khea Ejiptant dhatt kallokh poddlo.
23. Ejiptkar-loka modem, monis mon'xak disonaslo, ani he tinui dis konnuch aplea zageavelo hallona. Punn Israel-porza jietali thoim tankam uzvadd aslo.
24. Faraohn Moizesak apoun haddlo ani taka mhollem, 'Tumchea bailam-burgeank gheun, tumchea Sorvesporak bhòzunk vochat. Punn tumchim menddram-bokddam ani gorvam hanga asum di.'
25. Moizesan mhollem, 'Tôr,bhettô korunk ani Sorvesporak, amchea Devak, hom somorpunk, tunvem amkam zonavoram vhorunk diunchim poddtolim. Ani amchim zonavoram-i amchê borabor vochunk zai; ekui gêt fattlean dovorchem nhoi.'
26. Sorvesporak amchea Devak bhôztanv tedna, aminch tim zonavoram vinchun kaddunk zai. Ani thoim pavo-sor, Sorvesporak bhozchê khatir koslim zonavoram ami bhettounk zai tem atam amich nokllonv.'
27. Sorvesporan Faraohk odikuch dharunn kelo, ani to porjek vochunk dina zalo.
28. Ani tannem Moizesak mhollem, 'Mhojea fuddeantlo koddsor! Khobordar anink kednanch mhojea fuddeant ieum naka! Dusrê pavtt tunvem mhaka anink pollen zalear, tum mortoloi!'
29. Moizesan uprant mhollem, 'Tunvench mhonnllaim toxem, hanv tuka anik kodinch portun polleuncho na.'
