1. Tê somoim Moizesan ani Israelachea putam-dhuvamnim hem gaion Sorvesporachea manak gailem: Hanv Sorvesporachi kirti gaitam: To mhoimen bhòrla! Ghoddeank ani ghoddesvarank Tannem doriant xevttile.
2. Sorvespor mhojem boll ani mhozo askari, To mhozo tarôk; To mhozo Dev, hanv Taka vakhanntam; mhojea bapaicho Dev To, hanv Taka vornnitam.
3. Sorvespor êk zhuzari, Sorvespor Tachem Nanv.
4. Faraohcheô gaddiô ani tachi fouz Tannem doriant xevttilim, Tachea ghott-bollvont ghoddekarank,Tambddea Dorian buddoun marle.
5. Somdirachea udkamnim zomun tankam dhample; fatra bhaxen te sarke pondak buddun gele.
6. Tuzo uzvo hat, Sorvespora, aplea bollan mhoimevont, Tuzo uzvo hat, Sorvespora, dusmanank nattak korta.
7. Tujea vhodda voibhovan tujea dusmanank konsllaitai; ujea porim tuzo rag bhogbhogta, ani kordda sarke tankam lasta.
8. Doriacher tunvem svas sôddloi, ani udkam voir-voir sorot gelim; ghôtt banda sarkim tim ubim dhôrlim; thavak-sun doria ghott zalo.
9. Dusmanan mhollem, 'Patthik lagun tankam dhôrtolom; tancho lutticho mhal vanttun, pott futto-sor khavun dhadoxi zatolom; Mhoji tolvar ubarun, mhojea hatant tanchem nisontton kortolom.
10. Tunvem tuzo svas sôddloi, dorian tankam dhample; xinxea porim bhirankull udkachê khorik te pavle.
11. Sorvespora, tujê sarko konn asa? Povitrtaien voibhovi, Bhoktam modem konn tujê sarko? Tezvont kortubamnim thôr, Vismitam-novlam korpi!
12. Uzvo bavllo tuzo vistarloi, ani zomnin tankam gillle!
13. Tujea visvaxi mogan soddoilolê porjek choloun vhelii tujê podvê bollan vatt dakhoun, tujea povitr mondirant tthikannant tika pavoilii.
14. Porzamnim tuji khobor aikolea, ani tujê bhirantin teô kamptat; Filistevkar, tôr, tuka bhieun koddkoddtat.
15. Edomache mukheli nirxeleat, Moabache bollixt akantan kolkol'leat; Kanaanit lôk koddon virun gela.
16. Kampero ani thorthoro tancher denvleat. Tujea bavlleachea bollan, Sorvespora, Tuji porza, tuvem soddoiloli porza vocho-sor, gundde koxe asa thoinch ube asat.
17. Zoim Tujem tthikann kelãi, Sorvespora, Tujea hatamnim bandlolea Mondirant, thoim Sorvespora, Tujê porjek Tum vhortoloi, Tujea khaxa daizachea dongrar tankam pavoun rigoitoloi.
18. Sorvespor razvôtt choloitolo sasnnachea sasnnak!
19. "Israel porza doriantlean sukê zomnivelean, cholun geli. Punn Faraohche ron'gadde, tanche ghodde ani ghoddesvar doriant gele, tedna Sorvesporan doriachea udkak porot tancher haddlem.
20. Bhaknarinn Miriam, Aaronachi bhoinn, hinnem aplem ghumott ghetlem, ani soglleô ostoreô tichê borabor, ap-aplim ghumttam gheun, nachunk laglim.
21. Miriam tanchê khatir dulpod gavunk lagli: Sorvesporachea manak gaiat, kiteak to voibhovan bhorla; ghoddeank ani ghoddesvarank tannem doriant xevttile.'
22. Magir, Moizesan Israel-porjek, Shurachea oronneantlean, Tambddea Doria-thaun fuddem vheli. Oronneantlean tin disanchi vatt tim cholun gelim, punn tankam khoinsoruch udok mell'lem na.
23. Uprant, tim Mara mhonnttat tea zagear pavlim, punn thoinchem udok koddu aslem ani tanchean tem pieunk zalem na. Hea pasot tea zageak Mara hem nanv dilem.
24. Porza Moizesa add gunngunnunk lagli, ti mhonnttali, 'Ami kitem pietoleanv?'
25. Tedna Moizesan Sorvesporacho adar maglo, ani Sorvesporan taka êk lankddacho kuddko dilo. Moizesan to udkant uddoilo, tedna udok godd zalem. Sorvesporan hanga tankam thodde nem' ani kaide samballunk dile, ani thoim tanchi porikxa keli.
26. Tannem mhollem, 'Tumi Sorvesporak tumchea Devak chitan aikot zalear, tachea dolleam mukhar nitt tem korxat zalear,t acheô adnia palltit zalear ani tache nem' samballxat zalear, Hanvem Ejiptkarancher pidda dhaddloleô tosleô ekui tumcher dhaddcho na. Kiteak tumkam piddentlim borim korta to Sorvespor Hanvuch.'
27. Uprant tim Elim' ganvant pavlim; hanga bara zhori ani sot'tôr madd asle; thoim udkachê degek tãnnim aple tombu ubarle.
