1. Moizesan Kuxit lokantlê êkê bailek ghetil'lê vixim (kiteak êkê Kuxit bailê kodde to logn zal'lo) Miriam ani Aaron tacher add ulounk laglim.
2. Tãnnim mhollem: 'Moizesa bhair Sorvespor anink konnach kodde ulounk na kai? Amchê-i kodde To ulounk na?' Sorvesporan hem aikolem.
3. Moizes ekdom' khalto vinomr aslo prithumechea sorv mon'xam poros odik vinomr kallzacho.
4. Ovchituch Sorvesporan Moizesak, Aaronak ani Miriamak mhollem: 'Tumi tegam-i Zomatichea Tombunt ieiat.' Tim tegam-i gelim
5. ani Sorvespor eka kupachea khambea-rupan denvlo ani Tombuchea darar ubo ravlo. Aaronak ani Miriamak Tannem apoilim ani tim dogam-i fuddem sorlim.
6. Sorvesporan mhollem: 'Atam Mhojim utram kan diun aikat: Tumchê modem konn-ui provadi asa zalear, Hanv taka eka dorxonant Mhoji vollokh ditam, Ani sopnant tachê lagim uloitam.
7. Punn Mhojea sevoka Moizesachê babtint oxem nhoi: to sodanch asa Mhojea ghorant;
8. Hanv tachê lagim humaneamnim nhoi, punn ukteponnim, tondda-tonddim uloitam; ani to Sorvesporak rup-rup polleta. Mhojea sevoka Moizesacher add ulounk tumkam koxem puttvolem?'
9. Sorvesporacho rag tancher pettlo. To tanchê sorxilo koddsorlo
10. ani Tombuvelem kup choddun vetôch Miriamak kodd futtlem ani ti borfa bhaxen sarki dhovi ful zali. Aaronan Miriamacher nodor marli ani tika kodd futtlam tem taka dixtti poddlem.
11. Aaronan Moizesak mhollem: 'Mhojea dhonia, mhaka pav! Nennarponnan ami patok kelem, tachi khast amkam lavum naka; tea patkacho guneanv ami vollkhun ghetanv.
12. Ordi kudd kusloli asun aplê avoichea kusveantlo bhair sortolea mel'lea mon'xachê kuddi bhaxen Miriamachi kudd korum naka.'
13. Moizesan Sorvesporak ulo marlo ani mhollem: 'Deva, hanv Tujê lagim magtam: tika bori kôr!'
14. Sorvesporan zobab dilo, 'Ticho bapui tichea tonddar thuklolo zalear, tinnem tem sat dis bhôgchem poddtolem aslem. Tôr,t ika ek satollem pois moidana-bhair asum-di, magir tika bhitôr haddlear zata.'
15. Miriamak sat dis moidana-bhair pois keli. Ani tika porot moidanar haddi-sor porza thoinchi hal'lina.
16. Tãnnim Hazerot sôddun, Paranchea oronneant tombu ubharlo.
