1. Israelachea putam- dhuvancho sogllo zomo poilea mhoineant Zinachea oronneant pavlo. Lokan Kadeshant biradd kelem. Thoim Miriam meli ani thoinch tika purli.
2. Porjek pieunk udok naslem ani sogllim Moizesacher ani Aaronacher kolpolim.
3. Porjen Moizesacher nixêd marun mhollem: 'Sorvespora mukhar amchim bhavbhoinn melim toxim, ami-i mel'leanv zalear odik borem zatem.
4. Sorvesporachê porjek hea oronneant tunvem kiteak mhonn haddlii? Ami ani amche hindd hanga morun vochunk?
5. Ejiptantlim tunvem amkam kiteak mhonn bhair kaddlim-i? Hea padd zagear haddunk? Hi zomin kosloch dhanno vompunk upkarona, hanga anjiram zainant, dakô pikonant, ani dallmam-i mellonant; tea bhair pieunk mhollear ilem udok porian na!'
6. Porjek sôddun, Moizes ani Aaron Zomatichea Tombunt gele. Te zomnir saxttangim poddle ani Sorvesporachem voibhov tankam dixtti poddlem.
7. Sorvesporan Moizesa kodde uloun sanglem:
8. Danddo ghe ani tum ani tuzo bhav sogllê porjek ektthaim korat. Tanchea dolleam mukhar hea khoddpak adnia ghal ani khoddop tuka udok ditolem. Tum hea khoddpantlem tankam udok vhanvo-xem kortoloi, ani porjek ani tanchea hinddank pieunk ditoloi.'
9. Sorvesporan sanglolê pormannem Moizesan tanchê hujir danddo ghetlo.
10. Uprant Moizesan ani Aaronan porjek khoddpa mukhar apoun mhollem: 'Fitur mon'xamnô, aikat! Hea khoddpantlem tumkam udok bhair soro-xem korum?'
11. Ani Moizesan aplo hat ubarlo ani don pavtti to danddo khoddpacher marlo. Tedna ghosghoxit udok vhanvlem ani porza pieli ani hinddank-ui pieunk mell'llem.
12. Tedna Sorvesporan Moizesak ani Aaronak mhollem: 'Israelachea putam-dhuvam mukhar Mhoji povitrtai porzollaunk Mhaka podvi asa mhonn tumi Mhojer visvas tthevlo na dekhun, tankam Hanv diunk vetam tea desant tumi porjek bhitôr kaddche nant!'
13. Him Meribachim (mhonngê fiturechim) udkam; hanga Israelachea putam-dhuvamnim Sorvespora kodde zhogddem manddlem, ani Tannem Apli povitrtai porgôtt keli.
14. Kadesh thaun Moizesan Edomachea patxaia-xim nirôp divun monis dhaddle. Tannim mhollem, 'Ho nirôp tumchea daijeamnim, Israelachea kullamnim dhaddla. Amkam kosle koxtt poddleat tem tum zannoi,
15. koxê porim amche purvoz Ejiptant pavle, ani ami thoim zaitim vorsam sarlim. Ejiptantlea lokan amchea purvozank ani amkam pidda-pidd dili,
16. ani ami Sorvesporak ulo marlo. Tannem amchi zap aikoli ani, eka dutak dhaddun, amkam Ejiptantle bhair kaddle. Atam ami Kadesh ganvant asanv, ani ho ganv tumchê ximer asa.
17. Upkar magtanv, tujea ganvantlean vochunk amkam hukum' di. Ami ani amchim gorvam marga bhair sorchenanv, vô tumchea xetam-molleamnim vechenanv, ani tumchea bainchem udok pieunchenanv. Tumchea ganvantle bhair soro pasun, ami nitt mukhi rostear astoleanv.'
18. Punn Edomit-lokan zobab dilo, 'Amchea ganvantlean vochunk tumkam vatt dinanv! Vochunk sôdxat zalear, tumchê virudh loddaiek bhair sortoleanv.'
19. Israel-porjen mhollem, 'Mukhi rostea bhair ami sorchenanv, ani ami vô amchim gorvam tumchem udok pietit zalear tumkam farik kortoleanv, fokot amkam tumchea ganvantlean vatt diat.'
20. Edomit-lokan toch zobab dilo, 'Ami dinanv!' ani êk vhodd poltonn ghevun te Israel-porjecher uprasle.
21. Punn to Edomit-lôk aplea ganvantlean Israel-porjek vatt dina zale dekun, Israel-porza portoli ani dusrê vattentlean geli.
22. Soglli Israel-porza Kadeshachi bhair sorun, Hor Dongra-xim pavli,
23. Edomachê ximer. Hanga Sorvesporan Moizesak ani Aaronak mhollem,
24. Israel-porjek hanvem bhasaila tea ganvant Aaron bhitôr sorchona; to atam mortolo, kiteak tumi dogaimnim Meriba ganvant mhojea hukumachi ninda keli.
25. Aaronak ani Eleazar, tachea putak, gheun Hor Dongrar vochat,
26. ani thoim Aaronachim vostram kaddun tim Eleazar, tachea putak nhesoi. Aaron thoim mortolo.'
27. Moizesan Sorvesporan formailolê tê porim kelem. Te, sogllê porjechê dixtti mukhar, Hor Dongrar gele,
28. ani Moizesan Aaronachim vostram kaddlim ani tim Eleazarak ghalim.Thoim voir dongrachea mathear Aaron melo, ani Moizes ani Eleazar thoinche sokla aile.
29. Aaron melo mhonn sogllê porjek gomlem, ani tãnnim soglleamnim tis dis porian tachem dukh kelem.
