1. Sorvesporan Israel-porjek hi xikounn diunk Moizesak ani Aaronak formailem.
2. Khot-khôdd nasloli ani kednanch kamak lavunk na tosli êk tambddi gai haddun,
3. ti Eleazar iadnika kodde diat. Moidana bhair vhorun, tachea fuddeant ti marunk zai.
4. Magir, Eleazar tichem ilem rogot ghetolo ani aplea bottan to sat pavtti tem Zomatichea Tombu-xim uddoitolo.
5. Ak'khem zonavor, chambddem, mas, rogot, ani zolliô iadnikachea fuddeant hulpaunk zai.
6. Magir to devdarachem ilem lankudd, hisop-zhaddachi êk talli, ani tambddo doro tea ujeant uddoitolo.
7. Uprant to aplim vostram dhutolo, ani apnnacher-ui udok vot'tolo, ani magir tachean moidanar ieum-ieta, punn sanz porian to riti pormannem oxud'dh urtolo.
8. Gai hulpailea tea-i mon'xan aplim vostram dhunvchim ani apnnacher udok vôtchem, punn sanz porian to oxud'dh urtolo.
9. Magir, riti pormannem xud'dh aslolea mon'xan to gobôr punzauncho ani moidana bhair eka xud'dh zagear to dovorcho. Riti pormannem ji oxudh'dhi asa ti kaddunk, Israel-porza hea gobran xudh'dhichem udok toiar kortoli. Patok kaddunk hi rit pallunk zai.
10. Gobôr punzaita tannem aplim vostram dhunvchim, punn sanz porian to oxud'dh astolo. Sorv ieunchea kallak, hi xikounn Israel porjen toxem Israela-modem jietolea porkea-lokan ti samballunk zai.
11. Konn-ui ek moddem afuddta to sat dis oxud'dh urtolo.
12. Tisrea ani satvea disa, tannem xudh'dhichea udkan nitoll zaun gheunchem. Punn to he don-ui dis, tisrea toxem satvea disa, toxem kori-na zalear to oxud'dh urtolo.
13. Konn-ui eka moddeak hat laita ani apli xudh'dhi korina zalear to oxud'dh urta, kiteak xudh'dhichem udok tacher poddunk na. To Sorvesporacho Tombu boxttaita, ani Devachê porjentlo koso taka lekchenant.
14. Konn-ui tombunt melea uprant, thoim aslolo lôk vô thoim bhitôr sorta to, riti pormannem, sat dis oxud'dh urto-lo.
15. Dhampnnem naslolem tombuleantlem aidon vô moddki oxud'dh zata.
16. Dara bhair konnak-ui jivexim marla, vô apxinch mela taka hat laita, vô mon'xachea eka haddak vô fonddak hat laita to sat dis oxud'dh urta.
17. Hi oxudh'dhi kaddunk patkachê xudh'dhi khatir hulpailolê gaiecho ilo gobor eka aidonant gheuncho ani tantunt zhorichem udok ghalchem.
18. Xudh'dhi korta to poilo apunnuch xud'dh asunk zai; magir, to tea udkant hisop-zhaddachi êk talli ghalun tombuleant bhitôr sorta, ani soglleancher ani thoim asat tancher tem udok xinvraita.
19. Ani zo monis oxud'dh zala, tacher tisrea ani satvea disa tem udok marta. Satvea disa, tea mon'xan aplim vostram dhunvchim, ani xudh'dhichem udok apnnacher gheunchem, ani hê porim, dis poddchê poilim to xud'dh zatolo.
20. Konn-ui hê porim oxud'dh zal'lo apli xudh'dhi korun ghena to tosoch oxud'dh urtolo, kiteak xudh'dhichem udok tacher poddunk na. To Sorvesporacho Tombu boxttaitolo ani Devachê porjê bhair poddtolo.
21. Sorv ieunchea kallak tumi ho kaido samballunk zai. Xudh'dhichem udok xinvraita tea-i mon'xan aplim vostram dhuvunk zai; konn-ui hem udok afuddta to sanz porian oxud'dh urtolo.
22. Oxud'dh monis hat laita titlem-i oxud'dh zata, ani konn-ui hea vostunk hat laita to sanz porian oxud'dh urta.
