1. Elima thaun bhair sorun, Israelachea putam-dhuvanchi soglli urponz, Ejiptantli bhair sôrtôch, dusrea mhoineachê pondravê tarker Elim' ani Sinai modem aslolea Sinachea oronneant pavli.
2. Ani Israelachea putam-dhuvanchi soglli urponz Moizesacher ani Aaronacher gunngunnunk lagli.
3. Tãnnim mhollem, 'Ejiptachea desant Sorvesporachea hatan kiteak tumi amkam morunk diunk nant? Thoim masan bhòrlolea aidonam-xim bosun ami pott-bhôr undde khataleanv. Hê sogllê urponjik bhuken marunk tumi amkam hea oronneant haddleant!'
4. Tedna Sorvesporan Moizesak mhollem, 'Hanv tumkam sorgar thaun pausa bhaxen undde dhaddtolom. Dôr-disa apnnacho dispotto giras ektthaim korunk lôk bhair sortolo. Tumi Mhozo kaido samballtat vô na tem polleunk hê bhaxen Hanv tumchi porikxa korunk sôdtam.
5. Sovea disa, punzailam tem toiar kortôch, dispottim ektthaim kortat tachê poros tem dupett zatolem.'
6. Mhonnttôch Moizesan ani Aaronan sogllê Israel porjek mhollem, 'Sorvesporan tumkam Ejiptantlim bhair kaddun haddleant mhonn tumkam aiz sanjê kollit zatolem.
7. Ani faleam sokallim, Sorvesporacho voibhov tumi polletoleat, kiteak tumi tacher gunngunntale tem tachea kanar pavlam. Tôr tumi amcher tokrar korunk ami konn?'
8. Ani Moizesan mhollem, 'Sorvesporuch tumkam aiz sanjê mas khavunk ditolo, ani falea sokallim tumkam dhadoxi zai sôr unddo, kiteak tachê virudh tumi tokrar kortat te soglle tannem aikoleat. Tor amchi kosli porva? Tumi kortat te tokrar amcher virudh nhoi, punn Sorvesporacher.'
9. Uprant Moizesan Aaronak mhollem, 'Israelachea putam-dhuvanchê akhê urponjik oxem sang: "Tumi Sorvespora mukhar ieat, kiteak Tannem tumchi tokrar aikolea. "'
10. Aaron Israelachea putam-dhuvam kodde uloitana, tãnnim oronneachê vatten nodor marli ani tankam kupachea rupan Sorvesporachem voibhov dixtti poddlem.
11. Tedna Moizesa kodde uloun Sorvesporan mhollem,
12. Israelachea putam-dhuvanchi tokrar Hanvem aikolea. Tankam oxem sang: "Sanjechea vellar tumi mas khatoleat ani sokallim tumkam pott-bhôr undde khaunk melltole.Tedna Hanv tumcho Sorvespor Dev mhonn tumkam kollon ietolem." '
13. Ani oxem ghòddlem: sanjê, lhove uddun aile ani sogllem moidan bhòrlem; sokallim sogllea moidana bhonvtim dôv poddlo.
14. Dôv suktôch, oronneachê sogllê zomnir khovllam bhaxen kitem barik-xem dixtti poddlem. Tem patoll ani borfa bhaxen atthovlolem.
15. Tem polleun, Israelachea putam-dhuvamnim ekamekak mhollem, 'Manna!' mhonngê 'Hem kitem!' Tem kitem tem tankam khobor nasli. Moizesan mhollem, 'Tem tumkam Sorvespor khaunk dita to unddo.'
16. Sorvesporacheô adnia oxeô: zonn-eklean apnnak goroz titlench, ektthaim korchem tombunt aslolea aplea ghorcheanchi sonkia monant dhôrun, zonn-ekleak êk homer map ektthaim korcho.
17. Israel-porjen, sanglolem toxem kelem: konnem chodd, tôr konnem komi ektthaim kelem.
18. Toriastana jedna tãnnim homer mapan mezlem, tedna zannim chôdd punzail'lem tanchem ogllem urlem na ani zannim komi punzail'lem, tankam unnem poddlem na. Zonn ekleak khaunk goroz titlench tannem punzailem.
19. Moizesan tankam mhollem, 'Konnench tem khann faleam meren dovorchem nhoi.'
20. Punn kãi zonnamnim hem kanar dhôrlem na, ani dusrea disak dovorlem taka kidde poddle ani kuslolea porim vas ietalo, dekhun Moizes tancher tikxelo.
21. Dôr sokallim zonn-eklo apnnak khaunk goroz titlem punzaitalo; ani suriachi ghormi chodd zatôch zomnir urlam tem koddon vetalem.
22. Punn sovea disa tannim don disank goroz titlem jevonn punzailem, zonn ekleak don homer mapam. Israel porjeche soglle fuddari Moizesa-xim ieun taka hem kollit kelem,
23. ani Moizesan tankam zobab dilo, 'Sorvesporan oxem formailam, Faleam purnn visovacho dis, Sorvesporak bhettoilolo povitr dis. Bhaztat vô xizoitat tem aizuch bhazat vô xizoiat; ogllem urta tem kuxin faleank dovrat.'
24. Moizesan tankam formailolem tê porim, ogllem urlolem tem tãnnim dusrea disak dovorlem; hem kuslem na vô taka kidde poddlenant.
25. Moizesan mhollem, 'Tem aiz khaiat, kiteak aiz Sonvar, Sorvesporak bhettoilolo dis, ani tumkam tem moidanar aiz kainch mellchem na.
26. Tumi tem sôv dis punzaitoleat, punn satvea disa, Son'vara, tem tumkam kainch mellchem na.'
27. Toriastana, thodde zann satvea disa, tem punzaunk gele, punn tankam kãich melllem na.
28. Tedna Sorvesporan Moizesak mhollem, 'Kedna pasun tumi mhojea hukumank ani kaideank pallo divunk patthim sortoleat?
29. Monant dhôrat ki Sorvesporan tumkam Son'var dila; teach pasot, sovea disa hanv tumkam don disanchem jevonn ditam. Hea satvea disa, zonn-eklean ap-aplea zagear ravchem ani konnench aplea ghora bhair sorchem nhoi.'
30. Mhonnttôch, satvea disa porjen visôv ghetlo.
31. Israel-porjen hea khannak 'manna' hem nanv dilem. Kotmirechê konniê sarkem, dhovem ani ruchik mhonvan bhizoilolê biskuti porim lagtalem.
32. Moizesan mhollem, 'Sorvesporachi adnia hi: Tantun êk homer map bhôrat ani amchê sonstik dakhounk dovorat, hê porim, Hanvem tumkam oronneant, Ejiptantlim bhair kaddleam tedna khavunk dil'lo tô unddo fuddleô pinnka polletoleô.'
33. Moizesan Aaronak mhollem, 'Mannachem ek purnn homer map ghe ani aidonant ghalun dovor ani tem Sorvesporachea fuddeant tujê sonstik urtolem.'
34. Sorvesporan Moizesak formail'lem tê porim Aaronan tem Korarachea Arkpettê fuddem samballun dovorlem.
35. Lôk vosti korun aslolea desant pavo porian, challis vorsam pottim, Kanaan ganvchê ximer pavo-sor, Israel porza manna khatali.
36. Homer mhollear Efacho dhavo vantto.
