1. Dhump hulpaunchê khatir, babhul lankddachi êk vedi kôr.
2. Hi chovkon zaunk zai: êk hat lamb, êk hat rund, ani don hat unch. Char-ui konxeank xingam asun, sogllem ekuch nog zaunk zai.
3. Voilean ani char-ui kuxink ani xingank osol bhangaracheô patieô mar, ani sorvbhonvtim bhangarachi êk deg lai.
4. Degê sokla donui kuxink don bhangaracheô mudiô lai, ani ukhlun vhorpak tantunt don dandde ghalche.
5. He dandde babhul lankddache ani te bhangarachê patient bhôrche.
6. Hi vedi Korarachi Arkpett asa tea podd'ddea bhailean Arkpettek aslolea dampnnea mukhar dovorchi. Hanga hanv tuka bhett'tolom.
7. Dôr sokallim, Aaron divlecho samball korunk ieta tedna, to hê vedir pormollit dhump hulpaitolo.
8. Tech porim, sanjecheô divleô pettounk ieta tedna-i. Pinddkechê pinddkek ho dhump Sorvespora mukhar hulpaunk zai.
9. Mona-kel'lo dhump hê vedicher bhettoum naka; tech porim, zonavorachi vô orovachi bhett hê vedicher korchi nhoi, ani tacher soro-i votouncho nhoi.
10. Vorsak êk pavtt, Farikponnachea Disa, Aaronan vedi xud'dh korchi rit pallunk zai patkachea farikponnak bhettoilolea zonavorachem rogot char-ui xingank lavun, apnnach pasot ani fuddlea tumchea pillgam pasot to hem farikponn kortolo. Hi vedi Sorvesporak bhettoiloli bhov povitr asunk zai.
11. Sorvesporan Moizesak uloun mhollem,
12. Israel-porjechi lôkgonnti kortai tedna, tanchê modem koslich pidda-pest zaunchi nhoi mhonn dôr mon'xan aplea jivita khatir Sorvesporak ek suttkê-dan farik korunk zai; hê porim, lôkgonnti kortana, hea mezpant hixobak asat tãnnim tharailoli potti diunk zai.
13. Lôkgonnttechea hixobak asat tannim soglleamnim ordo shekel farik korcho povitr sthanachea shekelachea mola pormannem: eka shekelak vis gerah. Ho ordo shekel Sorvesporak kuxin kaddlolem dan.
14. Vis vorsam vô odik hê lôkgonntin asat titlea-i lokan hi potti diunchi.
15. Girest asa tannem ogllem diunchi goroz na, vô durbollan unnem diunchem nhoi.
16. Sorv Israel-porjê koddsun ti potti vosul kôr ani mhozo Bhiradd-Tombu samballchea khorchak ti vapur. Tumchea jivita khatir hem suttkê-dan Israel porjek Sorvespora mukhar ek ugddas.'
17. Sorvesporan Moizesak uloun mhollem,
18. Hat ani paim dhuvunchê khatir, ek pitullchem tost kôr, ani taka pitullchench pedd kôr. Tem Tombu ani vedi modem dovor, ani tantunt udok ghal. Tea udkan Aaron ani tache put aple hat ani paim dhutole.
19. Tombunt bhitôr sorchê adim vô seva korunk vedi-xim vetat tedna ani Sorvesporak ujeachi bhett korunk vetana, tea tostant aple hatani paim dhutole. Na tôr te mortole.
21. Tancho jiv vochona zaunk tãnnim aple hat ani paim dhuvunk favo. Ho kaido tãnnim ani tanchê sonstin sodankal pallunk zai.'
22. Sorvesporan Moizesak mhollem,
23. Boreantlo boro sambhar ghe: pãixim shekel, tazo gondros; oddexim shekel, pormôllit tiki; oddexim shekel, pormôllit voikhond;
24. pãixim shekel, holki tiki povitr sthanantlea shekelachea mapa pormannem tokchem; ani zoitunachea telachem ek hin
25. Sogllem misôll kôr, ani makhunk pormôllit povitr tel zatolem.
26. Hea telan makhtoloi teô vostu heô: Mhozo Bhiradd-Tombu, Korarachi Arkpett,
27. povitr unddeanchem mez ani tachem samonn, diveachem sthan ani tachem samonn, dhumpachi vedi,
28. hom'-bhettechi vedi ani tichem samonn, ani udkachem tost ani tachem pedd.
29. Hê porim heô soglleo vostu hea telan tum sonvskartoloi ani teô bhov povitr zatoleô, ani kitench tankam tenkot zalear povitr zatolem
30. Magir, Aaronak ani tachea putank makhtoloi, ani iadnik koxe mhoji chakri korunk tanchi sonvskarnni kôr.
31. Israel-porjek oxem sang, 'Hem makhnnechem tel povitr tumchê khatir sogllea tumchea pillgank.
32. Tem samania monxanchê kuddicher otounchem nhoi, ani tê torechem tel tumi toiar korchem nhoi. Tem tel povitr ani povitr koxem tumi tem lekchem.
33. Konn-ui tor oslem tel korit, vô iadnik nhoi taka lait, to mhojê porjê bhair poddtolo.'
34. Sorvesporan Moizesak mhollem, 'Eksarkea mapan hea char jin'sancho sambhar ghe: rezin, alfagem, srikand, ani xud'dh gondros; tim borim misôll kôr ani tanchi pudd kôr.
35. Ho pormôllit dhump zaun astolo, mitt ghallo saf ani povitr.
36. Tantlo ilo pitto gheun mhojea Bhiradd-Tombunt voch, ani Korarachê Arkpettê mukhar ximpddai. Thoim Hanv tuka bhett'tolom. Ho bhov povitr dhump koso lek.
37. Toslo dhump tujê gorjek vaprum naka, ani korum-i naka; to fokot Sorvesporak bhettoilolo dhump. Konn-ui toslo dhump aplea upeôgak pormôll koso lait, to mhojê porjê bhair poddtolo.'
