1. Reuben ani Gad hanchea kullam kodde zaitim gorvam-menddram aslim. Jazer ani Gilead hangachi zomin, gorvam-menddram voir kaddunk, tankam boreak poddtoli mhonn polleun,
2. te Moizes, Eleazar, ani porjechea heram mukheleam-xim gele, ani tãnnim mhollem,
3. Hea prantantlim xaram aplim korun gheunk, Sorvesporan Israel porjek adar dila
4. Ararot, Dibon, Jazer, Nimra, Heshbon, Elealeh, Sibma, Nebo, ani Beon him gorvam-menddrank ekdom' borim, ani amchê kodde itlem sogott asa.
5. Mhonnttôch, ho ganv amkam di amchem daiz koxem, ani amkam Jordan Nodi poltoddi vochun thoim thikann korchi gorozuch aschina.' Moizesan tankam zobab dilo:
6. Tumche bhav-sangati Israelit zhuzak vetole, ani tumi hanga ravunk sôdtat?
7. Zo ganv Sorvesporan aplê porjek dila, tachi pos gheunchê khatir tinnem Jordana poltoddi, tankam eka jin'san patthim kaddunk tumkam koxem kalliz zata?
8. Jedna hanvem tankam Kadesh Barnea thaun ho ganv topasunk dhaddlole, tedna tumchea purvozamnim toxem kelem.
9. Eshkol Gholant porian te gele ani ganvcher nodor marli, ani thoinche portun ieun, Sorvesporan dil'lea desant portun vechem nhoi mhonn, tanchem mon kusoilem.
10. Sorvespor ragar zalo, ani soput diun, Tannem mhollem:
11. "Tim mhaka visvaxi ravlim nant dekhun, hanv oxi bhas ditam, ki tanchê modem vis ani odik vorsanche asat, ani Ejiptantle bhair sorun aileat tantlo eklo-i, hanvem Abranvak, Izakak ani Jakobak bhasailolea ganvant bhitôr sorchinchnant.
12. Kaleb, Kenizit Jefunnecho put, ani Joshua, Nunacho put; je taka visvaxi asle, hankam sôddun heram soglleank thoim veche bhaire korun sôddle."
13. Sorvespor aplê porjecher ragar zalo ani, challis vorsam oronneant firun, xekim tanchi pinnka sompli.
14. Ani atam, êk novi, khottea mon'xanchi sonsôt koxi, tumi tumchea purvozancho zago ghetla. Devacho khôr rag Israel-porjecher porot ubzoita tosli sonsôt hi.
15. Tôr, atam, Reuben ani Gad kullantlo lôk Devachi vatt sôddun dita, zalear, to aniek pavtt aplê porjek hea oronneant sôddun ditolo, ani tanchea nirbhag nisonttonnache tumi zobabdar zaun astoleat.'
16. Tãnnim Moizesak mhollem, 'Adim poilem, fatranchim durgam bandunk amkam rojea di, hê porim amchim menddram bhitôr astolim ani amchea lokak-ui ravunk asro zatolo.
17. Magir, amchean Israelit bhavam-sangateam borabor zhuzak vochunk zatolem, ani sogllem jikhun gheun, ani porjen te ganv aplea tabeant kori-sor ami thoim ravtoleanv; punn sod'dea, aplea punn ghôtt vonttim bhitôr amcho lôk hanga surokxit astolo.
18. Tea uprant, sogllem thir zatôch, amchea loka modem porot ieun jietoleanv, punn tea adim nhoi.
19. Jordana poltoddi ami koslench daiz gheunche nanv, kiteak amkam Jordanachê udentek amcho vantto mell'lla.'
20. Moizesan zobab dilo, 'Tumi toxem khorench sangtat zalear, hangach Sorvesporachea fuddeant zhuzak vochunk toiari korat.
21. Tumche soglle zhuzari Jordan utortole, ani Sorvesporachea mukheliponna khal, tumi dusmanak dhadd ghaltoleat ani Sorvespor zoit favo kori-sor tumi bollan zhuztoleat
22. ani xekim ganv amchea tabeant poddtolo. Tea uprantuch tumchean hanga porot ieunk zatolem, kiteak tumi Sorvespora sovem ani tumchea Israeli-tam sovem tumcho kaido pall'lo. Ani kednanch Sorvespor ho, Jordanachê udentek, ganv tumcho mhonn mandun ghetolo.
23. Punn tumi ditat, ti bhas pallina zaxat, Sorvesporacher vhodd patok adartoleat. Ani tumkanch fosoum nakat, tumkam vhôdd khast favo zatoli.
24. Tôr, hanga tumcho ganv bandun gheiat, ani to ghôtt korat tumchea hinddank ani tumchea lokak. Ani bhasailam tem pallat!'
25. Gad ani Reuben, hanchea lokan mhollem, 'Saiba, tum sangtai toxem ami kortoleanv.
26. Amcheô bailô ani amchim bhurgim, ani amchim gorvam ani menddram hanga Gileadant astolim.
27. Ani ami sogllim, Sorvesporan sanglam tê porim, zhuzak vochunk toiar asanv. Tunvem sanglãi toxem, ami Jordan utrun zhuztoleanv.'
28. Hea pormannem, Moizesan Eleazarak, Joshuak ani Israel porjechea mukheleank oso hukum' dilo:
29. Gad ani Reuben, hancho lôk Jordan utrun zhuzak vetit ani tanchea adaran te ganv jikhun ghexat, tedna ho Gileadacho ganv tankam diat.
30. Punn te Jordana poltoddi vochonant ani tumchea borabor zhuzonant, tedna tumchê porim tankam-i Kanaanchea ganvant vantto astolo.'
31. Gad ani Reuben hanchea mon'xam-nim zobab dilo, 'Saiba, Sorvesporan formailam toxem ami kortoleanv.
32. Tachea formonna khal ami Jordan utrun vetoleanv, ani Kanaan ganvant zhuztoleanv, ani hê jin'xim hangachem daiz amchem zaun astolem.'
33. Mhonnttôch, Gadachea ani Reubenachea, ani Manassechea ordea kullak sogllo Sihon patxaiacho, Amoritancho ganv; têch porim Og-patxaiacho, Baxancho ganv, ani sorvbhonvtinche ganv tankam dile.
34. Gadachea kullan Dibon, Atarot,Aroer,
35. Atrot Shofan, Jazer, Jog-beha,
36. Bet Nimrah, ani Bet Haran him sogllim xaram bandun ghôtt kelim.
37. Reubenachea kullan Heshbon,Eliala, Kiriathaim,
38. Nebo, Baal Meon (thoddim nanvam bodol'leant) ani Sibma him sogllim xaram bandun ghôtt kelim. Ani tãnnim porot bandlolea xarank novim nanvam divun kaddlim.
39. Makirachea kullan (Makir Manassecho put) zhuzun Gileadacho ganv ghetlo, ani Amoritank thoinche bhair ghale.
40. Tôr, Moizesan Gileadacho ganv Makirachea kullak dilo, ani te thoim jiele.
41. Jair, Manassechea kullacho, hannem thodde khedde-ganv jikhun ghetle ani hankam tannem 'Jairache Vadde' oxem nanv dilem. Noban Kenat ani her xaram jikhun ghetlim, ani aplench nanv tankam dilem.
