1. Israel-porza Ejiptantli bhair soron ailea uprant, dusrea vorsachea dusrea mhoineachê poiler, Sorvespor Sinai Oronneant, aplea Tombunt thaun Moizesakodde uloilo. Tannem mhollem:
2. Tunvem ani Aaronan Israel porjechi lôkgonnti gheunk zai. Ti kulliechê-kullient, kuttumbachea-kuttumba pormannem zaunk zai,
3. vis vô odik vorsanche dadle ani zhuzak upkartat tosle.
4. Ekê-ekê kullientlo mukheli tumkam adar ditolo.'
5. Kulliê pormannem hea vavrak vinchun kaddleat te mukheli he: Reubenachê Kullient: Mukheli: Elizur, Sheduracho put
6. Simeonachê Kullient: Mukheli: Shelumiel, Zurishaddaiacho put
7. Judachê Kullient: Mukheli: Nashon, Amminadabacho put
8. Isakarachê Kullient: Mukheli: Nethanel, Zuaracho put
9. Zebulunachê Kullient: Mukheli: Eliab, Helonacho put
10. Efraimachê Kullient: Mukheli: Elishama, Ammihudacho put
11. Manassechê Kullient: Mukheli: Gamaliel, Pedahzuracho put
12. Benjaminachê Kullient: Mukheli: Abidan, Gideoniacho put
13. Danachê Kullient: Mukheli: Ahiezar, Ammixaddaiacho put
14. Asherachê Kullient: Mukheli: Pagiel, Ochranacho put
15. Gadachê Kullient: Mukheli: Eliasaf, Deuelacho put
16. Naftalichê Kullient: Mukheli: Ahira, Enancho put
17. Hea bara mon'xanchea adaran Moizesan ani Aaronan,
18. dusrea mhoineachê poiler, sogllê Israel-porjek ekthaili ani, zonn-ekleachê kulliê ani tanchea kuttumba pormannem formailolem lôk-mezop kelem. Vis ani vis-vorsam voir dadleanchim nanvam boroilim ani tim mezlim,
19. Sorvesporan formailolem tê porim. Moizesan, Sinai Oronneant, hi lôkgonnti keli.
20. Zhuzak upkartat tosle, vis ani odik vorsanche dadle, nanvam-nanvim, kulliê ani kuttumba pormannem hea mezpant bhitôr sorle. Jakobachea malgoddea puta, Reubenachê kulliê thaun suru kelem, ani tannim hê porim hixob kelo:
21. Reubenachê kullient:
22. sovechallis hozar, pãixim (46,500) monis
23. Simeonachê kullient:
24. ekunsatt hozar, tinxim (59,300) monis
25. Gadachê kullient :
26. ponchechallis hozar, soixim pon'nas (45,650) monis
27. Judachê kullient :
28. chovdeat'tor hozar, soixim (74,600) monis
29. Issakarachê kullient:
30. chovpon hozar, charxim (54,400) monis
31. Zebulunachê kullient:
32. sot'tavon hozar, charxim (57,400) monis
33. Efraimachê kullient:
34. challis hozar, pãixim (40,500) monis
35. Manassechê kullient:
36. bot'tis hozar, donxim (32,200) monis
37. Benjaminachê kullient:
38. ponstis hozar, charxim (35,400) monis
39. Danachê kullient:
40. basott hozar, satxim (62,700) monis
41. Asherachê kullient:
42. ekêchallis hozar, pãixim (41,500) monis
43. Naftalichê kullient:
44. trepon hozar, charxim (53,400) monis
45. Ekunn mellun:
46. Soixim tin hozar, pãixim ponnas (6,03,550) monis
47. Hea kullam sangata, Levichea kullacho hixôb kelona.
48. Kiteak Sorvesporan Moizesak mhollem:
49. Zhuzak upkartat toslea dadleanchi lôkgontti ghetai tedna, Levichea kullacho hixôb gheum naka.
50. Punn Tombucho sogllo poramos Levichea kullachea tabeant kor: Tombu ani Zomatichea Tombuchem samon ukhlun vhortole, to manddtole, ani thoim seva kortole.
51. Ani tumi moidanar thaun dusrea moidanar vetat tedna, te Tombu nikhllaun dusrea thikannar vhorun ghaltole. Anink konn-ui heaTombu-xim lagim sorta tacho jiv vetolo.
52. Bakichi Israel-porza, poltonni patthlean poltonn, zonn-eklo monis ap-aplea zomeant ani ap-aplea bavttea khal, aple tombu martoli.
53. Punn sogllem Levichem kull Sorvesporachea Tombu sorvbhonvtim aple tombu marun, to Tombu rakhtole, konnakuch thoim fuddem sorunk diunchenant; na tôr, mhojea ragan sogllê porjekuch dhopko ditolom.'
54. Hea pormannem Israel-porjen, Sorvesporan Moizesak formailolem toxem kelem.
