1. Uprant Sorvesporan Moizesak mhollem, Tum ani Aaron, Nadab, Abihu, ani Israel-porjeche sot'tor vhoddil hanga voir-dongrar mhojê-xim ieat, ani bore pois ravun, Mhaka nomoskar korat.
2. Moizesuch Sorvesporak lagim sortolo, dusre konn ieunche na, nhoi mhonn porza tachê borabor voir ieunchi na.
3. Moizes ailo ani tannem porjek Sorvesporan dil'leô soglleô adnia kollit keleô ani soglle hukum'. Porjen ekach tallean mhollem, 'Sorvesporan formailam titlem-i ami palltoleanv.'
4. Moizesan soglleô adnia boroun dovorleô ani dusrea disa bhov sokallim, Israelachea bara kullanchea nanvan bara fator gheun, dongrachea pãia-xim êk vedi bandli.
5. Uprant thoddea tarunn Israelitank Sorvesporachea manak hom' ani boilanche xantiche iodn korunk laile.
6. Ordem rogot Moizesan tostant ghalem ani urlolem ordem vedicher ximpddailem.
7. Uprant, Korarachem Pustok gheun tannem tem porjek vachun dakhoilem; ani tãnnim mhollem, 'Sorvesporan formailam tem sogllem ami palltoleanv; tachem ami aikotoleanv.'
8. Uprant Moizesan rogot ghetlem ani porjecher xinvôr marun mhollem, 'Sorvesporan tumchê kodde kel'lea Korarachem hem rogot; ho Korar soglleô heô adnia atthapta.'
9. Uprant, Moizes, Aaron, Nadab, Abihu, ani Israel-porjeche sot'tôr vhoddil voir dongrar gele
10. ani tãnnim Israelachea Devak dekhlo. Tachea paiam tolla êk nillea rongacho monch aslo, ani to mollba itlo nigut.
11. Devan hea Israelachea mukheleank kainch vaitt kelem na; khorench tãnnim Devacher nodor ghali ani magir te jevle-piele.
12. Sorvesporan Moizesak mhollem, 'Tum mhojê-xim dongrar voir ie, ani thoinch rav ani somurt ani updes boroil'leô, tuka don fatriô ditam. Hanchê udexim lokak tujean xikovnn diunk zatoli.'
13. Moizes ani tacho adari Joshua toiar zale, ani Moizes Devachea dongrar vochunk laglo.
14. Moizesan porjechea vhoddilank mhollem, 'Ami porot ie-sor tumi hanga tombunt ravat. Aaron ani Hur hanga tumchea sangata astole. Konnachoi khottlo suttavo korcho asot zalear, tannem tanchê-xim vechem.'
15. Uprant Moizes dongrar choddun gelo, ani dongor eka kupant liplo.
16. Sinai dongrar Sorvesporachi mhoima denvli. Ani eka kupan sôv dis porian to dongor lipoilo. Satvea disa, Sorvesporan kupantlean Moizesak ulo kelo.
17. Israel porjechê nodrê mukhar, Sorvesporachi mhoima dongrachê tenkxer ek ujeachem agttem koxem distalem.
18. Ani Moizes tea kupant bhitôr sorlo ani dongrar choddun ghelo. Moizes dongrar challis dis ani challis rati ravlo.
