1. Nillea, zambllea, ani tambddea lonv-sutan iadnikank nhesunk sevadhormik vostram kelim. Povitr sthanant Sorvesporachi seva korit tedna te tim nhestale. Sorvesporan Moizesak formailolê porim Aaronak tannim povitr vostram kelim.
2. Sonni-lugttachem, ani nillea, zambllea, ani tambddea lonv-sutachem ani bhangari dhageachem efod kelem.
3. Bhangaracheô patiô dhaddaun-boddoun tanche patoll-barik kuddke katorle, ani sonni-lugttant ani rongi-lonvent bhôrxile.
4. Taka bhuzancher fintam lailim, ani tim sokol donui kuxink haddun bandunk zatalim.
5. Sorvesporan Moizesak formailolê porim nazuk vinnlolo potto efodak lailo, hê porim sogllem ekuch nog zalo.
6. Mannkam-fator katrun te bhangaran bandle; hikmotin, Israelachea bara kullanchim nanvam tancher kantoilim.
7. Sorvesporan Moizesak formailolem tea pormannem Israelachea bara kullancho nirontorim ugddas korchê khatir, he fator bhuzanchea fintancher laile.
8. Efod kel'lem teach lugtta-sutachem ani tech porim xrungar lavun, tannim hodd'ddeachi-pati keli.
9. Ek sarko chovkon, dott'tti aslo: ordo hat lamb ani ordho hat rund.
10. Char vollimnim, tin-tin mannkam-fator bosoile: poilê vollint tin sard, topaz, ani emerald;
11. dusrê vollint: garnet, safir, ani diamant;
12. tisrê vollint: hyacinth, ruby, ani amethist;
13. ani chovthê vollint: beryl, cornelian, ani jasper. Heô soglleô volli bhangaran bandloleô.
14. Israela-chea bara kullanchea ugddasak, eka-ekacher Israelachea eka-eka putachem nanv aslem.
15. Vôll ghalun, kordanv koso, xud'dh bhangaracheô sorpolleô keleô.
16. Tea bhair, don bhangaracheô gollsoreô ani don mudiô; heô mudiô voilean donui konxeank laileô.
17. Hankam sorpolleanchem ek-ek pont ghôtt kelem
18. ani urlolim don pontam tea gollsoreank lailim ani bhuzanchea donui fintank sokol fuddlean ghôtt kelim.
19. Don bhangaracheô mudiô sokoilea donui konxeank laileô bhitorlê vatten efodachê degê-xim.
20. Anink don bhangaracheô mudiô efodachea fintank ani matxeô pottea voir.
21. Sorvesporan Moizesak formailolê porim, hodd'ddea-patiecheô mudiô nillea dhorean efodachea mudiank ghott keleô, hê porim ti pati pottea voir ghôtt urli.
22. Efoda voir ghaltat ti kobai soglli nillea lonv-sutachi vinnloli.
23. Tokli ghalunk, voilean êk gollo dovorlo ani to pinzona toso boro mêttlolo.
24. Moizesak Sorvesporan sanglolê porim, sogllê sokoilê degek, barik sonni-lugttachim ani nillea, zambllea, ani tambddea lonv-sutan vinnlolim, dall'machim chitram lailolim, ani êk sôddun ek, osol bhangarachi êk-êk ghanttli lailoli.
27. Aaronak ani tachea putank tannim vostram kelim,
28. ani muddaso, topiô, sonni-lugttachim mottvim kolsanvam,
29. ani Moizesak Sorvesporan sanglolê porim barik sonni-lugttache potte, nillea, zambllea, ani tambddea lonv-sutan nettoilole toiar kele.
30. Xud'dh bhangaracho êk toktto povitr sonvskarnnechi khunna -'Sorvesporak bhettoilolo' him utram tacher kantoilolim,
31. ani Sorvesporan sanglolê porim nillea kordanvan to thoktto muddaxeak fuddlean kopolak bandlolo.
32. Hê toren, Zomatichea-Tombucho, Bhiradd-Tombuncho, sogllo vavr purnn zalo. Sorvesporan Moizesak sanglolem toxench ani Israel porjen sogllem kelem.
33. Sorvesporacho Bhiradd Tombu ani Zomaticho Tombu ani sogllem tachem samonn tannim Moizesa-xim haddlem: tache ganch-ankdde, faskeô, khambiô, khambe ani tanchim peddam;
34. menddrea-chambddeachem tambddem kap; nazuk chambddeachem kap ani bhitorlo podd'ddo;
35. Korarachi Arkpett ani tache dandde ani dhampnnem;
36. mez ani tachem samonn ani Sorvesporak bhettoil'le undde;
37. xud'dh bhangarachem divea-sthan, tacheô divliô - divlianchi sarwall - ani sogllem tachem urlolem samonn, ani divleank tel;
38. bhangarachi vedi; makhnnechem tel; pormôllit dhump; tombuchea daracho podd'ddo;
39. pitullchi vedi ani tachi pitullchi tatti, tache dandde ani sogllem tachem samonn; tost ani tachem pedd;
40. oddpache podd'dde ani tache khambe ani peddam; oddpachea daracho podd'ddo ani tachim doram; tombucheô kalxi, ani sogllem Bhiradd-Tombuchea dhormik ritink ani Zomatichea-Tombunt vapurchem samonn
41. povitr sthanant vapurchim sevadhormik vostram iadnik Aaronachim povitr vostram, ani tachea putanchim vostram te iadnik koxe seva kortana.
42. Sorvesporan Moizesak formailolem tê porim, Israel-porjen sogllo vavr puro korun dilo.
43. Moizesan sogllo vavr bhariksannem topaslo, ani khorench sogllem Sorvesporan formailolem tea pormannem tannim kel'lem. Ani Moizesan porjek axirvad dilo.
