1. Tujea bhavak Aaronak ani tachea putank Nadab, Abihu, Eleazar, ani Ithamar hankam soglleank apoun, Israel-porjê modle tankam kuxin kadd. Te mhojê sevek iadnik zatole.
2. Hê zhuttiechea man-vhoddponnak sobtat toslim Aaronak, tujea bhavak, povitr vostram korun ghe.
3. Huxar-hikmotiche ani vixexi kamgar asat tankam apoi, ani hanvem tankam gunn dileat te tãnnim Aaronak iadnikachim vostram toiar korunk upeôgak launk zai, oxem tankam sang kiteak to mhojê sevek bhettoilolo asa.
4. Êk hodd'ddeachi pati, ek efod, êk kobai, ek bordad-khomis, muddaso-tôp, ani ek potto. Tannim him sogllim povitr vostram Aaronak ani tachea putank toiar korunk zai, ani te iadnik koxe mhoji seva kortole.
5. Hea vostrank tãnnim nillem, zambllem, ani tambddem lonv-sut, bhangarachem sut ani barik sonni lugott vaprunk zai.
6. Efod tãnnim nillea, zambllea, ani tambddea lonv-sutan, ani bhangari-sutan barik sonni lugttacher bordad korunk zai.
7. Donui bhuzancher don fintam aschim, ani him donui kuxink bandun dhôrchim.
8. Teach jin'sachea lonv-sutamnim vinnlolo êk potto taka lavun donui pontam ek korchim.
9. Don quartz-fator gheun tancher Israelachea bara-i kullanchim nanvam kantounchim,
10. tanchê zolmanchê manddavollin, sov-sov nanvam eka-eka fatracher.
11. Xilpkarachê kolê udexim, hem hik-motichem kam', Israelachea putanchim nanvam, hea don fatrincher kantoun kadd.
12. Bhuzancher fintam asat thoim te bhangaran nettoun ghal, hê porim, Aaron Sorvespora mukhar Israelachea bara kullancho ugddas ani nanvam aplea don bhuzancher haddtolo.
13. Don bhangaracheô gollsoreô kôr ani tankam don kordanv
14. koxe distat tê porim vôllun kel'leô, osol bhangaracheô sorpolleô lambounk zai.
15. Ek mon'subechi hodd'ddeachi pati kôr. Efod kortat toslenchs samonn tika vapurchem, ani teach jin'san ti bordad korchi; Bhangari, nillea, zambllea ani tambddea lonv-sutan ani barik sonni-sutan ti korchi.
16. Ti choukon ani dhoddloli zaunk zai; ordo hat lamb ani ordo hat rund.
17. Char harimnim tin-tin mannkam-fatôr ticher bosounk zai: Sord, topaz ani emerald, poilê harik;
18. garnet, sapphire, ani diamant, dusrê harik;
19. hyacinth, rubi ani amethyst, tisrê harik;
20. beryl, carnelian, ani jasper, chovthê harik. Him sogllim mannkam bhangaran bandunk zai.
21. Eka-eka fatrar Israelachea eka-eka putachem nanv kantounk zai.
22. Hodd'ddeachê patik osol bhangaracheô, vôll ghalun, kordanv koso, don sorpolleô kôr.
23. Don bhangaracheô mudiô korun teô patiechea voilea donui konxeank lai,
24. ani ek-ek tea sorpolleanchem pont donui mudiank ghôtt kôr.
25. Bakichim don pontam bhuzanchea donui gollsoreank lai, hê porim tim efodachea fintank fuddlean lagtolim.
26. Don bhangaracheô mudiô korun, heô patiechea sokoilea donui konxeank lai, pondchean ani efodak tenkun.
27. Anink don bhangaracheô mudiô kôr ani heô efodachea sokoilea donui pontank, matxe pottea voir lai.
28. Eka nillea dorean heô mudiô efodachea gollsoreank band, hê porim hodd'ddeachi pati lambchina, punn ti efodachea pottea voir ghott tharoun urtoli.
29. Povitr Zagear bhitôr sortana, aplea kallzar, Aaron hi mon'subechi hodd'ddeachi-pati Sorvespora mukhar ghaltolo ani Israelachea bara putanchea nanvancho sodanch ugddas kortolo.
30. Urim ani Thummim mon'subechê hodd'ddeachê patient ghale mhonnttôch, Aaron Sorvespora mukhar ieta tedna sodanch heô donui vostu aplea kallzar gheun ietolo. Hê porim Aaron Sorvespora mukhar sodanch aplea kallzar Israel porjechi mon'subi haddtolo.
31. Efoda voir ghaltat ti kobai soglli nillea lonv-sutachi vinnunk zai.
32. Voir, tokli ghalunk tika gollo asunk zai ani pinzona zaunk taka êk deg vinnun ghottai diunk zai.
33. Sogllê sokoilê degê bhonvtim nillea, zambllea, ani tambddea lonv-sutan dall'mam bordad korunk zai, ani hanchê eka-eka modem, bhangarachea dhagean, êk-êk ghanttli ghalchi.
35. Iadnikachi zhutti pallta titlê-i pavtti Aaronan ti kobai ghalchi, tôr, to Povitr Zagear mhojê mukhar ietana ani thoincho bhair sortana tea ghanttleancho avaz aikunk ietolo; hê porim to morchona.
36. Osol bhangarachi gulaba sarki êk pati kôr ani ticher him utram kantoi 'Sorvesporak Sonvskarlolo.'
37. Eka nillea fitan ti pati fuddlean muddaseak bandchi.
38. Aaronan ti aplea kopolak ghalchi, hê porim, Sonvskarlolea povitr vostumnim ani povitr dan-dennim ditana Israel porjen adharloleô chuki Aaron apnnacher ghetolo. Hi pati sodanch tachea kopolar astoli, hê vorvim Sorvespor Israelachim danam svikar kortolo.
39. Aaronachem khomis ani tacho muddaso barik sonni lugttachim zaunk zai; tech porim to boro bordad kelolo potto.
40. Aaronachea putank khomsam, potte ani topiô kôr, hea vorvim tankam vhodd man ani vhoddvik melltolim.
41. Aaronak ani tachea putank tum tim nhesoi. Magir tankam tel laun tanchi makhnni kôr ani iadnik koxe, mhojê sevek tanchi sonvskarnni kôr.
42. Sonni lugttachim tankam mottvim kolsanvam kôr, benddak thaun zangllancher porian pavtat toxim, hê porim tanchi vinglli kudd tannim dampchi.
43. Aaron ani tache put sodanch him kolsanvam ghalun Bhiradd Tombunt toxench vedichi seva korunk Povitr Zagear ietole. Te meklle vochot tôr, te apnnacher guneanv ghetole ani mortole. Ho kaido Aaronan ani tachê sonstin sodankal pallunk zai.'
