1. Israel-porjek Balaaman axirvad dil'lo Sorvesporak zai mhonn taka, hea sumarak, kollun ailem; mhonnttôch, poilem kel'lem toxem, atam khunna ani oslem sôdunk tannem vêll lailoi na. To oronnea vatten voll'lo,
2. Aple dolle ubarun, Balaaman Israel-porjek dekhli: tinnem kullam pormannem moidanar tombu tannlole. Devacho Atmo tacher ailo,
3. ani tannem apli kovita kallzant thaun ucharli. Tannem mhollem: 'Beorachea puta Balaamachem bhakit, pois polletolea mon'xachem bhakit,
4. Devachem utor aikotoleachem bhakit. Sorvespor dakhoita tem to polleta, to Deva-koddlo zobab gheta, ani tache dolle ugòddtat.
5. Jakoba, kitle sobit tuje tombu! Israela, kitlim sobit tujim ghoram!
6. Pois vistarlolea falkeam sarkim tim, nhõiche deger fultolea bagam sarkim, Sorvesporan roilolea rogtbollam sarkim, udkam-lagsorlea devdar-rukham sarkim!
7. Tanchea kullantlo êk vir utpon zata, ixôb-naslolea porzancher to raj choloita, tancho raza Agaga poros vorto, tachi razpodvi choddot-choddot vetoli.'
8. Devan tankam Ejiptantlim kaddun haddleant, Eka ranboila porim tanchê khatir to zhuzta. Aplea dusmanank te girastat, Tanchim haddam môddtat, dondd'-bal tôddtat.
9. Bollixt xinva sarki hi porza; Nhidot tedna zhagounk konnak kalliz na. Israelak axirvad ghalta to axirvad bhôgtolo Ani Israelak xirap ghalta tacher xirap poddtolo.
10. Balakan, ragan, apleô mutti zokleô, ani Balaamak mhollem, 'Mhojea dusmanancher xirap ghalunk tuka apoil'lo, punn tachê boldek tunvem tin pavtti tancher axirvad ghaloi.
11. Atam tujea ghora voch! Hanvem tuka vhôdd mozuri bhasail'li, punn hi tuka diunchi Sorvesporanuch ti mona kelea.'
12. Balaaman zobab dilo, 'Hanvem niropiank sanglolem,
13. "ki tujea rajmahalantlem sogllem rupem ani bhangar mhaka dileim-i zalear, mhojê podorchem kitench sangun, mhojean Sorvesporachea hukuma add ieum nozo. Hanv fokot, jem Sorvespor mhaka kollit korta tem sangtam."
14. Balaaman Balakak mhollem, 'Atam hanv mhojea loka-xim vetam, punn tea adim, Israel-porza fuddarak tujê porjek kitem kortoli tem sangun dovortam'
15. Anink ek kovita tannem kallzant thaun ucharli. Tannem mhollem: 'Beorachea puta Balaamachem bhakit, pois polletolea mon'xachem bhakit,
16. Devachem utor aikotoleachem, Bhov Vortea Devachi zannvai ghetoleachem bhakit. Sorvespor dakhoita tem to polleta, to Deva koddlo zobab gheta, ani tache dolle ugòddtat.
17. Hanv taka polletam punn atam nhoi, to mhaka dixtti poddta punn lagim nhoi. Jakobantlem ek Noketr fuddariponn choloita, Israelantli razkatti upzota, ani Sethachê sogllê sonstik sokla uddoitolo.
18. Edomachea dusmanancher to zoit vhortolo Ani tanche ganv aplea tabeant kortolo, Ani Israel zoitivont zait astolem.
19. Israel-porza soglleank sokla ghaltoli Nimannea dusmanak legun ti pusun uddoitoli.
20. Balaaman Amalekitak dekhlo ani hem bhakit kelem: 'Sorv porzam modem Amalek chodd bollixt aslem, Punn xevottak tem sodankal nattak zaun vetolem.'
21. Tannem Kenit porjek dekhli, ani hem bhakit kelem: 'Tumi jietat to zago thir, Unch khoddpar kell'lo êk ghontter koso,
22. Punn Kenit-porzamnô, tumchem ghortthan zatolem Jedna Assiria tumkam koidi korun vhortolem.'
23. Xekim, Balaaman hem bhakit kelem: 'Ut'torik zomtat teô porza konn?
24. Xidd'-tarvamnim, Siprus thaun dhadd ghalunk; Assiria ani Eber te ghetole; punn, okhrek, te sodankal nanch zatole.'
25. Uprant, Balaam aplea ghora vochunk toiar zalo, ani Balak aplê vattek laglo.
