1-2. Bhasailolea ganvant Israel porjen je kaide samballunk zai te Sorvesporan Moizesak dile.
3. Hom'-bhettek, vô angovnnechê bhettek, vô khuxê-monan kel'lê bhettek, vô dhormik-porbank kel'lê bhettek êk boil, vô menddro vô menddri, vô êk bokddi haddum-iet, hea khann-bhettencho pormôll Sorvesporak mandta.
4. Hom'-bhettek êk menddri vô bokddi bhettoita tannem, dôr zonavora patthlean, orovachê bhettek, efacho dhavo vantto, hinacho êk chovtho vantto telan misoll korun, efacho dhavo vantto pitt haddchem, ani hinacho chovtho vantto soro.
6. Êk menddro bhettoitana, hinacho tisro vantto misôll korun efache don dhave vantte pitt, orovache bhettek,
7. dhedd-xer sorea borabor. Hea bhettencho pormôll Sorvesporak mandta.
8. Hom'-bhettek, vô angovnnechê, vô ektarachê bhettek êk boil bhettoitana,
9. efache tin dhave vantte pitt, ordhem hin tel,
10. tea bhair ordho hin soro. Hê bhettecho pormôll Sorvesporak mandta. Dôr boila, vô menddrea, vô menddrê ani bokddê borabor kitem bhettounchem tem hanga sthapun dovorlam.
11. Eka voir zonavor bhettoitana, tea borabor vetat teô bhettô titleoch vaddouncheô.
13. "Ganvchea sorv Israel-lokan, Sorvesporak bhettoita tem khannêk pormollit bhett zaunchê khatir toxem korunk zai.
14. Ani tumchê modem sorvankal vô thoddo kall jieta tea porkea mon'xan, Sorvesporak, khann-bhett kortana, toch kaido pallunk zai.
15. Sorv ieunchea kallak tumi zanv porkea lokan te kaide samballche. Tumi ani te-i Deva mukhar ek sarke.
16. Tumkam toxem tankam, soglleank ekuch vô tech kaide."
17. Bhasailolea ganvant Israel-porjen samballunk, Sorvesporan Moizesak he kaide dile.
19. "Tea ganvant pikta tem khatana, tantlem thoddem Sorvesporak ek kherit dennem koxem dovorchem.
20. Novea pikache undde bhaztana, poilê bhattiecho unddo Sorvesporak ek kherit dennem koxem bhettouncho. Poili moll'loli punz Sorvesporak bhettoitat têch porim ho-i unddo.
21. Sorv ieunchea kallak, poilo unddo bhazlolo Sorvesporak ek kherit dennem.
22. Soiranna vô khuxê-bhair, he Sorvesporan dilole kaide samballunk konnui-eklo chuklo zalear,
23. vô fuddarak sogllich porza, Moizesa udexim dilole he kaide visorli zalear,
24. Porjen nennarponnan toxem kelam zalear, tinnem hom'-bhettek êk boil, orovachê ani soreachê bhettê borabor Sorvesporak bhettouncho. Tea bhair, patkanchea farikponnak tannim êk bokddo bhettounk zai.
25. Iadnik porjechea nanvan hi xudh'dhichi rit palltolo, ani tankam bhogsotolem, kiteak tem khuxê bhair ghoddlem, ani tãnnim farikponnak Sorvesporak khann bhettoilem.
26. Sogllê Israel-porjek toxem porkea lokak tê chukichi mafi melltoli, kiteak ti soglleanchi, khuxê-bhair adarloli chuk.
27. Soiranna vô khuxê-bhair ekleachich chuk zalear, to farikponnachê bhettek vorsachem ek bokuddlem haddtolo.
28. Iadnik vedicher tachi xudh'dhichi rit palltolo, ani taka bhogsotolem.
29. Hem sogllea soiranna-bhair chuktoleank lagta, ganvcheank toxem porkeank.
30. Punn zano astana vô khuxê-monan korta to, ganvcho zanv porko, guneanvkari zata, kiteak tannem Sorvesporak beman kelo, hea khatir taka moronn favo.
31. Tannem zanno astana, Sorvesporachea kaideank patth voll'li, dekhun to apunnuch mornacho zobabdar."
32. Israel-porza oronneant asli tedna, eklo Son'varachea disa, lankddam punzaitana konnak sampoddlo.
33. Haka Moizesa ani Aarona ani sogllê porjê mukhar vhelo,
34. ani taka bond kelo kiteak taka kitem korchem tem ozun thavem naslem.
35. Tedna Sorvesporan Moizesak mhollem, 'Hea mon'xacho jiv kaddunk zai; taka moidanar bhair vhorun, sogllê porjen taka fatraunk zai.'
36. Mhonnttôch, Sorvesporan formailolê tê porim porjen taka moidana bhair vhelo ani fatraun marlo.
37. Sorvesporan Israel-porjek sangunk Moizesak formailem, 'Tumchea vostranchea konnxeank gondde laiat ani dôr gonnddeak nillo doro ghalat. Sorv ieunchea kallak tumi toxem korunk zai.
39. Hea gonnddeancher tumchi nodor poddtoli, titlei pavtti tumkam Sorvesporachea adniancho ugddas ietolo.
40. He gonndde tumkam mhojea updesancho ugddas kortole, ani tumi mhojech zaun astoleat.
41. Hanv tumcho Sorvespor; tumcho Dev zaunchê khatir, hanvem tumkam Ejiptantlim bhair kaddun haddleant. Hanv Sorvespor.'
