1. Sorvesporan Moizesak mhollem:
2. Moidanar porjek ekttaunk, têch porim, tombu ukholcho vêll pavlo mhonn tika kollit korunk, pettlolea rupeacheô don korneti kôr.
3. Don-ui kornetincho sad aikotôch, sogllê porjen tujê bhonvtim Zomatichea Tombuchea dara mukhar ektthovchem.
4. Punn ekuch kornet sadta tedna, fokot kullanche mukheli tujê-xim ietole.
5. Kornetinche mottve sad zatôch, udentechê vatten thikann korun asat tim kullam cholunk lagtolim.
6. Ani dusrê pavtti mottve sad zatôch, dokhinnek thikann korun asat tim kullam cholunk lagtolim. Mhonnttôch, mottve sad tombu uklunk,
7. punn sogllê porjek ekttaunk, lamb sad korunk zai.
8. Aaronache iadnik-put teô korneti vazoitole. Sorv ieunchea kallak ho nem' samballunk zai.
9. Tumchea ganvant dusman ieun loddai kortat tedna, heô korneti gheun zhuzachi kui-arodd ghalat. Hanv, tumcho Sorvespor, tumchea adarak ieun tumkam dusmananachea hatantle nivartolom.
10. Sontosachea-i kallar: tumchea Omas-Porbank toxench her dhormik-porbank; tumcheô hom'-bhettô ani ektaracheô bhettô kortat tedna, tumi teô korneti sadouncheô. Hea avazan hanv, tumcho Sorvespor, tumchea adarak ietolom.'
11. Porza Ejiptantli bhair sorun ailea uprant, dusrea vorsachea dusrea mhoineache vis-ver, Tombu voir aslem tem kup koddsorlem,
12. ani Israel-porza Sinai Oronneantli bhair sorun vattek lagli. Tem kup ieun Paranachea oronneant thamblem.
13. Moizesa udexim kollit kel'lea, Sorvesporachea hukuma khal porza vatt tankunk lagli;
14. ani pavttichê pavtti ti ekêch manddavollin choltali. Nashon, Amminadabachea putache sardarkê khal, Judachea kullachi poltonn soglleam fuddem asli.
15. Magir, Nathanel, Zuarachea putachê sardarkê khal, Issakarachi poltonn vetali,
16. Ani Eliab, Helonachea putache sardarkê khal, Zebulun kullachi poltonn.
17. Uprant, Tombu sokla denvoun, Gershon ani Merari him kullam Zomatichea Tombuchem sogllem samonn ghevun vetalim.
18. Magir, Reubenachea bondera-khal asloleô poltonni geleô: êk Reubenachea kullachi, Elizur, Shedurachea putachea bavttea khal asli ti;
19. Simeonachea kullachi, Shelumiel, Zurishaddaiachea putachea bavttea khal asli ti,
20. ani Gadachea kullachi, Eliasaf, Deuelachea putachea bavttea khal asli ti.
21. Uprant, Kohatachea kullache Levit povitr vostu gheun vetale. He dusrea moidanar pavta mhonnosor, Tombu ubarun toiar zatalo.
22. Magir, Efraimachea bondera khal asleô teô poltonni: Efraimachea kullachi, Elishama, Ammihudachea putachea bavttea khal asli ti.
23. Mannassechea kullachi, Gamaliel, Pedahzurachea putachea bavttea khal asli ti,
24. ani Benjaminachea kullachi, Abidan, Gideonichea putachea bavttea khal asli ti.
25. Xekim, Danachea bondera khal asleô teô poltonni loskorachea konneak: Danachea kullachi, Ahiezer, Ammixaddaiachea putachea bavttea khal asli ti.
26. Asherachea kullachi, Pagiel, Okranachea putachea bavttea khal asli ti,
27. ani Naftalichea kullachi, Ahira, Enanachea putachea bavttea khal asli ti.
28. Tôr, Israel-porza eka moidanar thaun dusrea moidanar vetana, hê manddavollin tancheô poltonni fuddem sorleô.
29. Moizesan Hobabak, aplea mevnneak, ani Jetro-Midianit hachea putak mhollem, 'Sorvesporan amkam diunk bhasaila tea ganvant vochunk ami bhair sorche asanv. Amkam dhadoxi kortolo mhonn tannem bhasailam, tôr, amchea borabor ie, ani amchem sukh tujem-i sukh zaun astolem.'
30. Hobaban zobab dilo, 'Na, hanv mhojea ganv-desant porot vetam.'
31. Upkar magtam, amkam sôddun vochum naka', Moizesan mhollem, 'hea oronneachi tuka bori vollokh asa, tum amkam vatt dakhounk upkartoloi.
32. Amchea borabor iexi zalear, Sorvespor amkam dita tacho vantto tuka-i ditoleanv.'
33. Sorvesporacho dongor sôddlea uprant, porza tin dis cholun geli. Sorvesporachea Korarachi Arkpett sodanch fuddem vetali, ani tãnnim fuddem thambchê khatir, tankam zago vinchun kaddtali.
34. Disachem eka zagear thaun tim dusrea zagear vetana, Sorvesporachem kup tanchê voir astalem.
35. Korarachi Arkpett vattek lagtôch, Moizes mhonntalo, 'Utth, Sorvespora; tujea dusmanank ximpddai, ani tuzo dvês kortole tujê sorxile pollum!'
36. Ani tem thamblem toxem, to mhonno, 'Porot ie, Sorvespora, Israelachea hozaramnim kuttumbam-xim ie.'
