1. Devan Moizesa ani Israel aplê porjê vixim kel'lem, odik korun koxê porim Sorvesporan tankam Ejiptantlim bhair kaddun haddlim tem sogllem aikun, Jethro, Midianacho êk iadnik, Moizesacho sasro, Moizesak bhett diunk ailo.
2. Ietana, apnna borabor tannem Moizesachê potinik Zipporak ani tachea dogam putank haddlim. Moizes Ejiptant gel'lo tedna, tannem aplê potinik ani dogam putank tichea bapai-xim dhaddlolim.
3. Ekleachem nanv Gershom' mhonngê 'Hanv eka porkea ganvant pordexi aslom' oxem Moizesan apnnakuch mhonnlolem, ani tem nanv dil'lem.
4. Ani 'Mhojea bapaicho Dev mhozo adar, ani Faraohchê tolvarintlo mhaka nivarla', dekhun, Eliezer hem dusreachem nanv.
5. Jethro, Moizesacho sasro, Moizesachê potinik ani bhurgeank gheun, oronneant Devachea dongra-xim Moizesan aplo tombu ubarlolo aslo thoim pavlo.
6. Moizesak sangunk dhaddlem, 'Tuzo sasupai Jethro, tujê ghorkarnni ani tujea dogam bhurgeam borabor ieta.'
7. Hê porim Moizes aplea sasupaik mellunk gelo, oddov ghalun taka noman kelo ani taka umo dilo. Ekamekachi khobor ghetlea uprant, te Moizesachea tombunt gele.
8. Sorvesporan Israel porjê khatir Faraohk ani Ejiptkarank kitem kel'lem, tem sogllem Moizesan aplea sasreak sanglem. Kosleô oddchonneô porjen vatter sõscheô poddleô ani koxê porim Devan tika nivarli hem-i tannem taka sanglem.
9. Israelitank Sorvesporan Ejiptkaranchea chopkeantlim nivarlim mhonn aikun, Jethro Sorvesporachea sogllea boreponna khatir khub sontoslo.
10. Jethro udgarlo: 'Ejiptkaranchea ani Faraohchea chopkeantlim tumkam soddoilim dekhun Sorvesporak vakhann'nni!
11. Sorvespor sogllea devam poros vhoddlo mhonn atam mhaka kollun ailem. Israelitam lagim Ejiptkar urmottponnan vagle dekhun, tannem toxem kelem.
12. Uprant, Jethron, Moizesachea sasupain hom' ani dusre iodn Devak bhettoilim; ani Aaron ani Israelache soglle zannte aile ani Moizesachea sasupai borabor, Deva hujir jevle.
13. Dusrea disa, Moizes porjê modem uzot-kijilam mittoitalo, ani sokallim thaun sanz porian lôk tachê bhonvtonnim ubo aslo.
14. Lokak hem sogllem korta tem polleun, Moizesachea sasrean taka mhollem, 'Hem sogllem tum porjek kortai tem kitem? Sokallim thaun sanz porian tum ekloch kiteak porjeche prosn gheun boslai, ani porza sokallim thaun tujê bhonvtonni ubi asa?'
15. Moizesan aplea sasupaik zobab dilo, 'Kiteak Deva vixim porza mhojê-xim hem ani tem vicharunk ieta.
16. Dogam modem uzot-kijil ubzot tedna-i tim mhojê sorxim ietat ani hanv tem tanchê modem tharear ghaltam, ani Devache nem'-kaide-I tankam kollit kortam.'
17. Moizesachea sasupain taka mhollem, 'Tum kortai tem sarkem nhoi.
18. Oxem korun tunch thoktoloi ani porza-i ubgovtoli, karonn ho vaur bhov kotthin tuka. Ekleachean hem sogllem kam' korunk zaina.
19. Atam tuka mhoji budh ditam, ti tum aik, ani Devuch tujê sovem asum! Tum porjecho protinidhi Deva mukhar, hem khorem.
20. Ani porza Deva mukhar aple prosn ghalunk, tunvem tankam nem'-kaide xikounk ani kosli vatt tannim dhôrunk zai ani koxim tannim vagunk-cholunk zai - hem sogllem tujem kam'.
21. Toriastana tunvem porjê modle, ikmotin huxear ani Dev-bhirantiche monis, khatreche ani lonch ghena tosle tunvem vinchun kaddunk zai ani hozaram, vô xemboram, vô pon'nas ani dha zonnam voir ek-ekleak tunvem nemunk zai ani sogllea vellar tanchean lokachi nit korunk zatoli.
22. Hanchean dôr-êk lhan prosn suttavo korunk zata, punn vhôdd kotthin prosn tujê-xim ietole. Ani te tujea vavrak khand marun tuzo bhar lohu zatolo.
23. Oxem tunvem kelear - Devan oso tuka hukum' diuncho - vauracho bhar sõsunk tujean ghoddtolem ani ho sogllo lôk-ui somadhan zaun, ap-aplea ghora portotolo.'
24. Moizesan aplea sasupaichi budh manun ghetli, ani sarkem tachea sangnnea pormannem kelem.
25. Moizesan sogllê Israel porjê modle favo tosle ikmotin huxear tosle monis vinchun kaddle. Hozaram, xemboram, pon'nasam, ani dha zonnam voir odhikari tankam nemle.
26. Te disa-dispottim porjeche mon'subdar zaun asle, ani dakhtte prosn apunnuch suttave kortale, fokot vhoddle ani kotthin prosn te Moizesa-xim dhaddun ditale.
27. Uprant, Moizesan aplea sasupaik tachê vatter ghatlo ani to aplea ganv-ghora portun ghelo.
