1. Sorvesporan Moizesak mhollem, 'Ejiptacher ani Faraohcher anink êk khast dhaddtolom. Tea uprant to tumkam vochunk ditolo. Khorench mhollear, to tumkam hangachim dhanvddaitolo.
2. Dôr-eka dadlean ani bailen ap-aplea xezarea-lagim bhangarache ani rupeache nog magche mhonn, Israel porjek sang.'
3. Sorvesporan Ejiptkaranchem mon Israel-porjê thaim dulob zai-xem kelem. Khoreponnim, te Faraohche opxal ani sogllo lôk Moizesak Ejiptant êk vhodd manacho monis koso lekhtale.
4. Moizesan mhollem, 'Sorvespor oxem mhonntta, 'Sumar modian-ratir hanv Ejiptantlean vetolom,
5. ani Ejiptantlo dôr-êk malgoddo put mortolo, Faraohcho put sôdrer choddcho asa to daiji zanv, vô dantear dollta tê nimannê chakornicho put to zanv. Toxench, gorvam-vasrantlim sogllim poilim poram morun vetolim.
6. Kednanch poddunk na ani fuddarak poddchemna toslem mottem vilap-roddnem ak'khea Ejiptant poddtolem.
7. Punn Israel porjê modem, zaum eka mon'xa, zaum eka zonavora add ek sunnem legun bhonkchem na.' Tedna, Sorvespor, Ejiptkaram ani Israelitam modem ontor korta mhonn tuka kollit zatolem!'
8. Magir soglle he tuje opxal mhojê-xim ieun apli man bagaitole, ani mhonnttole: 'Bhair sor, tum ani tuzo pattlav korta ti soglli porza! Ani tednach hanv hangacho bhair sorun vetolom.' Ani mottê tiddken Moizes Faraohchea fuddeantlo koddsorlo.
9. Sorvesporan Moizesak sanglem, 'Faraoh tujem utor aikuncho na; hea vorvim, hanv anink mhoje vhodd chomotkar Ejiptant korun dakhoitolom.'
10. Moizesan ani Aaronan Faraoh mukhar zaitim ojapam kelim. Punn Sorvesporan Faraohchem kalliz darunn kelem ani to Israelachea putam-dhuvank aplo dês sôddunk dina zalo.
