1. Israel-porza Ejiptantli bhair sorun ailea uprant, dusrea vorsachea poilea mhoineant, Sinai Oronneant, Sorvespor Moizesa kodde uloilo. Tannem mhollem:
2. Hea mhoineachea chovdavea disa, tharailolea vellar, Israel porjek, soglle kaide-rit samballun, Paskanchi Porob pallum-di.'
4. Tôr, Moizesan hi porob korunk porjek sanglem,
5. ani poilea mhoineachê chovdaver, sanjechea vellar, tãnnim Sinai Oronneant ti pall'li. Ani Sorvesporan Moizesak formailolem tê porim porjen sogllem kelem.
6. Punn thoim riti pormannem xud'dh nhoi tosle konn-konn asle, kiteak tãnnim moddeak hat lailolo, dekhun, tanchean ti tea disa pallunk zalem na. Te Moizesa ani Aarona sorxim gele,
7. ani tãnnim mhollem, 'Ami oxud'dh asanv kiteak ami eka moddeak hat laila, punn her Israel-porjê sangata Sorvesporachea sonvskarant vantto gheunk ami kiteak bharailole zatoleanv?'
8. Moizesan tankam zobab dilo, 'Sorvespora thaun mhaka hukum' mello-sor ravat.'
9. Sorvesporan, Israel-porjek kollit korunk, Moizesak sanglem,
10. "Konn-ui tumchê modlo vô sonstintlo, moddeak hat lailo dekhun oxud'dh zala, vô pois bhonvddek asa, tori-i Paskanchi Porob pallunk sôdta,
11. tachean to eka mhoinea uprant, mhonngê, dusrea mhoineachê chovdaver pallunk zata. Khomir naslolea unddean ani koddu palea borabor ti khaiat.
12. Tem jevonn dusrê sokallink dovorum nakat, ani zonavorachem ek-ui hadd môddum nakat. Ani sogllea kaideank pallo diun Paskanchi Porob korat.
13. Punn konn-ui, riti pormannem xud'dh asun ani bhonvddek naslo, toriastana Paskank pallo dina, mhojê porjentlo zaunchona, kiteak tannem mhaka hi bhett kelina. Tannem hacho porinam' bhôgcho poddtolo.
14. Tumchê modem êk porko-monis jieta to hi porob pallunk sôdta, tannem sogllea kaideank man diunk zai. Hem soglleank, ganvchea toxem porkea lokak lagu zata."
15. Sorvesporacho Tombu manddun sompoilo tea disa, ek kup ailem ani to nodrek lipun urlo. Ratchem, tem kup ujea-sarkem diso.
17. Hem kup gelem toxem, lôk aple tombu nikhllaun fuddem vochot, ani tem kup denvtalem thoinsor te novean thikann korit.
18. Sorvesporachea utrak te tombu môddtale, ani tacheach utrak te ubhartale. Tombu-voir tem kup aso-sor te teach moidanar ravtale.
19. Sorvesporachea utrak tim pallo ditalim, ani chodd kall tharoun urlem zalear, thoinchim tim koddsoro-naslim.
20. Kedna-kedna-i tem thoddech dis thoim ravo, punn koxem-i zanv, sodanch Sorvesporachea hukuma pormannem tim thambtalim vô fuddem sortalim.
21. Kedna-i tem sanz thaun sokalluch porian astalem, ani gelem toxem tim fuddem tanch martalim.
22. Donuch dis zanv, vô ek mhoino zanv, ek voros vô odik legun zanv, tim thoinchim halonaslim; kup gelem toxem, tim-i gelim.
23. Fokot Sorvesporachea hukumak pallo diun tim tombu ubartalim vô ukhlun vetalim, ani ho hukum' tankam Moizesa udexim ietalo.
