1. Sorvesporan Aaronak mhollem: 'Mhojea Tombunt seva kortana,j jeô chuki konn adarta, tacho porinam' tunvem, tujea putamnim, ani Levitamnim bhôgcho poddtolo. Punn jeô chuki iadnikponnachê zhuttient adartat tancho porinam' tunvem ani tujea putamnim bhôgunk zai.
2. Tujea soireank apoi, Levichea kullantleank, tuka mozôt korcheak, punn tum ani tuje put Tombuchi seva kortoleat.
3. Te fokot tumkam adar ditole, tumchi zhutti favo tê porim pallcheak, punn Povitr Zagear vô vedir asat tea vostunk tãnnim hatuch launcho nhoi. Na tôr, tankam moronn favo zatolem.
4. Tumi favo tê porim Zomatichea Tombu vixim zobabdari pallcheak te fokot tumkam adar ditole, punn tanchê bhair anink konnachean tumkam mozot korunk zaina.
5. Fokot tunvem ani tujea putamnim Povitr Zagea ani vedi vixim tumchi zobabdari pallunk zai; na tôr, mhozo rag sogllê Israel-porjecher uprastolo.
6. Hanvench tujea soireank, Levitank, Israel-porjechem dennem koxem, vinchun kaddleat. Ani hem dennem tumchea adavak dekhun, tanchi mhaka Tombuchea vavrak bhettounni zaloli asa.
7. Punn tum ani tuje put fokot iadnikponnachi soglli zobabdari palltoleat, ani vedichi ani Bhou Povitr Zageachi soglli seva kortoleat. Hi tumchi khas zobabdari, kiteak hanvem tumkam iadnikponnachem dennem favo kelam. Anink konn-ui hea povitr vostum-xim lagim sorta tacho jiv kaddunk zai.'
8. Sorvesporan Aaronak mhollem: 'Mhaka kherit bhettô kortat ani jeô hulpainant, ho vantto sorv ieunchea kallak, hanv tumkam ani tumchê sonstik dovortam, hem monant dhôrat.
9. Vedir hom'-bhett korunk nasloleô vostu, tanchem protek orponn hê porim: orovachê bhettecho, farikponnachê bhettecho, ani protidan bhettecho. Povitr dennem koxem mhaka bhettoitat tem tujem ani tujea bhurgeanchem.
10. Hem tumi povitr zagear khaunchem, ani fokot dadlea lokachem khann tem; povitr koxem lekhat.
11. Tea bhair, Israel-porza kitem-i ek kherit dennem koxem mhaka bhettoit tem-i tumchem. Sorv ieunchea kallak hanv tem tumkam, tumchea putank ani dhuvank ditam. Tumchea kuttumbantlo riti pormannem xud'dh asa tachean tem khaum-iet.
12. Jem Israel-porza, vorsachea poilea pikachem borem tem mhaka bhettoita tem-i tumkam dovortam: tel, soro ani orôv.
13. Tem sogllem tumchem. Tumchea kuttumbantlo zo riti pormannem xud'dh asa tachean tem khaum-iet.
14. Jem Israel-porza udar kallzan mhaka bhettoita tem sogllem tumchem.
15. Mon'xancho toso zonavorancho malgoddo Israel-porza mhaka bhettoita to-i tumcho. Punn mon'xank porot vikte gheunk jem mol farik kortat tem tumchem; têch porim, riti pormannem xud'dh nhoi tea zonavorak farik kortat tem-i.
16. Bhurgeank eka mhoinea bhitôr porot gheunchim: tanchê suttkê khatir rupeache panch shekel, devsthanachea shekela pormannem mhonngê vis gera.
17. Punn gaichim, menddranchim ani bokddeanchim malgoddim poram viktim gheunk zainant; tim ekannem mhojim, ani tanchi bhett korunk zai. Tanchem rogot vedicher marchem, ani tachi chorob hulpaunchi, mhaka mandta tosli pormôllit khann-bhett.
18. Tanchem mas zoxem chhati ani patthlo uzvo pãi, kherit bhettecho vantto.
19. Sogllim kherit dennim Israel-porza mhaka korta tim, sorv ieunchea kallak, tuka, tujea putank ani dhuvank dovortam.'
20. Sorvesporan Aaronak mhollem: 'Daiz jem horxem bhôgunk zata, tem tumchean gheum nozo; ani Israelantlo ganv tumkam bilkul na. Hanv, tumcho Sorvespor, hench tumchem daiz, ani tem tumkam puro.'
21. Sorvesporan mhollem, 'Zo dhavo vantto Israel-porza mhaka bhettoita, to hanvem Levitank dovorla. Mhojea Tombuchi chakri kortat tachem farikponn koxem hem.
22. Heramnim mhojea Tombu-xim lagim sorchem nhoi; na tôr, tankam mornnachi khast favo zatoli.
23. Atam thaun Tombucho samball ani tachi zobabdari Levitanchea hatant asa. Tumi ani tumchê sonstin ho kaido samballunk zai.
24. Israelant bhatt-bens aschem na mhonn hanvem tankam sanglam.'
25. Levitank sangunk, Sorvesporan Moizesak formailem:
26. "Israel-porza aplo dhavo vantto bhettoita to tumkam mell'lea uprant, tacho êk dhavo vantto, êk kherit bhett koxi, tumi Sorvesporak diunk zai.
27. Ani hi tumchi kherit bhett, xetkar aplo orova-soreacho dhavo bhettoita tachêch sarki zatoli.
28. Hê porim, tumi ghetat tacho dhavo vantto, Aaron-iadnikak diun, ek kherit dennem koxem tumi Sorvesporak bhettoitoleat."
29. Ani tumi boro to vantto dilea uprant,
30. bakichem tumchean tumkam dovorum-ieta, jê porim xetkar bakichem apnnak dovorta.
31. Tumchean ani tumchea kuttumbachean tem khoinsor-ui khaum-iet, kiteak tumi Zomaticho Tombucho vavr kortat tacho disvoddo to.
32. Borem tem Sorvesporak dilea uprant, bakichem tumi khelear tumi guneanvkari zaunche nant. Punn borem tem Sorvesporak diunchê adim tumi kitench khaun tumi tem dennem boxttaunchem nhoi; toxem korxat zalear, tumkam moronn favo zatolem'
