1. Sorvesporan Moizesak mhollem,
2. Israel-porjek jem Midianachea lokan kelam tachi tankam xikxa di. Hi mhoji khoxi pall'lea uprant tum mortoloi.'
3. Tôr, Moizesan porjek mhollem, 'Zhuzak toiar zaiat, ani Midianachea lokak dhadd ghalun, jem tãnnim Sorvespora virudh kelam tachi tankam xikxa diat.
4. Dôr kullantle êk hozar monis loddaiek dhaddat.'
5. Mhonnttôch, eka-eka kullantle êk-êk hozar monis vinchun kaddle, ani bara hozar zhuzari toiar zale.
6. Moizesan tankam Fineias hachê foujê khal patthoile. Ho Eleazaracho put; tannem povitr vostu ani, toxench, xiddkavnni diunk tutureô khas aple hatant dovorleô.
7. Sorvesporan Moizesak formailolê, tê porim tãnnim Midianak dhadd ghali ani sogllea mon'xank marun uddoile,
8. ani hanchê modem panch patxai asle: Evi, Rekem', Hur, ani Reba. Balaamak, Beorachea putak-uit ãnnim marlo.
9. Midianachea bailank ani bhurgeank koidi kelim; tanchim ghorvam ani hindd, ani soglli thoinchi girestkai luttun haddli,
10. ani tanchim xaram ani tombu hulpaile.
11. Zhuzachi soglli lutt, koidi ani zonavoram haddun, Moizesa ani Eleazara ani sogllê Israel porjêkodde dili.
12. Hi porza Moabachea moidanar, Jordanachê poltoddi ani Jeriko samkar aple tombule marun asli.
13. Moizes, Eleazar ani porjeche soglle mukheli, moidana bhair sorun, poltonnik mellunk gele.
14. Moizes opxalancher ani poltonn loskoranchea sardar mukheleancher ani xotpotincher ragar zalo, ani
15. tannem vicharlem, 'sogllea bailank tumi kiteak jiveô sanddleat?
16. Hea bailamnim, Balaamachi budh aikun, amchea lokak, Sorvesporacher bhavarth ibaddun, Peor ganvant fuslaun sôddla. Haka lagon Sorvesporan aplê porjecher pidda dhaddli, hem visrum nakat.
17. Tôr atam sogllea cheddeank ani bailank jim dadleam-xim nhidleant tankam jivexim marat,
18. punn sogllea cheddvank ani ankvar-bailank jim dadleam-xim nhidunk nant, tankam jivim sanddat.
19. Ani tumi konnak-ui marla, vô moddeak hat laila, zalear, sat dis moidana bhair ravat. Tisrea ani satvea disa, tumchi ani koidi korun haddleat tea bailanchi xudh'dhi korat.
20. Têch porim sogllea vostranchi, ani sogllem chambddeachem vô bokddeachea kensanchem, vô lankddachem kel'lem tumchêkodde asa titleaichi, xudh'dhi korat.'
21. Eleazar iadnikan zhuzache portun ail'le tea mon'xank mhollem, 'He zaun asat Sorvesporan Moizesak dilole nem.'
22. Lason-hulpona titlem-i, zoxem bhangar, rupem, pitull, lokondd, potrem vô xinxem, ujeant ghalun tem xud'dh korunk zai. Bakichem udkan xud'dh korchem.
24. Satvea disa, tumchim vostram dhuvat; magir tumi riti pormannem xud'dh zatoleat, ani tumchean moidanar ieunk zata.
25. Sorvesporan Moizesak mhollem:
26. Tum ani Eleazar, porjechea mukheleam sangata, zhuzantlem haddlam, koideancho ani zonavorancho legun, tacho soglleacho hixôb korat.
27. Ek-sarke don vantte korat, êk xipaiank ani dusro vantto urlolea sogllea lokak.
28. Xipaiank poddta tea ordhantlo, Sorvesporak dondd-potti koxi, dôr painxeantlo êk vantto koideancho, gorvancho, ghaddvancho menddrancho ani bokddeancho kuxin kaddun dovrat.
29. Hantlo ordho vantto, Eleazar iadnikak diat; ho taka Sorvesporachea kherit denneantlo vantto.
30. Lokak poddta tea vantteantlo, dôr pon'nasantlo êk vantto koideancho, ghorvancho, ghaddvancho, menddrancho ani bokddeancho kuxin kaddun dovrat. Protek ponasantlo, êk vantto Levitank, Sorvesporachea Tombucho samball kortat tankam diat.'
31. Moizesan ani Eleazaran Sorvesporan formailolem toxem kelem.
32. Xipaiamnim haddlolem tancho hixôb ho (Tannim apnnak dovorlolem tea bhair) sôv lakh poncheat'tor hozar (6,75,000)menddram ani bokddeô;
33. beat'tor hozar (72,000) gorvam;
34. eksatth hozar (61,000) gaddvam;
35. ani bot'tis hozar (32,000) ankvari.
36. Mhonnttôch, xipaiancho ordo vantto oso: tin lakh sat'tis hozar painxim (3,37,500) menddram ani bokddeô;
37. hantli Sorvesporak dondd-potti koxi soixim poncheat'tor (675);
38. xot'tis hozar (36,000) gorvam hantli dondd-potti koxi Sorvesporak beat'tor (72);
39. tis hozar painxim (30,500)gaddvam hantli dondd-potti koxi Sorvesporak eksatt (61);
40. ani solla hozar (16,000) ankvari-hantli Sorvesporak donn-poti koxi bot'tis (32). Mhonnttôch,
41. Sorvesporacho vantto Moizesan Eleazarak dilo, ek kherit dennem koxem, Sorvesporan formailolem tea pormannem.
42. Ani xipaiank poddlolem, têch porim sogllea lokacho-i vantto zaun aslo:
43. tin lakh sat'tis hozar painxim(3,37,500) menddram ani bokddeô;
44. xot'tis hozar (36,000) gorvam;
45. tis hozar painxim (30,500)gaddvam;
46. ani solla hozar (16,000) ankvari.
47. Hea vantteantlo Moizesan, dôr pon'nasantlem ek-ek koideantlem toxem zonavorantlem kaddun, Sorvesporan formailolem tea pormannem, Levitank dilem; he Sorvesporachea Tombuchi seva korit, dekhun tannem tankam dilem.
48. Magir, poltonniche sardar-mukheli ieun,
49. Moizesak sanglem, 'Saiba, amchê khal aslolea soinikancho hixôb kela, ani eklo-i tantlo unno na.
50. Tôr, ami vhel'lem titlem-i: bhangaracheô vostu, kanknnam, pulseri, mudiô, kanantlim, ani sorpolleô, hem sogllem portun ditanv. Amcho jiv samballchê khatir, ami tem Sorvesporak bhettoitanv; Sorvespor amcho jiv samballum.'
51. Moizesan ani Eleazaran hem bhangar ghetlem, sogllem angak ghalpacho xrungar.
52. Soglleachem vozon solla hozar, satxim ponas xekel voir zatalem; hem opxalamnim Sorvesporak bhettoilem.
53. Opxal nhoi asle tãnnim, apnnak vhel'lem tem apnnakuch dovorlem.
54. Moizesan ani Eleazaran Sorvesporan Israel-porjek samball'lli dekhun, hem sogllem bhangar Tombunt vhelem.
