1. Moizesan Sorvesporacho Tombu ubharlo teach disa tannem to makhlo, ani tachê borabor urlolem sogllem samon, ani tanchi bhettounni keli.
2. Uprant kullanchea mukheleamnim, ani zankam lôkgonnti korunk hukum' dil'lo,
3. Sorvesporak aplim dan-dennim haddlim: sôv gaddiô ani bara boil, dog-dog mukheliank êk gaddi, ani dôr eka mukheleak êk boil.
4. Sorvesporan Moizesak mhollem,
5. Zomatichea Tombuchea vavrak him dennim ghe. Tanchea vavra pormannem tim Levitanchea hatant ghal.'
6. Mhonnttôch, Moizesan teô gaddiô ani boil Levitank dileô.
7. Gershon-kullancheank don gaddiô ani char boil,
8. ani Merari-kullacheank char gaddiô ani atth boil; hê porim tim vanttun dilim. Ani Ithamar, Aaronachea puta khal, tãnnim sogllo vavr korunk zai aslo.
9. Punn Moizesan Kohat-kullacheank gaddiô vô boil dilenant, kiteak tanchem samon tãnnim aplea khandar dhôrun vhorunk zai aslem.
10. Vedichem somorponn korchê khatir mukheliamnim bhettô haddleô. Tãnnim aplim dennim vedi-xim haddlim tedna,
11. Sorvesporan Moizesak mhollem, 'Dôr-eka mukhelian vedichea somorponna khatir, apli bhett haddchi.' ani tannim apleô bhettô hê porim keleô: Poilea Disa: Judachea kullan Nashon, Amminadabadachea putan
12-83 ani tannim apleô bhettô hê porim keleô: Poilea Disa :Judachea kullan – Nashon, Amminadabadachea putan. Dusrea Disa : Issakarachea kullan – Nethanel, Zuarchea putan. Tisrea Disa : Zebulunchea kullan – Eliab, Helonchea putan. Chovthea Disa : Reubenachea kullan – Elizu, Shedeurachea putan. Panchvea Disa : Simeonchea kullan – Shelumiel, Zurishaddaiachea putan. Sovea Disa : Gadachea kullan – Eliasaf, Deuelachea putan. Satvea Disa : Efraimachea kullan – Elishama, Ammihudachea putan. Atthvea Disa : Manassechea kullan – Gamaliel, Pedahzurachea putan. Nnovea Disa : Benjaminachea kullan – Abidan, Gideonichea putan. Dhavea Disa : Danachea kullan – Ahiezer, Ammishaddaiachea putan. Ikravea Disa : Asherachea kullan – Pagiel, Ochranachea putan. Baravea Disa : Naftalichea kullan – Ahira, Enanchea putan. Zonn-eklean ek-sarkim dennim haddlim: êk rupeacho kanso, pon’nas ouns ha-chea voznacho, ani ek rupeachem tost, tis ounsanchea voznachem – donui tel misoll kel’lea pittan bhôrun, orovachê bhettê khatir; char ounsanchea vozna-cho êk bhangaracho kanso, dhumpan bhorlolo; êk paddo, êk menddro ani vorsacho ek menddurlo hom’-bhettek; êk bokddi farikponnachê bhettek; ani don boil, panch menddre, panch bok-ddeô, ani vorsache menddurle, ekta-rachê bhettek.
84. Israelachea mukheliamnim, Vedichea somorponnak bhettoil'lim dennim hê porim zatalim: Rupeache bara kanxe ani rupeachim bara tostam ani bhangarache bara kanxe.
85. Dôr Rupeachea dôr-eka kanxeachem vozon ekxem tis shekel aslem, rupeachea dôr tostachem vozon sot'tor shekel, hea sogllea rupeachea vostunchem vozon don hozar charxim dev-sthanache shekel.
86. Bara dhumpan bhorlolea dôr-eka kanxeachem vozon dha dev-sthanache shekel aslem, hea kanxeanchea bhangarachem vozon sogllem mellun ekxem vis shekel aslem.
87. Hulpailolea bolidanak mon'zati hê porim asleô: Bara padde, bara menddre, ani vorsache bara menddurle; ani hom'-bhettê borabor hulpaunk orovacheô bhettô.
88. Ektarachê bhettek mon'zati hê porim: Chovis boil, satt menddre, satt bokdde, ani vorsache satt menddurle.
89. Moizes Sorvesporakodde ulounk Zomatichea Tombunt gelo tedna, Korarachê Arkpettê voir thaun tea don kerubinchea pakotteam modem Sorvespor uloilolo Moizesan aikolem.
