1. Sorvesporan Moizesak mhollem, 'Chol, Faraoh-xim voch ani taka sang: Sorvespor oxem mhonntta, 'Mhaka bozchê khatir mhojê porjek vochum-di.
2. Tum tika vochunk dinaim zalear, tujea ak'khea desant bebe dhaddun khast laitolom.
3. Nil nodint te chikar astole, ani thoinche te ieun tujea rajmhalant bhitôr sortole, tum nhidtai thoim, tujê khattir, tujea opxalanchea ani lokachea ghoramnim, tumchea fornam-bhattiamnim, sogllea aidonamnim.
4. Te tujer, tujea opxalancher ani lokacher uddiô martole.'
5. Sorvesporan Moizesak mhollem, 'Aaronak sang, 'to danddo sogllea nodincher, kholliam-tolliancher vistarun dhôr, ani Ejiptachea desant soglleak bebe ieum-xekôr!'
6. Tor Aaronan danddo udkacher vistarun dhôrlo, ani bebe ieun sogllea ganvant bhorle.
7. Punn ghaddiamnim-i, ghaddieponn korun, Ejiptachea desant bebe apoun haddle.
8. Tedna Faraohn Moizesak ani Aaronak apoun mhollem, 'Mhojê ani mhojê porjê sorxile he bebe kaddun uddoi mhonn Sorvespora kodde magat, ani magir hanv porjek, Sorvesporak bolidan bhettounchê khatir, sôddun ditolom.'
9. Moizesan zobab dilo, 'Vhoddê khoxen fokot, tujê khatir, tujea opxalam ani tujê porjê khatir, hanvem kedna magchem tem tum tharai. Tedna soglle bebe koddsoron vetole, ani Nil nodintuch te rigun ravtole.'
10. Faraohn mhollem, 'Faleam tujem magnnem kôr. ' Moizesan mhollem, 'Tum sangtai toxem zatolem, ani tedna tuka kollun ietolem, ki Sorvespora, amchea Deva sarko anink Dev na.
11. Tum, tuje opxal, ani tuji porza bebeam mekllim zatolim, fokot te Nil nodint rig ghetole.
12. Moizes ani Aaron thoinche bhair sorun gele, ani Sorvesporan te bebe kaddun uddounk Moizesan Sorvespora kodde maglem.
13. Moizesan maglolê tê porim Sorvesporan kelem, ani ghorantle, rajangnnantle, ani xetantle soglle bebe mele.
14. Ejiptkaramnim te punzaun tancheô raxi keleô, ani sogllea desant ghann-ghutthann poddli.
15. Punn jedna Faraohk matxi dilai disli, to dharunn zalo, ani Sorvesporan sanglolê tê porim, Moizesak ani Aaronak to aikona zalo.
16. Tedna Sorvesporan Moizesak mhollem, Aaronak sang, 'To danddo gheun zomnichê dhullicher mar, ani ak'khea Ejiptant zomnichi dhull asa ticheô zollari zatoleô.'
17. Aaronan aplo danddo zomnicher marlo, ani Ejiptantlê sogllê dhullicheô zollari zaleô ani teô monxank toxem zonavorank lagleô.
18. Tachea ghaddiamnim toxench korunk zaito bhar ghetlo punn tanchê-kodde ghoddlem na.
19. Soglleak zollari polleun, tea ghaddiamnim Faraohk mhollem, 'Hem Devachem bott!' Toriastana Faraoh dharunnuch ravlo, ani Sorvesporan sanglolem toxem, Faraoh Moizesak ani Aaronak aikona zalo.
20. Sorvesporan Moizesak mhollem, 'Faleam, bhov sokallim, to nodi-xim veta tedna Faraohk vochun mell ani taka sang, 'Sorvespor Dev oxem mhonntta: Mhaka bozchê khatir, mhojê porjek vochum-di.
21. Punn tankam vochunk dina zaxi zalear, hanv tujer, tujea opxalancher, tujê porjecher ani tanchea ghorancher musanchem bhirem dhaddtolom. Ejiptkaranchea ghoramnim, ani tim ubim ravtat tê zomnicher musanchi ras poddloli astoli.
22. Punn tea disa mhoji porza ravta to Goshen ganv hanv khuxin kaddtolom, thoim mus aschenant. Ani Hanv, Sorvespor, hea desa modem asam mhonn tumkam kollon ietolem.
23. Mhojê ani tujê porjê modem hanv ontor ghaltolom. Ani hem vismit faleam ghoddtolem.'
24. Sorvesporan oxem kelem Faraohchea mahalant ani tachea opxalanchea ghoramnim ani Ejiptachea ak'khea desant vhoddlim musanchim bhirim zomun ailim. Hea musamnim ak'khea desachem nisontton kelem.
25. Tedna Faraohn Moizesak ani Aaronak apoun haddle ani tankam mhollem, 'Vochat, ani heach desant tumchea Devak bolidanam bhettoiat.'
26. Punn Moizesan taka zobab dilo, 'Hem sarkem nhoi, kiteak Sorvespora amchea Devak ami zonavorancheô bhettô kortanv tem polleunk Ejiptkarank êk kantallo haddpachi vost. Hankam okman zata toslim zonavoram bhettoitanv tem polleun, amkam te fatraunche nant?
27. Sorvespora amchea Devan amkam formailolem asa tê porim, taka bhettô korunk, oronneant tin disanchi iatra ami kortoleanv.'
28. Tedna Faraohn mhollem, 'Oronneant tumi chodd pois vochonant zalear, Sorvesporak tumchea Devak bhett korunk iodn bhettounk rojea ditam. Mhojê khatir magat.'
29. Moizesan zobab dilo, 'Hangasorlo vochona fuddem, Sorvespora kodde magtolom. Faleam he mus tujê sorxile, tujea opxalam ani porjê sorxile pois vetole. Punn Sorvesporak iodn bhettoum-di; porjek addaun dhôrun tunvem aniek pavtt amkam fosounk favona.'
30. Moizes Faraoh sorxilo gelo ani tannem Sorvesporak magnnem kelem.
31. Ani Sorvesporan tachem magnnem aikolem. Ani Faraoh thaun tachea opxalam ani tachê porjê sorxile soglle mus gele.
32. Punn he-i pavtt Faraohn aplem kalliz dharunn kelem, ani porjek vochunk dilem na.
