1. Israel-porza Atharimachea vatten ieta mhonn aikolea uprant, Negebant ravtolea Kanaanachea Aradan aikolem tedna, to tanchê virudh loddaiek ailo ani thoddeank koidi kele.
2. Tedna Israel-porjen Sorvesporak êk angovnn keli: 'Hê porjê virudh amkam zoit dixi zalear, somptech tankam ani tanchim xaram ami tuka bhettoitoleanv ani tancho bhosm kortoleanv.'
3. Sorvesporan tanchem magnnem aikolem ani Kanaanit-porjecher tankam zoit mello-xem kelem. Mhonnttôch, Israel-porjen tancho ani tanchea xarancho purai bhosm kelo, ani tea ganvak Horma hem nanv dilem.
4. Tea disamnim Israel-porza, Hor dongôr sôddun, Edomachea prantantlean vochona zavpak, rosteavelean Sufachea Doria vatten cholunk lagli. Vatter lok osovosth zalo.
5. Tim Devacher ani Moizesacher add ulounk laglim: 'Kiteak mhonn tunvem amkam Ejiptantlim bhair kaddlim-i? hea oronneant ami morun vochunk? Hanga unddo na, udok-ui na! Pott-bhorona toslem tum amkam jevonn ditai tachi amkam vitt aili.'
6. Tedna Devan loka modem ujeache vô bhirankul sorop dhaddle. Lokak chabun tãnnim Israelant zaitea zannancho jiv kaddlo.
7. Lôk Moizesak sangunk ailo, 'Sorvesporacher ani tujer add uloun ami patok kelem. Sorvesporan amchê sorxile he sorop pois korche mhonn, tum Taka amchê khatir vinoti kôr.' Moizesan porjê khatir vinoti keli,
8. ani Sorvesporan oso taka zobab dilo, 'Tum êk ujea-sarko sorôp kôr ani to eka khambear ubarun dovor. Konnak tôr sorôp chablo zalear, tacher nodor ghalear to vanchtolo.'
9. Mhonnttôch Moizesan êk pitullcho sorôp kelo ani eka khambear ubarun dovorlo. Ani zôr konnak sorôp chablo, zalear to pitullchea sorpacher nodor ghaltalo ani vanchtalo.
10. Israel-porza fuddem cholun geli ani Obot zagear aple tombu ubharle.
11. Ani thoinchi bhair sorun, Moabit lokachea ganvchê udentek, padd zal'lea Abarim mhonnttat tea zagear, eka oronneant ti geli.
12. Thoim thaun ti Zared Gholant geli.
13. Hanga thaun ti Arnon Nodichê ut'torek, eka oronneant geli; hem oronnem Amoritanchea ganvant legun pavlam. (Arnon Moabitanchea ani Amoritanchea ganvam modem êk xim').
14. Hea vixim Sorvesporachea Zhuzanchem Pustok oxem mhonntta: '...Waheb-xar Sufachea ganvant, ani gholamnim; Arnon Nôd,
15. ani Ar xarant ani Moabachê ximer porian pavtat tea gholanchem palsonnem.'
16. Hanga thaun Be'er mhonnttat thoim ti geli. Hea zagear Sorvesporan Moizesak mhollem, 'Porjek ektthaim kôr, ani hanv tankam udok ditam.'
17. Hea somoiar Israel-porjen hem gaion kelem: O bãi-ê, tujem udok voir voir ieum. Ami tuka ek git gaitanv.
18. O bãi-ê, tuka kunvramnim; ani porjechea mukheleamnim bandloli. Kunvramnim aplê rajkattien, ani mukheleamnim aplea rotamnim.' Hanga thaun porza Mattanachea oronneant geli,
19. ani hanga thaun Nahaliel mhonnttat thoim, ani hanga thaun Bamot mhonnttat thoim,
20. ani hanga thaun Moabitanchea ganvant eka gholant, Pisga Dongrachea palsonneak; hanga thaun nodor pois oronneant pavtali.
21. Uprant, Israel-porjen Sihonak, Amoritanchea patxaiak, nirôp divun mon'xank dhaddle, hê porim,
22. Tumchea ganvantlean vochunk amkam vatt diat. Ami ani amchim gorvam marga-bhair sorchinch nant, ani tumchea xetam-molleantlean vechenanv, ani tumchea bãinchem udok pieunche nanv; ani tumchea ganvantle bhair pavo-sor ami mukhi margantlean nitt choltoleanv!'
23. Punn Sihon patxai Israel porjek aplea ganvantlean vochunk hukum' dina zalo. To apli fouz ghevun, Jahaz oronneant gelo ani Israel porjek dhadd ghali.
24. Punn Israel-porjen zaitea aplea dusmanank marle, ani Arnon Nodichê ut'torek thaun Jabbok porian tancho ganv ghetlo, Ammonit-lokanchi xim' porian, kiteak hê ximer bori rakhonn korun asle.
25. Punn Amorit-porjechim sogllim xaram ghetlim, Heshbon ani sorvbhonvtinchim xaram legun ani thoim aplem pennem korun ravle.
26. Heshbon zaun aslem mukhi ani Sihon patxaiachem xar; hem tannem adlea Moabachea patxaia koddchem ghetlolem, ani Arnon porian sogllo tacho ganv aplea tabeant kel'lo.
27. Hea khatir hem kovianchem hem gaion: 'Heshbon ie, Sihon patxaiachea xarant! Moddlam tem ami porot bandtoleanv.
28. Eka kallar, hea Heshbon xarant thaun Sihon patxaiachem loskor ujea porim gelem; -Tannem Moabant Ar padd kelem -Ani unch Arnonache dongor gill'le.
29. Koslem odruxtt tumkam, Moabachea lokank! -Tumi Kemoshak bhoztale te, tumchem ghortthan zaun gelem! -Tumchea devan tumkam pollun vochunk sôddle. -Ani bailank Amorit patxaian koidi keleô.
30. Punn atam tanchi sonsôt nanch zaun geli, -Heshbon thaun Dibon porian, -Medeba thaun Nofa porian.'
31. Mhonnttôch, Israel-porza Amoritanchea ganvant aplem thikann korun ravli.
32. Ani Moizesan, Jazer xar koxem gheunchem tem sôdun kaddunk monis dhaddle. Israel-porjen tem ghetlem, toxech sorvbhonvtinche ganv, ani thoinchea Amoritank dhanvddaile.
33. Magir, Israel-porjen Bashancho marôg dhôrlo, ani Edrei mhonnttat thoim Og patxai Bashancho tancher loddaiek ailo.
34. Tedna Sorvesporan Moizesak mhollem, 'Taka tum bhieum naka, hanv tuka tachê-ver zoit ditolom, soglli tachi porza ani tacho ganv jikhun ghetoloi. Sihonak, Amoritanchea patxaiak, Heshbon raj choloitalo taka kelãi toxench haka-i kôr.'
35. Mhonnttôch, Israel-porjen Og patxaiak ani tachea putank marun uddoile, toxench, sogllea tachea lokak, eklo-i tantlo jivo urlona, ani tacho ganv aplea tabeant kelo.
