1. He kaide tunvem tankam diunk zai:
2. "Hebrev-loka modlo tumi êk chakor vikto ghexeat zalear, to sov vorsam tumchi chakri kortolo. Satvea vorsa, tannem tumkam kãich farik korinastana, to aplo sot'techo zatolo.
3. Tumcho chakor zal'lo tedna to kazari-nhoi aslo zalear, tannem kazari-nhoi - heach besar vechem punn tea adim to kazari zalear, to sot'techo veta tedna tachê bailen tachea borabor vechem.
4. Tachea dhonian taka bail korun dili, ani hika put vô dhuvô zolmoleô zalear, ti bail ani bhurgim tachea dhoniachim, ani veta tedna tannem ekleanuch bhair sorun vechem.
5. Punn, zôr ho chakor aplea dhoniacho ani aplea bail-burgeancho môg korta, ani apnnak sot'tea naka mhonn sarkem sangun diit zalear,
6. tedna Tacho dhoni taka Deva mukhar haddtolo ani uprant dara-xim vô darachea khambea-xim, tacho dhoni tacho kan eka topnnan toptolo. Hê porim to sodanch chakoruch koso tachi seva kortolo.
7. Eklo-konn aplê dhuvek chakorn koxi vikit zalear, tika purus chakram porim suttka diunchi nhoi.
8. Tika vikti ghetolo, apli bail korchea monan tika ghet, punn magir taka ti manona zalear, tê chakornik tichea bapaikuch porot vikchi; porkea mon'xank tika vikunk dhoniak odhikar na, kiteak dhonian tika khorea visvasan lekunk na.
9. Eklo-konn aplea putak divunk êk ostori-chakorn vikti ghet, tannem tika chali pormannem aplich dhuv koxi lekunk zai.
10. Eklo-konn apnnak dusri bail korit, tannem aplê poilê bailek adlech porim, jevonn-khann, nhesop-pangrop, ani kazari baileche hok'k diun lekhunk zai.
11. Zôr he tin nem tichê sovem to pallina zalear, tannem tika, farikponn koxem kãich ghenastana sot'tea diunchi.
12. Konnui zobordosten dusrea mon'xacho jiv kaddta, tacho-i jiv kaddunk zai.
13. Punn sadhi chuk zaun, jiv kaddchem taka mon naslem zalear, punn Devachea nirmonnan tachea hatant tem ghoddlem hanv tuka dakhoitolom tea zagear tachean pollun vochum-iet.
14. Punn êk monis ragan ani khaxa ievzonnen khoxe-monan dusreacho jiv kaddta, to mhojê vedi-xim legun gela zalear taka suttka na, bogor tacho jiv kaddcho.
15. Aplea bapaik vô aplê avoik marta tacho jiv kaddcho.
16. Vikchea vô chakor korchea monan, zo konn dusreak tachê khoxê bhair bollan ukhlun vhorta, tacho jiv kaddcho.
17. Aplea bapaicher vô aplê avoicher xirap ghalta tacho jiv kaddcho.
18. Zhogddem-kijil zaun, eklo dusreak fatran vô mutti-hatan marta, punn tacho jiv kaddina, punn taka anturnnar ravchem poddta,
19. punn magir utthun boddi-danddo gheun cholta, jea mon'xan taka marla taka khast aschina punn tannem hea monxacho, sarko boro zai-sor, tacho samball korcho ani to bekar urlolea kallak tannem farik korchem.
20. Eklo-konn, boddi-danddo gheun aplea chakrak, ho dadlo vô bail zanv, marta ani ho chakor vô chakorn thoinchea-thoinch morta, tea monxak khast favo.
21. Punn to chakor vô chakornn êk-don dis porian morona, tea dhoniak khast aschina. Karonn, vikto gheupachea hok'kan to chakor tacho.
22. Dog vô odik eka-meka lagim zhogoddtana, êk gorbhest ostori oxi dukhovt, ki tichem foll ibaddot, punn tika horxem koslich dukh zaina, jea mon'xacho tika mar bosla tannem ticho poti magot tem farikponn diunchem, punn nit-mon'subdaracho tharav saf-thir zaun astolo.
23. Punn tê ostorek mar-ui lagla zalear, martoleak khast oxi: jivak jiv,
24. dolleak dollo, dantak dant, hatak hat, pãiank paim, ujeachea-ghaiak
25. ujeacho ghai, ghaiak ghai, dhopkeak dhopko.
26. Eklo konn aplea, dadlea vô ostorê, chakrak dollear marun to foddta, tea dhonian, dolleachea farikponna khatir, tea chakrak suttka diunchi.
27. Tacho êk dant nikllailo zalear, tea dantachea farikponna khatir, tea chakrak sot'tea diunchi.
28. Êk boil-paddo konnui monxak, dadleak vô ostorek, xingar kaddun taka jivexim marta, tea boila-paddeak fatraun marcho, ani tachem mas khaunchem nhoi; punn tachea dhoniak khast aschina.
29. Punn to boil-paddo sodanch hê porim lokachea angar ietalo, ani tachea dhoniak sangun-ui tea boilak tannem bandun dovorlo na, tedna to monis morot zalear, tea boil-paddeak fatraun marcho, ani tachea dhoniacho-i jiv kaddcho.
30. Toriastana, tea boil-paddeak dhoni, aplo jiv vattaunchê khatir, dondd farik korunk kobul zait, tedna hannem ak'kho tharailolo dondd farik korcho.
31. To paddo-boil xingar kaddun eka cheddeak vô cheddvak marit zalear, tech kaide lagtat.
32. To paddo-boil eka dadlea vô bailê chakrak marit zalear, tea zonavorachea dhonian chakrachea dhoniak rupeache tis duddu farik korche, ani tea zonavorak fatraun marchem.
33. Eklo-konn khônnichem dampnnem kaddta ani tem porot zagear ghalina, vô êk khônn marta ani dampnnem ghalina, ani tê khônnint êk boil vô êk ghaddum poddot,
34. tannem tea zonavorachea dhoniak tachem mol farik korchem ani melolem zonavor tachean apnnak dovorum ieta.
35. Ekachea boilan dusreachea boilak jivexim marlear, tea dogaim dhoniamnim jivea boilak vikcho ani tache poixe ek sarke vanttche; tech porim mel'lea zonavorachem masui vanttun gheunchem.
36. Punn soglleanchê vollkhichem tor ki to boil - paddo xingar kaddunk sodanch lokachea angar vetalo mhonn ani dhonian taka sanglea-i uprant bandun dovorlo na, tedna tannem taka boil-paddeak boil-paddo diuncho ani tachean tem mel'lem zonavor apnnak dovorum-iet.
