1. Levichem kull fanttun Kohatachem kull upzolem, ani hem-i tea fuddem fanttlem. Tôr, Sorvesporan, hea Kohatachea
2. kull-kullanchi ani kuttumbanchi lôkgonnti kôr mhonn Moizesak sanglem;
3. tis tem pon'nas vorsam modlê piraiechea, Zomatiche Tombuchê chakrek upkartat tosleank mêz. Ani povitr vostum modem
4. bhov povitr teô tanchea tabeant poddtoleô.
5. Sorvesporan Moizesak xikounn dili. Moidanavelo tombu nikhllaun dusrea zagear vecho vêll pavtôch, Aaron ani tache put Povitr Tombunt bhitôr sortole, Korarachea Arkpettê mukhar asa to podd'ddo kaddtole, ani hantunt tem Pettul dhamptole.
6. Hachê voir patoll chambddeachem dhampnnem, ani hachê voilean ekannem nillea lugttachem dhampnnem; magir, tem vhorpak, mudiamnim dandde ghalche.
7. Sorvesporak Undde dovorchea mezak nillea lugttachem ek kap ghalchem, ani hacher boxeô, kopam, dhumpache kanxe, ani soreachim aidonam dovorchim. Punn sodanch tacher undde astolech.
8. Hea sogllea voir ek tambddem lugott ani hachê voir patoll chambddeachem kap ghalchem. Magir, vhorpache dandde mudiamnim ghalche.
9. Divea sthanak ani divliank, chimtteank, vattleank ani telachea aidonank nillea lugttachem kap,
10. hachê voir patoll chambddeachem dhampnnem ghalun, vhorpachê kaxint tem dovorchem.
11. Bhangarachea vedik nillea lugttachem kap, ani hachê voir patoll chambddeachem kap ghalchem; magir, vhorpache dandde mudiamnim ghalche.
12. Povitr Zagear vapuddtat tim sogllim aidonam nillea lugttan ani magir patoll chambddean guttlaun, tim vhorpachê kaxint ghalchim.
13. Vedivelo sogllo gobor kaddcho, ani vedi zambllea lugttan dhampchi.
14. Vedichem sogllem samon: gobrachim gomelam, ujeacheô kaili, chimtte, ani khorim tacher dovorun, patoll chambddean tem dhampchem, ani magir vhorpache dandde mudieamnim ghalche.
15. Moidan sôddun vecho vêll pavtôch, ani Aaronan ani tachea putamnim sogllem samon guttlaun zatôch, Kohat-kullache monis tem samon vhorunk ietole. Hannim tea povitr vostunk hat launcho nhoi, na tôr, te mortole. Zomaticho Tombu ukhol'lea uprant, hem samon vhorpachi zobabdari soglli Kohat-kullachi.
16. Tombuchi soglli manddavôll: divlianchem tel, pormollit dhump, orov-bhettovop, makhnnechem tel, ani Sorvesporak bhettoilam titlem-I Eleazarachi Aaron-iadnikachea putachi zobabdari.
17. Sorvesporan Moizesak ani Aaronak mhollem:
18. Hea bhov povitr vostum-xim lagim ieun, Kohat-kullanchea mon'xank morunk sôddun dium nakat. Hea khatir, Aaron ani tache put Tombunt poile bhitôr sorun, tankam zonn-ekleak ap-aplo vavr tharaun diuncho.
20. Punn Kohat-kullanche monis bhitôr vochun, iadnik kitem kortat tem te pollet legun zalear te mortolech!'
21. Sorvesporan Moizesak mhollem:
22. Gershonachea kull-kullanchi ani tanchea kuttumbanchi,
23. tis tem pon'nas modlê piraiechea, Zomatichea Tombuchê chakrek upkartat toslea mon'xanchi lôkgonnti ghe.
24. Tanchi zobabdari heô vostu vhorunk:
25. Tombu, tachem bhitorlem kap, bhailem kap, voilem patoll chambddeachem kap, daracho podd'ddo,
26. sorvbhonvtim podd'dde asat te, ani vedi, rajangnnache podd'dde ani hanchem sogllem samonn. Haka lagu zata titlem-i te vhortole.
27. Ani tankam Aaronan ani hachea putamnim tharailam toxem te sogllem kortole mhonn Moizesan ani Aaronan bhar gheuncho.
28. Gershon-kullachi, Tombu-vixim, hi zobabdari zatoli; ani te Ithamar, Aaron-iadnikachea putachea hukuma khal ti palltole.'
29. Merari kull-kullanchi ani tanchea kuttumbanchi, tis tem pon'nas modlê piraiechea,
30. Sorvesporachea Tombuchê chakrek upkartat toslea mon'xanchi lôkgonnti gheunk Sorvesporan Moizesak sanglem.
31. Soglleô faskeô, khambleô, khambe ani tanchim peddam;
32. ani Tombu-bhonvtonniche khambe, peddam, kalxi, doram ani urlolem sogllem samonn vhorunk te zobabdar. Ani êk-êk monis zonn-ekak tharaun dovorloleô vostu vhortolo.
33. Tombu vixim hi Merari-kullachi zobabdari; ani te Ithamar, Aaron-iadnikachea putachea hukuma khal ti palltole.'
34. Sorvesporachea hukumak pallo diun,
35. Moizesan, Aaronan, ani porjechea mukheleamnim Levichea tin kull fantteanchi lôkgonnti ghetli
36. ani hem tãnnim dor fantteachea kuttumbam pormannem,
37. tis tem pon'nas modlê piraiechea,
38. vavrak upkartat tea sogllea mon'xank mezle.
39. Ani Zomatichea Tombuchi seva korunk ho tancho vavr.
40. Tancho ankddo hê porim:
41. Kohatachea kull-fantteacho ankddo:
42. don hozar, satxim pon'nas (2,750) monis
43. Gershonachea kull-fantteacho ankddo:
44. don hozar, soixim tis (2,630) monis
45. Merarichea kull-fantteacho ankddo:
46. tin hozar, don'xim (3,200) monis
47. Ekunn mellun:
48. atth hozar, painxim oixim (8,580) monis
49. Sorvesporan Moizesak formailolê tê porim dôr-eka mon'xachem nanv boroun dovorlem; ani Sorvesporachea hukuma khal Moizesan zonn-ekleak ap-aplo vavr ani hea vixim zobabdari tharaun ghetli.
