1. Porza, koxtt poddtat dekhun, Sorvesporacher gunngunnunk lagli. Hem aikun Sorvesporak rag ailo ani tannem uzo dhaddlo. Te ujean hulpole, ani ekê vatten moidanar sogllem hulpon gelem.
2. Tedna porjen Moizesak ulo marlo, ami Moizesan Devak porathlo ani to uzo palovlo.
3. Hea khatir, tea zageak Tabera hem nanv poddlem, kiteak Sorvesporachea ujeant te lasle.
4. Israel porjê borobor her lôk aslo. Hankam masachi chodd ruch aili. Israelacheô put-dhuvô novean roddunk lagleô. Tãnnim mhollem: 'Konn amkam mas khaunk ditolo?
5. Ejiptant astana ami funkott maslli, touxim, chibddam, bhaji-palo, kande ani losunn khataleanv tacho amkam kitlo mhonn ugddas ieta!
6. Hanga ami sukun geleanv, manna bhair hanga anink kãich dixtti poddona.'
7. Man'na konfirichea bia porim ani tachem rup bedelia folla porim.
8. hanga-thoim vochun, lôk to ektthaim kortalo ani eka danteant dôlltalo ani pitullchea vanant kutt'ttalo. Uprant to aidonam-nim ghalun randtalim ani tacheô bhakri kortalim. Telan bhajil'lea voddea porim tachi ruch.
9. Ratcho penneachea moidanar dôv poddtalo tedna, tachê borabor manna-i poddtalo.
10. Ap-aplea tombuchea darar lôk roddtalo tem Moizesan pollelem. Sorvesporacho rag sarko pettlo ani haka lagun Moizesak bhov vaitt dislem.
11. Ani tannem Sorvesporak mhollem: 'Tujea sevokak itle tras kiteak ditai? Hanv tuka kiteak mhonn mandunk na? hea sogllea raxttrachem vozon, polle, Tunvem mhojer ghalãi!
12. Hanvem hê porjecho gôrbh samball'la kai? hanvem tika zolm dila kitem? "Êk avoi aplea dudachea ballkak ukhlun vhorta toxem, hê porjek hodd'ddear dhôrun tujea purvozank Hanvem bhasailolea desant vhor', oxem kiteak mhonn Tum mhaka sangtai tôr?
13. Hê porjek khoinchem mhonn mas haddun dium? Amkam mas khaunk di mhonn tim mhojê-xim ieun roddtat.
14. Mhojean ekleacheanuch hê porjechem vozon tolunk zaunchem na; hem vozon mhaka ekdom' bharadik."
15. Hê bhaxen Tum mhaka vagoitai zalear, Tunvem mhozo jiv kaddlear odik borem. Hem dolldirponn polleunchê svater, Hanv Tuka mandlolom zalear odik borem zatem!
16. Sorvesporan Moizesak mhollem: 'Israelachea zannteantlea sot'tôr zannank ektthaim kôr; porjeche vhoddil ani xastri mhonn zannai te. Tankam Zomatichea Mattva-xim hadd ani thoim tankam tujê kuxik ravum-di.
17. Hanv tujê kodde ulounk denvtolom; ani tujer asa to atmo Hanv unnea mapan tancher kaddun ghaltolom. Hê bhaxen te tujê borabor porjechem vozon vanttun ghetole ani tunvem ekleanuch tem anink ubarunk goroz aschi na.'
18. Atam porjek oxem sang, "Faleanchea disak tumi xud'dh ravat; tumkam mas khaunk melltolem. Mas khavunk tumi mirmirtat, ani Ejiptant tumi odik dhadoxi asleat oxem mhonnttat tem Sorvesporan sogllem aikolam. Atam Sorvespor tumkam mas ditolo.
19. Tumi tem khaunchem poddtolem ekuch dis vô donuch dis nhoi, vô panch, vô dha, vô visuch legun dis nhoi,
20. bhogor ak'kho mhoino, hem magir tumchea nakantlean bhair sorun tumi vittetoleat. Oxem tumkam ghoddtolem, kiteak, zo Dev tumchê modem hanga asa taka tumi patth voll'lea, ani Ejiptantlim tumi bhair sorunkuch favonaslem, oxem tumi mhonnttat." '
21. Moizesan Sorvesporak mhollem, 'Hanga hanv soixim-hozar lokak choloun vhortam, ani "êk mhoino bhôr tankam mas khaunk ditolo oxem mhonnttai?"
22. tanchi as bhagounk gorvam ani menddram khoinchim marchim? Ani doriantlem sogllem nistem tankam puro zait?' Sorvesporan taka zobab dilo,
23. Mhojê podvê-bollak xim'-mer asa zait? Hanvem mhollam tem ghoddtolem vô na, hem tum rokddench dekhtoloi!'
24. Moizes bhair sorlo ani Sorvesporan sanglolem tem porjek kollit kelem. Uprant tannem porjechea sot'tôr zanntteank ektthaim kele ani tankam Mattva-xim haddle.
25. Sorvespor kupant denvun ailo ani tachê kodde uloilo. Uprant tacher aslo to atmo unnea mapan sot'tôr zannteancher Tannem kaddun ghalo. Tancher atmo denvlo tedna tãnnim sondêx dilo punn uprant tãnnim anink sondêx dilo na.
26. Dog monis penneam-moidanar ravlole; ekleachem nanv Eldad ani dusreachem Medad. Tancher-ui atmo denvlo. Zorui te Tombu-xim vochunk nasle, torui nemloleam modem tanchim nanvam aslim. Tãnnim pennea-moidanar sondêx diunk suru kelem.
27. Êk tornnatto hi khobor Moizesak sangunk dhanvon gelo; tannem mhollem: 'Polle, Eldad ani Medad pennea-moidanar sondêx ditat.'
28. Tedna bhurgeponnar thaun Moizesacho sevôk aslo to Nunacho put Joshua oxem mhonnunk laglo: 'Mhojea dhonia Moizesa, tankam mona kôr.'
29. Punn Moizesan taka zobab dilo: 'Mhojê pasot tum nirdhukai kortai? Sorvesporachi soglli porza provadianchi zal'li zalear, ani Sorvesporan tanchê bhitôr Aplo atmo ghal'lo zalear, hanv kitlo khuxi!'
30. Uprant Moizes ani te Israelache mukheli moidanar portole.
31. Sorvesporan, ovchit, varem dhaddlem ani tea borabor doria-voilean lhoveanchim bhirim uddun ailim. Te soglle moidanar chikar bhorle, ani magir tanchi sumar don hat unchaiechi ras zali.
32. Tôr, lôk to dis ani ti rat, ani dusro dis tankam dhôrunk bhair sorlo; ani unneant unnem dôr-ekleache dha homer bhorle. Ani moidanar, tombu bhonvtim te sukot ghale.
33. Itlem sogott mas astana, Sorvesporacho rag tancher petthlo, ani tanchê modem pidda dhaddli.
34. Tea zageak Kibrot Hattaavah hem nanv poddlem (mhonngê, 'Axek lagon Fondd'), kiteak, mas khaunk mirmirtale tankam thoim purle.
35. Hanga thaun porza bhair sorli, ani Hazerot ganvant tombu marle.
